Mivhuso minzhi u mona na shango ḽoṱhe a i tsha tendela vhathu vha tshi kuvhangana fhethu huthihi. Ṱhanzi dza Yehova vho ḓiimisela u thetshelesa mivhuso, fhedzi vha bvela phanḓa vha tshi gwadamela Mudzimu vhoṱhe nga nḓila yo tsireledzeaho. U itela u ita zwenezwi, zwivhidzo zwi fara miṱangano zwi tshi shumisa dzi-app dza videoconferencing dzi ngaho Zoom.

 U itela uri ri kone u fara miṱangano yashu tshifhinga tshoṱhe, Tshigwada Tshi Langaho tsho tenda uri hu shumiswe miṋeelo u itela u rengela zwivhidzo akhaunthu dza Zoom. Zwenezwi zwo thusa nga maanḓa zwivhidzo zwe zwa vha zwi sa koni u badela R258.65-R344.87 kana u fhira ine ya vha tshelede ine ya ṱoḓea u itela uri tshivhidzo tshi kone u fara miṱangano nga videoconference. Kanzhi zwenezwi zwivhidzo zwo vha zwi tshi shumisa app dza mahala dze ha vha hu tshi kona u dzhena vhathu vha si gathi nahone dzi songo tsireledzea. Fhedzi zwivhidzo zwoṱhe zwine zwa khou shumisa akhaunthu ya Zoom ya ndangulo, zwi a kona u ita uri i dzule yo tsireledzea nahone hu nga kona u dzhena vhathu vhanzhi. U swika zwino, hu na zwivhidzo zwi fhiraho 65 000 zwine zwa khou shumisa dzenedzi akhaunthu, mashangoni a fhiraho 170.

 Tshivhidzo tsha Kairagi tshi re Manado, Devhula ha Sulawesi kha ḽa Indonesia, tsho litsha u shumisa app ya mahala, tsha thoma u shumisa akhaunthu ya Zoom ya ndangulo. Wahashu Vho-Hadi Santoso vho ri: “Na vhahashu vha sa ḓivhi zwinzhi nga ha nḓila ine ha shumiswa ngayo zwishumiswa zwa elekitironiki, vha khou ḓiphina nga miṱangano ngauri a zwi tsha ṱoḓea uri vha dzhene vha tshi bva lunzhi lunzhi musi miṱangano i tshi khou bvela phanḓa.”

 Vho-Lester Jijón, Jr. vhane vha vha muhulwane wa tshivhidzo tsha Guayacanes Oeste tshi re Guayaquil kha ḽa Ecuador, vho ri: “Nga nṱhani ha uri vhahashu a vha na tshelede, zwo vha zwi tshi ḓo konḓela zwiṅwe zwivhidzo uri zwi badele laisentse ya Zoom ye ya vha i tshi ḓo ita uri tshivhidzo tshoṱhe tshi kone u fara miṱangano. Ri livhuwa ndangulo ye ya ita uri zwi konadzee uri ri vhe na akhaunthu ya Zoom, ine ya tendela vhathu vhanzhi uri vha dzhene. Ri a kona na u ramba vhaṅwe miṱanganoni yashu ri sa ofhi uri ri ḓo fhira tshivhalo tshi ṱoḓeaho.”

 Vho-Johnson Mwanza vhane vha vha muhulwane wa tshivhidzo tsha Ngwerere North, kha ḽa Lusaka, Zambia, vho ri: “Vhahashu vhanzhi vha dzulela u amba uri, ‘ndugiselelo ya ndangulo ya uri ri vhe na Zoom i ita uri ri ḓipfe ri tsini na vhahashu na u ita uri ri pfe ri tshi funwa na u ṱhogomelwa nga Yehova.’”

 Ho itwa uri hu vhe na dzenedzi akhaunthu dza Zoom dza ndangulo hu tshi shumiswa tshelede yo vhetshelwaho thungo u itela mushumo wa u thusa vho welwaho nga khombo. Yeneyi tshelede i bva kha miṋeelo ine vhathu vha i ṋeela u itela u tikedza mushumo washu wa shango ḽoṱhe. Vhathu vhanzhi vha ṋeela vha tshi shumisa donate.isa4310.com. Ri livhuwa u ṋeela ha vhoiwe nga mafunda. Zwenezwi zwi dovha zwa thusa kha miṅwe mishumo ya u thusa vhahashu vho welwaho nga khombo u mona na shango ḽoṱhe.—2 Vhakorinta 8:14.