Ghen’è tante maniere de darghene fora quando perdemo qualchedun nela morte. Ghen’è de quele che le giuta de pi. L’è parché cada persona la ghen dà fora col dolor de una maniera difarente. Alora, quel che l’è bon par una persona fursi no l’è bon par quelaltra.

Ma ghen’è consili che i ga belche giutà tante persone. Tante volte i ze i spessialisti che i dà questi consili che i ze de acordo coi insegnamenti che ghen’è nte un libro antigo, la Bìblia.

• Arquanti studiosi i dise che questo l’è el meio aiuto che te pol ricever quando te perdi qualchedun nela morte. Ma dele volte te vol restar ti sol e fursi te resti fin inrabià con quei che i vol giutarte. L’è normal sentirse cossita.

• No ocore che te stai sempre insieme cole altre persone ma no stà restar sempre lontan ti sol, parché pol esser che te gàpia bisogno de aiuto. Parlaghe ai altri de quel che te ghè bisogno e de quel che no te ghè bisogno. Ma va sempre cole bone.

• De acordo coi to bisogni, con echilìbrio, te pol dessider quanto tempo te restarè cole altre persone o ti sol.

COSSA DISE LA BÌBLIA: “L’è meio due che un . . . Se un de lori el casca, quel altro pol giutarlo a levar su.” — Eclesiasti 4:9, 10.

• Tender de quel che te magni va giutarte a darghene fora col stresse del luto. Proa magnar arquanti tipi de fruti, de verdure e proteìne sensa grassa.

• Bevi tanta àqua e altre robe sane.

• Se no te ghè tanta fame, magna diverse volte al dì un pochetin. Anca te pol domandarghe al to dotor vitamine che le pol giutarte. a

• Far una caminada svelta e altri tipi de esersissi i pol giutar a gaver manco pensamenti negativi. El esersìssio el pol giutarte a pensar in quel che ga sucedesto o fermarte de pensar in questo par un tempo.

COSSA DISE LA BÌBLIA: “Gnanca un omo el ga mai odià el so pròpio corpo, ma lu lo alimenta e lo tende.” — Efesi 5:29.

• Dormir l’è importante par tuti, ancora de pi par quel che el ga perso qualchedun nela morte. El motivo l’è che la tristessa pol assar la persona pi straca che el normal.

• Stà atento con quel che te bevi, con quel che ga cafeina o alcol, parché questo el pol pregiudicar el to sono.

COSSA DISE LA BÌBLIA: “L’è meio una sbranca de descanso che due sbranche de tanto laoro e corer par ciapar el vento.” — Eclesiasti 4:6.

• Te ghè de saver che cada persona la ghen dà fora cola tristessa dela so maniera. Cossita te ghè de saver quel che l’è meio par ti.

• Tanti i se sente meio quando i parla dela so tristessa coi altri. Altri no i vol dirghe gnente a nissuni. I studiosi i pensa de maniere difarente sora la importansa de parlarghe ai altri dei sentimenti che la persona che la ga perso qualchedun nela morte la ga. Se te ghè bisogno de parlarghe a qualchedun dei to sentimenti ma te ghè paura, proa scominsiar a parlar con un caro amigo.

• Arquanti i ga visto che piander el fà ben. Ma altri, piandendo manco, i ze stati boni de darghene fora.

COSSA DISE LA BÌBLIA: “Cada cuor el cognosse el so pròpio mal.” — Proverbi 14:10.

• Par sentirse meio arquanti i beve massa, i dopera massa rimedi o i dopera droghe. Ma la persona che fà questo la resta ancora pedo. Fursi la se sente meio par un poco ma dopo la resta pedo ancora. L’è meio che te infronti el problema cole robe che no te fae mal.

COSSA DISE LA BÌBLIA: “Ghemo de netarse de tute le sporchìssie.” — 2 Corinti 7:1.

• Aceta che te gavarè momenti de tristessa, ma tote el tempo par far qualcossa che te giute a restar meio. Tanti i ga visto che l’è bon far cossita.

• Star insieme coi amighi, far novi amighi, imparar a far robe nove o far qualche altra roba pol giutarte a sentirte meio.

