1, 2. Vhashumeli vha Mudzimu vha ḓipfa hani kha ḽino shango, nahone vha na haya ha mufuda-ḓe?

 NAA ni ḓipfa no tsireledzea kha ḽino shango? Arali zwi songo ralo, na vhaṅwe vha ḓipfa nga nḓila i fanaho na yaṋu. Musi miṅwaha i tshi khou ḓi ya, vhoṱhe vhane vha funa Yehova zwa vhukuma vha ḓipfa vhe vhatsinda kha ḽino shango. Sa tsumbo, musi vhagwadameli vha Yehova vha fulufhedzeaho vha tshi dzula shangoni ḽa Kanana vho “ḓivhadza khagala uri vho vha vhe vhatsinda na vhadzulapo vha tshifhinganyana.”—Heb. 11:13.

² Nga hu fanaho, vhatevheli vha Kristo vho ḓodzwaho vhane ‘hayani havho ha vha ngei ṱaḓulu,’ vha ḓidzhia vhe vhatsinda na vhadzulapo vha tshifhinganyana kha ḽino shango. (Vha-Fil. 3:20; 1 Pet. 2:11) Vha “dziṅwe nngu” dza Kristo na vhone a “vha tshipiḓa tsha shango vhunga na [Yesu e] si tshipiḓa tsha shango.” (Yoh. 10:16; 17:16) Naho zwo ralo, vhathu vha Mudzimu vha na “haya.” Zwi re zwone ndi uri ri ḓiphina nga haya ha lufuno ho tsireledzeaho vhukuma, hune ra nga kona u hu vhona nga maṱo ashu a lutendo. Mushe o ṅwala a ri: “Murena, wo ḓi vha dzhavhelo ḽashu kha mirafho na mirafho.” * (Ps. 90:1) Yehova o sumbedza hani uri ndi “dzhavhelo ḽashu” kana haya hashu kha vhashumeli vhawe vha fulufhedzeaho zwifhingani zwa kale? O vha hani “dzhavhelo ḽashu” kha vhathu vhane vha vhidzwa nga dzina ḽawe ṋamusi? Nahone u ḓo zwi sumbedza hani u vha haya hashu ho tsireledzeaho hune ra ḓo dzula hone tshifhingani tshi ḓaho?

3. Ndi ifhio thero, tshifanyiso, na nḓila ine zwa fana ngayo zwi wanalaho kha Psalme ya 90:1?

³ Kha zwifanyiso zwinzhi zwi re Bivhilini, Psalme ya 90:1, i na thero, tshifanyiso, na nḓila ine zwa fana ngayo.  Thero ndi Yehova. Tshifanyiso ndi dzhavhelo kana haya ḽine ha dzulwa khaḽo. Hu na zwinzhi zwi fanaho vhukati ha Yehova na haya. Sa tsumbo, Yehova u tsireledza vhathu vhawe. Zwenezwi zwi sumbedza uri Yehova ndi ene lufuno. (1 Yoh. 4:8) U dovha a vha Mudzimu wa mulalo, u ita uri vhashumeli vhawe vha fulufhedzeaho vha dzule “ho khudaho.” (Ps. 4:8) Sa tsumbo, ṱhogomelani musi a tshi shumisana na vhasimulalushaka vha fulufhedzeaho u bva kha Abrahamu.

4, 5. Mudzimu o zwi sumbedza hani uri u haya ha vhukuma kha Abrahamu?

⁴ Ri nga tou humbulela nḓila ye Abrahamu we a vha a tshi vhidzwa Abramu a ḓipfa ngayo musi Yehova a tshi mu vhudza uri: “Ṱutshela shango ḽa haṋu na lushaka lwa haṋu . . . U ye shangoni ḽine nda ḓo U sumbedza.” Arali Abrahamu o vha a tshi timatima, u timatima honoho hu nga vha ho fhela musi Yehova a tshi ri: “Ndi ḓo U ita lushaka luhulu; ndi ḓo U fhaṱutshedza; dzina ḽau ḽi ḓo vha ḽihulu . . . Vhane vha U fhaṱutshedza, na Nṋe ndi ḓo vha fhaṱutshedza; vhane vha U sema, na Nṋe ndi ḓo vha sema.”—Gen. 12:1-3.

