Hai, Bivhili a i tendelani na yeneyo pfunzo. Muthu a re na fulufhelo ḽa u tshidzwa nga nṱhani ha u vha na lutendo kha Yesu Kristo a nga xelelwa nga ḽeneḽo fulufhelo musi e si tsheena lutendo. Bivhili i amba uri a zwo ngo leluwa u dzula u na lutendo, ri fanela u tou lu “lwela.” (Yuda 3, 5) Vhakriste vha u thoma vhe vha vha vho no ṱanganedza Kristo vho vhudzwa uri: “Itani vhuḓidini hoṱhe nga nyofho na nga u tetemela uri ni tshidzwe.”​—Vhafilipi 2:12.

Ndimana dza Bivhili dzine dza lwisana na pfunzo ‘wa vhuya wa tshidzwa, wo tshidzwa lwa tshoṱhe’

•   Bivhili i ri sevha nga ha zwivhi zwihulwane zwine zwa nga ita uri ri si dzhene Muvhusoni wa Mudzimu. (1 Vhakorinta 6:9-11; Vhagalata 5:19-21) Arali ro vha ro tshidzwa lwa tshoṱhe, yeneyo tsevho yo vha i sa ḓo ṱoḓea. Nṱhani hazwo, Bivhili i sumbedza uri muthu we a tshidzwa zwi nga itea uri a si tshidzwe arali a ita tshivhi. Sa tsumbo, Vhaheberu 10:26 i ri: “Arali ri tshi ita tshivhi nga khole musi ro no vha na nḓivho yo teaho ya ngoho, a hu tsheena tshiṅwe tshiṱhavhelo tsha zwivhi zwashu.”​—Vhaheberu 6:4-6; 2 Petro 2:20-22.

•   Yesu o ombedzela ndeme ya u dzula ri tshi fulufhedzea nga u ṋea tshifanyiso tshe khatsho a ḓivhambedza na muṱokola nahone vhatevheli vhawe a vha vhambedza na matavhi. Vhaṅwe vhavho vho vha vha tshi ḓo sumbedza lutendo zwa vhonala nga mitshelo yavho kana nga mishumo, fhedzi nga murahu vha kundelwa nahone vha “laṱwa sa tavhi, [ḽi sa aṋwiho]” vha si tsha tshidzwa. (Yohane 15:1-6) Muapostola Paulo o shumisa tshifanyiso tshi fanaho, a amba uri Vhakriste vhane vha sa ṱahulele lutendo lwavho vha “ḓo vunḓwa.”​—Vharoma 11:17-22.

•   Vhakriste vho vhudzwa uri vha ‘dzule vho fhaṱuwa.’ (Mateo 24:42; 25:13) Vhane vha sa vhe na vhushaka ho khwaṱhaho na Mudzimu, nga nṱha ha uri vha ita “mishumo ya swiswi” kana a vha khou tevhedza nga vhuḓalo zwe Yesu a ri vhudza, a vha nga tshidzwi.​—Vharoma 13:11-13; Nzumbululo 3:1-3.

•   Maṅwalo manzhi a sumbedza uri vho tshidzwaho vha fanela u konḓelela nga u fulufhedzea u swika vhufheloni. (Mateo 24:13; Vhaheberu 10:36; 12:2, 3; Nzumbululo 2:10) Vhakriste vha ḓanani ḽa u thoma ḽa miṅwaha vho takala musi vha tshi pfa uri vhatendi ngavho vho vha tshi khou konḓelela nga u fulufhedzea. (1 Vhathesalonika 1:2, 3; 3 Yohane 3, 4) Naa zwi a pfala uri Bivhili i ombedzele u konḓelela nga u fulufhedzea arali vhathu vha tshi ḓo tshidzwa naho vha songo konḓelela?

•   Paulo o vha na vhuṱanzi ha uri u ḓo tshidzwa musi e tsini na u fa. (2 Timotheo 4:6-8) Mathomoni a vhutshilo hawe, o zwi ṱhogomela uri zwi nga itea uri a si tshidzwe arali a fusha lutamo lwa nyemulo ya ṋama. O ṅwala uri: “ndi langa muvhili wanga sa mulanda, uri musi ndo no huwelela kha vhaṅwe, nṋe muṋe ndi si takalelwe nga Mudzimu nga nḓila naho i ifhio.”​—1 Vhakorinta 9:27; Vhafilipi 3:12-14.