Naa no no vhuya na humbula nga ha u vhala Bivhili, fhedzi na litsha nga nṱhani ha zwiitisi zwi fanaho na zwo bulwaho afho nṱha? Vhathu vhanzhi vha vhona u nga u vhala Bivhili ndi muhwalo. Fhedzi hu pfi mini arali no guda uri Bivhili i nga ni thusa uri ni tshile vhutshilo vhu takadzaho na vhu fushaho? Nahone hu pfi mini arali na nga wana uri hu na dziṅwe nḓila dza u i vhala dzine dza nga ita uri i takadze? Naa ni nga takalela u ḓivha zwe Bivhili ya ni farela zwone?

Ṱhogomelani zwithu zwi si gathi zwe vhaṅwe vha amba uri vho wana zwi tshi vhuyedza musi vha tshi thoma u vhala Bivhili.

Ezekiel ane a vha miṅwahani ya vhu-20, o ri: “Tshifhingani tsho fhiraho, ndo vha ndi tshi tou nga muthu ane a khou reila goloi a sa ḓivhi hune a khou ya hone. Fhedzi u vhala Bivhili zwo nthusa uri ndi tshile vhutshilo vhu re na ndivho. I na nyeletshedzo dzi shumaho dzine nda nga dzi shumisa ḓuvha ḽiṅwe na ḽiṅwe.”

Frieda ane na ene a vha miṅwahani ya vhu-20, o ri: “Ndo vha ndi na khani. Fhedzi u vhala Bivhili zwo nthusa uri ndi kone u ḓilanga. Zwenezwi zwo ita uri zwi lelutshele vhathu u konana na nṋe nahone zwino ndi na khonani nnzhi.”

Eunice a re miṅwahani ya vhu-50, o ri “Bivhili i nthusa uri ndi vhe muthu wa khwine, na uri ndi shandule nḓowelo yanga i si yavhuḓi.”

Samusi vhenevho vhathu na vhaṅwe vhanzhi vho thuswa nge vha vhala Bivhili, u vhala Bivhili zwi nga ni thusa u tshila vhutshilo vhu takadzaho. (Yesaya 48:17, 18) Zwiṅwe hafhu, i nga ni thusa (1) u dzhia phetho dzavhuḓi, (2) u vha na khonani dza vhukuma, (3) u konḓelela mutsiko, na (4) u guda ngoho nga ha Mudzimu. Nyeletshedzo i re Bivhilini i bva ha Mudzimu, nga zwenezwo, i nga si vhuye ya ni xedza arali na i tevhela. Mudzimu ha vhuyi a ṋea nyeletshedzo dzi si dzavhuḓi.

Ndi zwa ndeme uri ni thome u i vhala. Ndi mini zwine zwa nga ni thusa uri zwi ni lelutshele u thoma u vhala Bivhili na u ita uri i takadze?