⁵ Nga maipfi eneo, Yehova o ita vhungoho ha uri a vhe haya ho tsireledzeaho kha Abrahamu na vhaḓuhulu vhawe. (Gen. 26:1-6) Yehova o ita zwoṱhe zwe a fulufhedzisa. Sa tsumbo, o thivhela Farao wa ngei Egipita na Khosi Abimeleke wa ngei Gerara kha u tzhipa Sara na u vhulaha Abrahamu. Yehova o dovha a tsireledza Isaka na Rebeka kha zwiitea zwi fanaho. (Gen. 12:14-20; 20:1-14; 26:6-11) Ri a vhala: “[Yehova] ho ngo vhuya a tenda muthu a tshi vha dina, a vhuya a rwa na dzikhosi a tshi lwela vhone. A ri vhaḓodzwa vhanga ni songo vha ita tshithu, vhaporofita vhanga ni songo vha levhela.”—Ps. 105:14, 15.

6. Isaka o vhudza Yakobo uri a ite mini, nahone Yakobo o ḓipfa nga nḓila-ḓe?

⁶ Vhaporofita vhenevho vho vha vha tshi katela na muḓuhulu wa Abrahamu, Yakobo. Musi tshifhinga tshi tshi swika tsha uri Yakobo a vhinge, khotsi awe Isaka o amba nae a ri: “U songo dzea musadzi wa vhana vha Vha-Kanana. Takuwa U ye hangei Mesopotamia, nḓuni ya Bethuele khotsi ya mme-au, U dzee musadzi wa hone, muṅwe wa vhananyana vha Labani.” (Gen. 28:1, 2) Yakobo o ita zwe a vhudzwa nga khotsi awe Isaka. Yakobo o ṱuwa e eṱhe, a sia muṱa wa hawe wo tsireledzeaho ngei Kanana, a tshimbila khilomithara dzi fhiraho ḓana a livha Harani. (Gen. 28:10) Khamusi o ḓivhudzisa uri: ‘Ndi ḓo fhedza tshifhinga tshingafhani? Naa malume anga vha ḓo nṱanganedza zwavhuḓi, vha nṋea mufumakadzi a ofhaho Mudzimu?’ Arali Yakobo o vha na mbilaelo dzo raloho, a zwi timatimisi uri mbilaelo dzawe dzo fhela musi a tshi swika Lusi, khilomithara dzi ṱoḓaho u vha 100 u bva Beresaba. Ho itea mini ngei Lusi?

7. Kha miloro ya Yakobo, Yehova o mu khwaṱhisa nga nḓila-ḓe?

 ⁷ Ngei Lusi, Yehova o bvelela muloroni wa Yakobo a tshi ri: “Zwino ndi ḓo vha na iwe; ndi ḓo U linda hoṱhe hune wa ya, nda ḓo vhuya nda U humisa wa ḓa shangoni héḽi; a thi nga U laṱedzi, ndi ḓo vuledza zwe nda U vhudza.” (Gen. 28:15) Maipfi eneo a fanela u vha o khwaṱhisa Yakobo na u mu khuthadza. Naa ni nga mu vhona nga iṱo ḽa muhumbulo, o ḓiimisela u vhona musi Mudzimu a tshi ḓadzisa zwe a zwi fulufhedzisa? Arali no sia haya haṋu, na ya u shuma fhethu hu re na ṱhoḓea kha ḽiṅwe shango, ni nga vha ni tshi pfesesa nḓila ye Yakobo a ḓipfa ngayo. A zwi timatimisi uri no vhona nḓila ye Yehova a ni ṱhogomela ngayo.

8, 9. Yehova o zwi sumbedza hani uri u haya ha vhukuma kha Yakobo, nahone ndi mini zwine ra zwi guda?

⁸ Musi Yakobo a tshi swika Harani, malume wawe Labani o mu ṱanganedza nga lufuno nahone nga murahu a mu ṋea Lea na Rahele uri vha vhe vhafumakadzi vhawe. Nga u ya ha tshifhinga, Labani o lingedza u fhura Yakobo, musi a tshi tshintsha muholo wawe lwo no swika fumi. (Gen. 31:41, 42) Naho zwo ralo, Yakobo o konḓelela u shayea ha khaṱulokwayo, e na fulufhelo ḽa uri Yehova u ḓo bvela phanḓa a tshi mu ṱhogomela—nahone Yehova o ita nga u ralo. Vhukuma, musi Mudzimu a tshi vhudza Yakobo uri a humele Kanana, onoyo musimulalushaka o vha o no vha ‘na thakha nnzhi, na vhalanda vha vhasidzana na vhatuka, na dzikamela na dzimbongola.’ (Gen. 30:43) Yakobo o livhuha zwihulu nahone a rabela a ri: “A tho ngo fanelwa nga vhuthu hau hoṱhe na u fulufhedzea hau hoṱhe, he wa tonda nṋe mulanda wau ngaho’; ngauri zwiḽa ndi tshi bva, ndo wela mulambo hoyu wa Yorodane ndó fara lubaḓa holu fhedzi; zwino ndo no vha magogo mavhili.”—Gen. 32:11.

