Bivhili a i ambi nga ha Halloween ine ya vha holodei ine vhathu vhanzhi vha i pembelela nga dzi 31 October ṅwaha muṅwe na muṅwe. Fhedzi vhubvo ha Halloween na zwine zwa itwa a zwi tendelani na zwine Bivhili ya zwi funza.

Kha ino thero ri ḓo haseledza zwi tevhelaho:

•  Vhubvo ha Halloween na zwine zwa itwa

•  Naa zwi na ndavha uri Halloween yo thoma ngafhi?

•  Ndi ngani i tshi vhidzwa Halloween?

•   Samhain: The World Book Encyclopedia yo amba uri Halloween yo thoma kha vhuṱambo ha Samhain vhune ha vha ha “vhurereli ha mazwifhi ha tshifhingani tsha kale he ha vha vhu tshi pembelelwa nga vhathu vha Celtic miṅwaha i fhiraho 2 000. Vhenevho vhathu vho vha vha tshi tenda uri vhafu vha vha vha tshi khou tshimbila vhukati ha vhathu vha tshilaho nga tshenetsho tshifhinga. Nga vhuṱambo ha Samhain, vhathu vho vha vha tshi dalela vhafu.”—Vhalani nga ha uri “ Ndi Ngani I Tshi Vhidzwa Halloween?”

•   Zwiambaro zwa Halloween, maḽegere na u shushedza vhathu: Muṅwe muṅwali o amba uri vhenevho vhathu vha Celtic vho vha vha tshi ambara nga nḓila i ofhisaho uri yeneyo mimuya ya vhafu i humbule u nga ndi vhathihi nayo uri i si vha ite tshithu. Vhaṅwe vho vha vha tshi fhura yeneyo mimuya nga u i ṋea maḽegere. a

   Nga vho 500 C.E. na 1500 C.E. ngei Yuropa, vhafunzi vha kereke ya Katolika vho thoma u tevhedza mikhuvha ya vhurereli ha mazwifhi ya hune vha dzula hone na u ita uri miraḓo ya kereke yavho i ambare zwiambaro zwa Halloween, i tshimbile i tshi dzhena miḓini i tshi humbela zwifhiwa zwiṱuku.

•   Zwipuku, dzivampire, vhaloi na maḓuxwane: Ndi kale zwenezwi zwithu zwi tshi tshimbidzana na madimoni. Bugu ine ya pfi Halloween Trivia i zwi vhidza “maḓithu ane a ita madambi,” i dovha ya amba uri “zwi tshimbidzana nga maanḓa na lufu, vhafu na u ofha u fa.”

•   Mafhuri a Halloween: Nga vho 500 C.E. na 1500 C.E. ngei Britain, vhathu vho vha “vha tshi ya miḓini vha amba uri vha ḓo rabelela vhafu arali vha ṋewa zwiḽiwa, vha tshi vha vho fara dziturnip dzo phuliwaho dza dzheniswa luvhone nga ngomu dzi tshi imela mimuya ya vhafu ine ya vha fhethu hune ha vhidzwa phagathori.” (Halloween—From Pagan Ritual to Party Night) Vhaṅwe vhaṅwali vho amba uri dzenedzo mbone dzo vha dzi tshi shumiselwa u thatha mimuya mivhi. Nga vho 1800 ngei Amerika Devhula, ho thoma u shumiswa mafhuri nṱhani ha dziturnip ngauri o vha e manzhi nahone zwo leluwa u bvisa zwi re nga ngomu na u a phula.

 Ee. Naho vhaṅwe vhathu vha tshi dzhia Halloween i vhuṱambo vhu si na khombo, zwine zwa itwa zwi lwisana na zwine Bivhili ya zwi funza. Halloween i tshimbidzana na mazwifhi nga ha vhafu na madimoni.

 Ṱhogomelani vese dzi tevhelaho dzine dza sumbedza nḓila ine Mudzimu a dzhia ngayo zwithu zwi tshimbidzanaho na Halloween:

•   “Hu songo vha na ane . . . a amba na zwipuku kana mimuya kana ane a vhudzisa vhafu.”—Dotoronomio 18:10-12, The Jerusalem Bible.

   Zwine zwa amba zwone: Mudzimu ha ṱoḓi ri tshi vha na vhukwamani na vhafu kana u vhonala zwi tshi nga ri khou lingedza u amba navho.

•   “Vho faho a vha ḓivhi tshithu.”—Muhuweleli 9:5.

   Zwine zwa amba zwone: Vhafu vha nga si kone u amba na vhathu vha tshilaho ngauri a vha pfi tshithu.

•   “[Ni songo] ṱanganela na madimoni. Ni nga si kone u nwa tshinwelo tsha Yehova na dovha na nwa tshinwelo tsha madimoni.”—1 Vhakorinta 10:20, 21.

  Zwine zwa amba zwone: Vhane vha ṱoḓa u takalelwa nga Mudzimu vha tea u iledza u ḓiṱanganya na madimoni.

•   ‘Ni imedzane na vhukwila ha Diabolo ngauri ni khou lwa na madimoni.’—Vhaefesa 6:11, 12.

   Zwine zwa amba zwone: Vhakriste vha tea u lwisana na zwithu zwoṱhe zwine zwa tshimbidzana na madimoni nahone a vho ngo tea u ḓiita u nga vha khou pembela nao.