Ndo vha ndi na miṅwaha ya fumi nga 1985 musi vhana vha bvaho ngei Cambodia vha tshi swika tshikoloni tshanga ngei Columbus, Ohio, kha ḽa U.S.A. Muṅwe wa vhatukana o vha a tshi ḓivha maipfi a si gathi a Luisimane. A tshi thuswa nga zwifanyiso, o thoma u nnyanetshela mafhungo a tshuwisaho a u tambudzwa, u vhulahwa na nḓila ye vha shavha ngayo. Ndo vha ndi tshi lila vhusiku musi ndi tshi humbula nga ha vhenevho vhana. Ndo vha ndi tshi ṱoḓa u vha vhudza nga ha fulufhelo ḽa Paradiso na mvuwo, fhedzi vho vha vha sa pfesesi luambo lwanga. Naho ndo vha ndi tshi kha ḓi vha mutukana muṱuku, ndo humbula nga ha u guda Lucambodia u itela uri ndi vhudze vhane nda dzhena navho tshikolo nga ha Yehova. Nga zwiṱuku nga zwiṱuku ndo zwi ṱhogomela uri dzenedzo phetho dzi ḓo kwama vhumatshelo hanga.

U guda Lucambodia zwo vha zwi tshi konḓa. Ndo dzhia phetho ya u laṱela thaula luvhili lwoṱhe, fhedzi Yehova o nṱuṱuwedza a tshi shumisa vhabebi vhanga. Nga u ya ha tshifhinga, vhadededzi vhanga na vhagudiswa nga nṋe vho thoma u nṱuṱuwedza uri ndi tovhole mishumo ine ya badela tshelede nnzhi. Fhedzi ndo vha ndi tshi ṱoḓa u vha muvulanḓila, nahone ndo khetha khoso dza tshikolo tsha nṱha dzine dza ḓo nthusa u wana mushumo wa u ḓitshidza wa tshifhinganyana uri ndi kone u swikelela tshipikwa tshanga. Musi tshikolo tshi tshi bva, ndo vha ndi tshi ṱangana na vhaṅwe vhavulanḓila nahone nda shuma navho vhuḓinḓani. Ndo dovha nda thusa u gudisa vhagudiswa vhe vha vha vha tshi khou guda Luisimane sa luambo lwavho lwa vhuvhili—phetho ye ya ita uri nga murahu ndi vhuyelwe vhukuma.

Musi ndi na miṅwaha ya 16, ndo pfa nga ha tshigwada tsha Lucambodia ngei Long Beach, California, kha ḽa U.S.A. Ndo dala henengei nahone nda guda u vhala Lucambodia. Nga u ṱavhanya, ndo ṱhaphudza pfunzo dzanga tshikoloni, nda vha muvulanḓila nahone nda bvela phanḓa ndi tshi huwelela kha vhathu vha Cambodia tsini na haya hanga. Musi ndi na miṅwaha ya 18, ndo vha ndi tshi vho humbula u pfulutshela Cambodia. Ho vha hu tshi kha ḓi vha fhethu hu re na khombo, fhedzi ndo vha ndi tshi zwi ḓivha uri ndi vhathu vha si gathi fhedzi kha vha milioni dza fumi vhane vha dzula Cambodia vhe vha pfa mafhungo maḓifha a Muvhuso. Nga tshenetsho tshifhinga, ho vha hu na tshivhidzo tshithihi tsha vhahuweleli vha 13 shangoni ḽoṱhe. Ndo ya nda dala Cambodia lwa u thoma ndi na miṅwaha ya 19. Nga murahu ha miṅwaha mivhili, ndo khetha u ya nda dzula henengei. Ndo wana mushumo wa u ḓitshidza wa tshifhinganyana musi ndi vhuḓinḓani, wa u ṱalutshedzela Luisimane. Nga u ya ha tshifhinga, ndo vhinga mufumakadzi we a vha e na zwipikwa zwi fanaho na zwanga. Ro ḓiphina nga u thusa vhathu vhanzhi vha ngei Cambodia uri vha ṋekedzele vhutshilo havho kha Mudzimu.

Yehova o nṋea zwine ‘mbilu yanga ya zwi tama.’ (Ps. 37:4) U ita vhafunziwa ndi mushumo u fushaho vhukuma u fhira yoṱhe. Miṅwahani ya 16 ye nda i fhedza ngei Cambodia, tshenetsho tshigwada tsha vhashumeli vha Yehova vha 13 tsho aluwa tsha vha zwivhidzo zwa 12 na zwigwada zwa 4 fhethu ho fhamba-fhambanaho!—Muanetsheli ndi Jason Blackwell.