⁹ Maipfi o ambiwaho nga Mushe o vha e ngoho musi a tshi: “Murena, wo ḓi vha dzhavhelo ḽashu kha mirafho na mirafho.” (Ps. 90:1) Maipfi eneo a kha ḓi shuma na ṋamusi, ngauri Yehova ha “shanduki u fana na mirunzi i sudzuluwaho,” u bvela phanḓa e haya ha vha fulufhedzeaho nahone ho tsireledzeaho. (Yak. 1:17) Kha ri ṱolisise uri u zwi ita nga nḓila-ḓe.

10. Ndi ngani ri tshi nga vha na vhungoho ha uri Yehova u bvela phanḓa a tshi vha haya ho tsireledzeaho kha vhashumeli vhawe?

¹⁰ Edzani u humbula ni tshi khou ṋea vhuṱanzi khothe vhu lwisanaho na tshigwada tsha vhatshinyi tsha shango ḽoṱhe. Murangaphanḓa wa hone ndi muthu o thanyaho vhukuma, wa maanḓa, o no zwifha na ane a vhulaha. Ni nga ḓipfa nga nḓila-ḓe musi ni tshi bvela nnḓa nga murahu ha khothe? Naa ni nga ḓipfa no tsireledzea? Na luthihi! Ndi ngoho uri no vha ni tshi nga vha na tshiitisi tshi pfalaho vhukuma tsha u humbela tsireledzo. Zwi fanaho na zwenezwo, riṋe sa vhashumeli vha Yehova, ri ṋea vhuṱanzi nga tshivhindi vhu lwisanaho na swina ḽa Yehova, Sathane. (Vhalani Nzumbululo 12:17.) Naa Sathane o kona u vala mulomo wa vhathu vha Mudzimu? Na khathihi! Zwi re zwone ndi uri, ri bvela phanḓa ri tshi aluwa muyani—ṱhalutshedzo ya zwenezwo ndi nthihi fhedzi: Yehova u kha ḓi vha dzhavhelo ḽashu, haya hashu ha vhukuma, zwihulu-hulu tshifhingani tsha zwino tsha vhufhelo. (Vhalani Yesaya 54:14, 17.) Naho zwo ralo, Yehova a nga si vhe haya hashu ho tsireledzeaho arali ri tshi tendela Sathane a tshi ri bvisa kha haya hashu.

11. Ri nga guda mini kha vhasimulalushaka?

¹¹ Kha ri dovhe hafhu ri gude zwiṅwe nga ha vhasimulalushaka. Naho vho vha vha tshi dzula shangoni ḽa Kanana, vho vha vho fhambana na vhathu vha shango ḽeneḽo, zwiṅwe hafhu vha tshi vhenga vhuvhi havho na nḓila ine vha ḓifara ngayo. (Gen. 27:46) Vho vha vha sa ṱoḓi mutevhe mulapfu wa mulayo u itela uri vha ḓivhe zwo lugaho na zwi songo  lugaho. Zwe vha vha vha tshi zwi ḓivha nga ha Yehova na nga pfaneleo dzawe zwo vha zwo vha lingana. Nga nṱhani ha uri Yehova o vha e haya havho, vho vha vha sa funi u ḓisendedza tsini na vhathu vha shango. Nṱhani hazwo, vho sendela kule na shango ḽivhi. Ndi tsumbo yavhuḓi lungafhani ine ra nga i edzisa! Naa ni lwela u edzisa vhasimulalushaka vha fulufhedzeaho, musi ni tshi nanga dzikhonani na u ḓimvumvusa? Zwi ṱungufhadzaho ndi uri vhaṅwe tshivhidzoni tsha Vhukriste vha sumbedza u vhofholowa nga maanḓa kha shango ḽivhi ḽa Sathane. Arali ni tshi ḓipfa nga yeneyo nḓila, rabelani Yehova u itela u humbela thuso. Humbulani uri heḽi ndi shango ḽa Sathane. Vhathu vhaḽo vha na tseḓa nahone a vha humbuleli vhaṅwe.—2 Vha-Kor. 4:4; Vha-Ef. 2:1, 2.

