Ee, Diabolo ndi muthu wa vhukuma. Ndi ene “muvhusi wa shango.” Ndi muruṅwa we a vha muvhi a shandukela Mudzimu. (Yohane 14:30; Vhaefesa 6:11, 12) Bivhili i dzumbulula zwine Diabolo a vha zwone nga u shumisa madzina a tevhelaho:

•   Saṱhane, zwine zwa amba “Muhanedzi.”—Yobo 1:6.

•   Diabolo, zwine zwa amba “Ane A Tshinya Vhaṅwe Dzina.”—Nzumbululo 12:9.

•   Ṋowa, dzine ḽine Bivhilini ḽa ambela kha “Mufhuri.”—2 Vhakorinta 11:3.

•   Mulingi.—Mateo 4:3.

•   Muzwifhi.—Yohane 8:44.

Ha fanyiseli kana u imela vhuvhi

 Vhaṅwe vha vhona u nga Diabolo u fanyisela kana u imela vhuvhi vhune havha kha riṋe. (w09-E 10/1 15) Fhedzi Bivhilini ho ṅwaliwa nyambedzano ya Mudzimu na Saṱhane. Mudzimu ha na tshivhi, o vha a sa khou ambedzana na vhuvhi vhu re khae. (Dotoronomio 32:4; Yobo 2:1-6) Nga hu fanaho, Saṱhane o linga Yesu ane a si vhe na tshivhi. (Mateo 4:8-10; 1 Yohane 3:5) Nga zwenezwo, Bivhili i sumbedza uri Diabolo ndi muthu wa vhukuma, ha imeli kana u fanyisela vhuvhi.

 Naa zwi tea u ri mangadza uri vhathu vhanzhi a vha tendi uri Diabolo u hone? Hai, ngauri Bivhili i amba uri Saṱhane u shumisa vhufhura u itela u swikelela zwipikwa zwawe. (2 Vhathesalonika 2:9, 10) Vhuṅwe vhukwila hawe ndi u ita uri vhathu vha si zwi ṱhogomele uri u hone zwa vhukuma.—2 Vhakorinta 4:4.

Mazwifhi: Ḽiṅwe dzina ḽa Diabolo ndi Lucifer.

 Ngoho: Dzina ḽa Tshihevheru ḽo ṱalutshedzelwaho nga uri “Lucifer” ḽi amba “ṋaledzi i penyaho.” (Yesaya 14:12) Mafhungo a sumbedza uri ḽeneḽi dzina ḽi ambela kha mahosi a Babele, e Mudzimu a vha a tshi ḓo a shonisa nga nṱhani ha swili yao. (Yesaya 14:4, 13-20) Maipfi “ṋaledzi i penyaho” o shumiselwa u goḓa muvhuso wa Babele musi wo no wiswa.

Mazwifhi: Mudzimu u shumisa Saṱhane uri a linge vhathu, uri a kone u vha haṱula.

 Ngoho: Diabolo ndi swina ḽa Mudzimu, a si mushumeli wawe. Saṱhane u lwa na vhashumeli vha Mudzimu nahone u a vha pomoka.​—1 Petro 5:8; Nzumbululo 12:10.