Ṱhanzi dza Yehova vha wana khandiso nnzhi dzo thewaho Bivhilini na dzividio u fhira naho hu lini. Fhedzi mashangoni manzhi, vhahashu a vha na tshelede ya u renga data. Vhaṅwe vha dzula fhethu hune inthanethe ya sa shume zwavhuḓi kana hu si na inthanethe na luthihi.

 Fhedzi zwazwino vhahashu vha vho kona u downlouda khandiso naho vha si na inthanethe! Vha zwi konisa hani?

 JW Box ndi kubogisi kuṱuku kune kwa ṋewa zwivhidzo zwine zwa vha fhethu hune inthanethe i sa shume zwavhuḓi. Kwonoko kubogisi ku na Wifi ye ya tou rengiwa na software yo itwaho muhashoni wa khomphyutha ngei Bethele. Ku na khandiso na vidio dzi wanalaho kha jw.org. Kubogisi kuthihi ku rengiwa nga tshelede i ṱoḓaho u vha R1 227.25.

 Vhahashu vha khonekhitha founu dzavho kha JW Box nahone vha downlouda dzikhandiso na dzividio musi vhe Holoni ya Muvhuso. Na vhane vha vha na zwishumiswa zwa kale kana zwi sa ḓuri vha nga kona u khonekhitha. Arali tshivhidzo tshi si na inthanethe, JW Box i nga vha hani na khandiso dza zwenezwino? Davhi ḽi dzula ḽi tshi rumela zwivhidzo USB dzi re na zwithu zwiswa zwi bvaho kha jw.org zwine zwa nga dzheniswa kha JW Box. USB nthihi i rengwa nga R65.45.

 JW Box yo thusa hani vhahashu? Nathan Adruandra ane a vha khotsi, a dzulaho ngei Democratic Republic of Congo, o ri: “Ndi kale ndi tshi lingedza u downlouda matambwa, ‘Iwe Yehova, Ndo Fhulufhela Iwe’ na Humbulani Mufumakadzi Wa Loto. Fhedzi a tho ngo vhuya nda kona u a downlouda nahone zwenezwo zwo nkula nungo. Zwino ndi vho kona u downlouda dzenedzi vidio kha founu yanga nahone zwenezwi zwi ri thusa sa vhabebi uri ri gudise vhana vhashu zwavhuḓi.”

 Wahashu wa ngei Nigeria ane a thusa zwivhidzo uri zwi kone u shumisa JW Box, o ri: “Vhahashu vha ri JW Box ndi tshifhiwa tsho khetheaho tshi bvaho kha Yehova. Vho takala nga maanḓa ngauri zwino vha vho kona u downlouda zwavhuḓi khandiso na vidio dzi re kha Bogisi Ḽa Zwishumiswa Zwa U Funza.”

 Ho no rumelwa zwibogisi zwi fhiraho 1 700 kha vhahashu vha ngei Afurika, Oceania na Amerika Tshipembe. Hu khou dzudzanywa uri zwi rumeliwe na kha zwiṅwe zwivhidzo zwinzhi. Tshelede ya u renga zwenezwo zwibogisi i bva ngafhi? I bva kha tshelede ine ya ṋeelwa shangoni ḽoṱhe hu tshi shumiswa donate.isa4310.com. Ri khou livhuwa u tikedza ha vhoiwe zwi tshi bva mbiluni.