12. (a) Yehova u tsireledza hani vha nnḓu ya lutendo? (b) Ni ḓipfa hani nga dzenedzi ndugiselelo?

¹² U itela uri ri kone u lwa na zwikwekwe zwa Sathane, ri fanela u shumisa ndugiselelo dzoṱhe dze Yehova a dzi itela vha nnḓu ya lutendo, vhane vha mu dzhia sa haya havho. Dzenedzi ndugiselelo dzi katela miṱangano ya Vhukriste, vhurabeli ha muṱa na “zwifhiwa zwine zwa vha vhathu”—vhalisa vho nangwaho nga Mudzimu u itela uri vha ri khuthadze nahone vha ri tikedze samusi ro sedzana na khaedu dza vhutshilo. (Vha-Ef. 4:8-12) Wahashu George Gangas we a fhedza miṅwaha minzhi e muraḓo wa Tshigwada tshi Langaho o ṅwala uri: “Musi ndi vhukati ha [vhathu vha Mudzimu] ndi pfa u nga ndi hayani na vha muṱa wanga, paradisoni ya muya.” Naa na inwi ni ḓipfa nga yeneyo nḓila?

13. Ndi mulaedza ufhio une ra u wana kha Vha-Heberu 11:13?

¹³ Iṅwe pfaneleo ya vhasimulalushaka ine ra fanela u i edzisa ndi ya uri vho vha vho ḓiimisela u sa fana na vhathu vho vha tangaho. Samusi zwo bulwa kha  phara 1, vho “ḓivhadza khagala uri vho vha vhe vhatsinda na vhadzulapo vha tshifhinganyana.” (Vha-Heb. 11:13) Naa na inwi no ḓiimisela u fhambana na vhathu vho ni tangaho? Vhukuma, u ita ngauralo a zwo ngo leluwa tshifhinga tshoṱhe. Ri nga zwi kona nga thuso ine ra i wana kha Mudzimu na thikhedzo ine ra i wana kha vhahashu vha Vhakriste. Humbulani, a ni noṱhe. Vhoṱhe vhane vha ṱoḓa u shumela Yehova vho sedzana na nndwa! (Vha-Ef. 6:12) Naho zwo ralo, ndi nndwa ine ra nga i kunda arali ri tshi fulufhela Yehova nahone ra mu ita haya hashu.

14. Vhashumeli vha Yehova vho lindela “muḓi” ufhio?

¹⁴ Zwiṅwe zwa ndeme ndi hezwi: Edzisani Abrahamu nga u vhea maṱo aṋu kha dzanga. (2 Vha-Kor. 4:18) Muapostola Paulo o ṅwala uri, Abrahamu “o vha o lindela muḓi u re na mutheo wa vhukuma, une muoli na mufhaṱi wao a vha Mudzimu.” (Heb. 11:10) “Muḓi”  wonoyo wo vha u Muvhuso wa Messia. Abrahamu o vha o lindela wonoyo “muḓi.” Rine a ro ngo fanela u u lindela. U khou vhusa zwino ngei ṱaḓulu. Vhuṅwe vhuṱanzi ndi ha uri, hu si kale, u ḓo vhusa shango ḽoṱhe nga ho fhelelaho. Naa wonoyo Muvhuso ndi wa vhukuma kha inwi? Naa u kwama mavhonele aṋu vhutshiloni, nḓila ine na dzhia ngayo shango ḽine ra tshila khaḽo, na zwithu zwine zwa ḓa u thoma vhutshiloni haṋu?—Vhalani 2 Petro 3:11, 12.

15. Vhathu vhe vha vhea fulufhela ḽavho kha ḽino shango, vho lindelwa nga mini?

¹⁵ Samusi shango ḽa Sathane ḽi tsini na u fheliswa, “maṱungu” a ḓo vha manzhi. (Matthew 24:7, 8) Zwithu zwi ḓo vhifha vhukuma tshifhingani tsha maṱungu mahulu. Zwithu zwe vhathu vha fulufhela khazwo zwi ḓo wa nahone vhathu ḓo vha na nyofho nga vhutshilo havho. (Hab. 3:16, 17) Vha ḓo lingedza u ḓitshidza “vha dzumbama mabakoni na nngwani dza dzithavha.” (Nzumb. 6:15-17) Fhedzi a hu na bako ḽa vhukuma, mabindu mahulwane, kana madzangano a zwa politiki zwine vha nga kona u ḓitsireledza ngazwo.

