Ri Nga Sumbedza Hani Uri Ri Funa Vhaṅwe?
Roṱhe ri muṱa muthihi ngauri roṱhe ri bva kha Adamu. Naho vhathu muṱani vha tshi tea u funana na u ṱhonifhana, ano maḓuvha a vha tsha zwi ita. Vha ita zwo fhambanaho na zwine Mudzimu a ṱoḓa vha tshi zwi ita.
MAṄWALO MAKHETHWA A RI:
“U tea u funa muṅwe muthu vhunga u tshi ḓifuna.”—LEVITIKO 19:18.
“Ni dzule ni tshi funa maswina aṋu.”—MATEO 5:44.
ZWI AMBA MINI U FUNA VHAṄWE?
Kha 1 Vhakorinta 13:4-7, Mudzimu o ṱalusa lufuno nga nḓila i tevhelaho:
“Lufuno a lu fheli mbilu, lu na vhuthu.”
Ḓivhudziseni: Naa a ni takali musi vhaṅwe vha sa ni fheleli mbilu nahone vha tshi ni sumbedza vhuthu naho no khakha?
“Lufuno a lu na vivho.”
Ḓivhudziseni: Naa a zwi ni vhaisi musi vhaṅwe vha tshi ni humbulela zwithu zwi si zwavhuḓi nahone vha tshi ni itela vivho?
Lufuno “a lu ḓiṱoḓeli zwalwo.”
Ḓivhudziseni: Naa a ni takali musi vhaṅwe vha tshi thetshelesa zwine na zwi amba, vha sa ṱoḓi uri hu itwe zwavho fhedzi?
Lufuno “a lu vhaleli vhukhakhi.”
Humbulani: Mudzimu o ḓiimisela u hangwela vhaitazwivhi vhane vha rembuluwa. Maṅwalo Makhethwa a ri: “[Mudzimu] ha nga dzuleli u ṱoḓa vhukhakhi, kana u dzula o sinyuwa.” (Phisalema 103:9) Roṱhe ri a zwi funa u hangwelwa musi ro khakha. Nga zwenezwo, ri tea u hangwela vhaṅwe musi vho ri khakhela.—Phisalema 86:5.
Lufuno “a lu takaleli zwi songo lugaho.”
Humbulani: A ri ṱoḓi vhaṅwe vha tshi takala musi ro welwa nga khombo. Nga zwenezwo, a ri takali musi vhaṅwe vha tshi ṱangana na vhuimo vhu konḓaho, naho vha songo ri fara zwavhuḓi.
Ri tea u funa vhaṅwe nga yeneyi nḓila hu sa londwi miṅwaha yavho, zwine vha tenda khazwo na hune vha bva hone. Iṅwe nḓila ine ra nga vha sumbedza ngayo uri ri a vha funa ndi nga u vha thusa musi vha tshi ṱoḓa thuso.