• Col tempo la to situassion la pol cambiar. Te vedarè che te restarè de pi tempo contento che triste. Tuto questo el giutarà a recuperarte.

COSSA DISE LA BÌBLIA: “Par tute le robe ghen’è un tempo. . . . Tempo par piander e tempo par rider. Tempo par lamentar e tempo par balar.” — Eclesiasti 3:1, 4.

• Pena che te pol, fà tuto quel che te fei.

• Proa dormir ben, laorar e far altre atività. Cossita te farè pi presto ritornar nele atività che te fei vanti. Questo pol giutarte a sentir che le robe le ze drio restar come vanti.

• Far quel che te giuta a sentirte meio pol giutarte a sentirte manco triste.

COSSA DISE LA BÌBLIA: “No’l ndarà veder passar i giorni dela so vita curta, parché el vero Dio lo assa consentrà nela alegria del so cuor.” — Eclesiasti 5:20.

• Tanti che i fà dessision importante massa presto, pena dopo che i ga perso qualchedun nela morte, i se ciama grami.

• Se te pol, speta un tempo par cambiarte de posto ndove te sì de star, cambiar de laoro, o dar via le robe che gavea la persona che la ze morta.

COSSA DISE LA BÌBLIA: “L’è sicuro che i progeti de quel che pensa ben vanti i gavarà boni resultadi. Ma quei che i ga sempre prèssia i restarà poareti.” — Proverbi 21:5.

• Tanti i dise che l’è bon far robe che li ricorda dela persona che la ze morta.

• Una roba bona che te pol far l’è scriver nte un quaderno le robe che ga sucedesto e le stòrie che no te vol desmentegarte. O fursi te pol meter insieme le foto che le te dà boni ricordi.

• Meti via le robe che le te porta bei ricordi. Dopo, quando te te senti meio, te pol passar un tempo vardando queste robe.

COSSA DISE LA BÌBLIA: “Ricòrdate del passà.” — Deuteronómio 32:7.

• Proa veder se te pol ndar de fèrie.

• Se no te pol restar tanti giorni de fèrie, te pol far qualcossa che te piase un di o due, come ndar a spasso coi amighi, visitar un bel posto o ndar ala praia.

• Far qualcossa difarente, anca se l’è poco, te giutarà a infrontar el dolor.

COSSA DISE LA BÌBLIA: “Vegné insieme, ndemo nte un posto par restar noantri soli e riposar un pochetin.” — Marco 6:31.

• Quando che te te tol un tempo par giutar i altri, ti stesso te sarè giutà.

• Te pol scominsiar giutando quei che i ze drio sofrir insieme con ti par la persona che la ze morta. Par esémpio, fursi i to amighi e i to parenti i ga bisogno de parlar con qualchedun che i capisse el dolor che i sente.

• Apoiar e consolar i altri pol far che te gàpia nantra volta la alegria e sentir che te ghè valor, robe che fursi te ghè de bisogno.

COSSA DISE LA BÌBLIA: “Ghen’è de pi felicità in dar che in ricever.” — Ati 20:35.

• La morte de una persona che amemo la pol mostrar quel che l’è pi importante nela vita.

• Dopera questo tempo par veder quel che l’è pi importante nela to vita.

• Se te vedi che te toca far cambiamenti, meti le robe pi importante in primo posto nela to vita.

COSSA DISE LA BÌBLIA: “L’è meio ndar nte una casa ndove ghen’è luto che ndar nte una casa ndove ghen’è festa, parché la vita de tuti la se finisse cola morte, e quel che l’è vivo el ga de pensarghe sora.” — Eclesiasti 7:2.

 In verità, gnente che te fè ndarà finir del tuto el dolor che te ghè. Ma tanti che i ga perso una persona che i amea nela morte che i ga seghio i consili de questo artìcolo i dise che meterli in pràtica ghe ga dato consolo. L’è vera che qua no ghen’è tute le robe che ghemo de bisogno par gaver consolo. Ma se te proi meter in pràtica arquanti de questi consili, fursi te ndarè sentirte meio.