16. Ri fanela u sedza hani tshivhidzo tsha Vhukriste, nahone ndi ngani?

¹⁶ Vhathu vha Yehova vha ḓo bvela phanḓa vha tshi takalela tsireledzo ya Yehova Mudzimu a re ‘dzhavhelo ḽavho.’ U fana na muporofita Habakuku, vha ḓo ‘takalela Yehova, vha pembelela Mudzimu Mulamuleli wavho.’ (Hab. 3:18) Yehova u ḓo sumbedza hani u vha haya ha vhukuma tshifhingani tshi konḓaho? Ri fanela u zwi lindela, u itela uri ri kone u zwi vhona. Fhedzi khezwi zwine ra nga vha na vhungoho nazwo: U fana na Vhaisiraele tshifhingani tsha u pfuluwa, “gogo ḽihulu” ḽi ḓo vha ḽo dzudzanyeaho, nahone ḽi ḓo wana ndaela i bvaho kha Mudzimu. (Nzumb. 7:9; vhalani Ekisodo 13:18) Yeneyo ndaela i ḓo swika nga ndugiselelo ya lwa ṱaḓulu, khamusi nga nzudzanyo ya tshivhidzo. I ngoho, zwivhidzo zwinzhi shangoni ḽoṱhe zwi vhonala zwo tsireledzea ‘pfamoni’ samusi zwo dzula zwo ambiwa kha Yesaya 26:20. (Vhalani) Naa ni dzhiela nṱha miṱangano ya tshivhidzo? Naa tshifhinga tshoṱhe ni ita zwine Yehova a zwi amba a tshi shumisa ndugiselelo ya tshivhidzo?—Vha-Heb. 13:17.

17. Yehova ndi haya hashu hani, u katela na kha vhathu vho faho vha tshi fulufhedzea?

¹⁷ Naho hu na vhane vha nga fa vha tshi fulufhedzea musi hu sa athu u thoma maṱungu mahulu, vha ḓo dzula vho tsireledzea kha Yehova, haya havho. Nga nḓila-ḓe? Nga murahu ha musi ho no fhira tshifhinga tshilapfu vhasimulalushaka vha fulufhedzeaho vho no fa, Yehova o ri kha Mushe: “Ndi Nṋe Mudzimu wa . . . Abrahamu, Mudzimu wa Isaka, Mudzimu wa Yakobo.” (Ek. 3:6) Nga murahu ha musi o no redza enea maipfi, Yesu o bvela phanḓa a ri: “A si Mudzimu wa vho faho, fhedzi ndi wa vha tshilaho, ngauri khae vhoṱhe vha khou tshila.” (Luka 20:38) Ee, kha Yehova, vhathu vhe vha fa vha tshi fulufhedzea khae, vha fana na vha tshilaho khae; hu na vhuṱanzi ha uri vha ḓo vuswa.—Muh. 7:1.

18. Shangoni ḽiswa, Yehova u ḓo vha hani “dzhavhelo” ḽa vhathu vhawe nga nḓila yo khetheaho?

¹⁸ Shangoni ḽiswa ḽine ḽa khou ḓa, Yehova u ḓo vha “dzhavhelo” ḽa vhathu vhawe nga nḓila yo khetheaho. Nzumbululo 21:3 i ri: “Asiyo! Nnḓu ya mulanga ya Mudzimu vhukati ha vhathu, huno u ḓo dzula navho.” Yehova u ḓo dzula na vhathu vhawe shangoni a tshi shumisa Kristo Yesu muimeleli wawe. Musi hu tshi fhela miṅwaha ya tshigidi, Yesu u ḓo humisela Muvhuso kha Khotsi awe, u ḓo vha o no khunyeledza ndivho yoṱhe ya Mudzimu kha ḽifhasi. (1 Vha-Kor. 15:28) Nga murahu, vhathu vho fhelelaho vha ḓo vha vha si tsha ṱoḓa Yesu sa muambeli wavho; Yehova u ḓo vha e navho. Ro lavhelelwa vhumatshelo havhuḓi vhukuma! Zwa zwino, kha ri lwele u edzisa vhathu vha tshifhingani tsha kale vha fulufhedzeaho nga u ita Yehova “dzhavhelo ḽashu.”