Evangeli Ya Marko 2:1-28
2 Nga murahu ha maḓuvhanyana a vhuyelela Kapernaume, zwa pfala uri u hayani.+
2 Ha kuvhangana vhathu vhanzhi, ha ḓala u swika muṋangoni, a thoma u vha vhudza mafhungo maḓifha.+
3 Vha mu ḓisela munna o omaho lurumbu o hwalwa nga vhanna vhaṋa.+
4 Nge vha vha vha sa koni u mu isa he Yesu a vha e hone ngauri ho vha ho ḓala, vha phula buli kha ṱhanga u livhana na he Yesu a vha e hone, vha tsitsa munna o omaho lurumbu o eḓela kha vhulalo.
5 Musi Yesu a tshi vhona uri vha na lutendo,+ a amba na onoyo munna a ri: “Ṅwananga, wo hangwelwa zwivhi.”+
6 Vhaṅwe vhamaṅwalo vho dzulaho henefho, vha elekanya vha ri:+
7 “Ndi ngani uyu munna a tshi amba nga u rali? U khou sema Mudzimu. Ndi Mudzimu fhedzi ane a hangwela zwivhi.”+
8 Nge Yesu a vha a tshi ḓivha zwe vha vha vha tshi khou humbula zwone, a amba navho a ri: “Ndi ngani ni tshi khou humbula zwithu zwo raliho?+
9 Ndi zwifhio zwo leluwaho, naa ndi u vhudza uyu munna uri, ‘Wo hangwelwa zwivhi,’ kana ndi uri, ‘Takuwa u hwale vhulalo hau u tshimbile’?
10 Fhedzi uri ni ḓivhe uri Murwa muthu+ u na maanḓa a u hangwela zwivhi kha ḽifhasi—”+ a amba na o onoyo munna a ri:
11 “Ndi a u vhudza uri, takuwa u hwale vhulalo hau, u ye hayani.”
12 Nga zwenezwo, a takuwa nga u ṱavhanya a hwala vhulalo hawe, a tshimbila vhoṱhe vha tshi zwi vhona. Vhoṱhe vha mangala, vha renda Mudzimu vha ri: “A ri athu u vhuya ra vhona zwithu zwi fanaho na hezwi.”+
13 Yesu a dovha a ya tsini na lwanzhe, gogo ḽoṱhe ḽa mu tevhela, a thoma u ḽi funza.
14 Musi a tshi khou tshimbila, a vhona Levi murwa wa Alifeo o dzula ofisini ya vhathelisi, a amba nae a ri: “Ntevhele.” A takuwa a mu tevhela.+
15 Musi o dzula nḓuni ya Levi vha tshi khou ḽa, ha ḓa vhathelisi vhanzhi na vhaitazwivhi vha ḽa na Yesu na vhafunziwa vhawe, vhanzhi vha mu tevhela.+
16 Fhedzi musi vhamaṅwalo vha Vhafarisei vha tshi vhona uri u khou ḽa na vhaitazwivhi na vhathelisi, vha amba na vhafunziwa vhawe vha ri: “Ndi ngani a tshi ḽa na vhathelisi na vhaitazwivhi?”
17 Musi Yesu a tshi pfa zwenezwo, a ri: “Vhathu vha sa lwaliho a vha ṱoḓi dokotela, fhedzi u ṱoḓwa nga vha lwalaho. Ndo ḓela u vhidza vhaitazwivhi, hu si vho lugaho.”+
18 Vhafunziwa vha Yohane na Vhafarisei vho vha vha tshi ḓidzima zwiḽiwa. Ngauralo, vha ḓa vha amba nae vha ri: “Ndi ngani vhafunziwa vha Yohane na vhafunziwa vha Vhafarisei vha tshi ḓidzima zwiḽiwa, ngeno vhafunziwa vhau vha sa ḓidzimi?”+
19 Yesu a amba navho a ri: “Naa khonani dza mukwasha+ dzi na tshiitisi tsha u ḓidzima zwiḽiwa a tshi kha ḓi vha navho? Vha nga si ḓidzime arali vha tshi kha ḓi vha nae.
20 Hu khou ḓa maḓuvha ane vha ḓo dzhielwa mukwasha,+ ndi hone vha tshi ḓo ḓidzima nga ḽeneḽo ḓuvha.
21 A hu na ane a nga rungelela labi ḽiswa kha tshiambaro tsha kale. Arali a ita zwenezwo, labi ḽiswa ḽo khwaṱhaho ḽi nga kokodza ḽa kale zwa ita uri buli ḽi engedzee.+
22 Zwiṅwe hafhu, a hu na ane a nga shela waini ntswa kha zwikumbu zwa kale zwa mukumba.* Arali a ita zwenezwo, zwi ḓo phamuwa waini ya tevhuwa. Fhedzi waini ntswa i shelwa kha zwikumbu zwiswa.”
23 Musi Yesu a tshi khou fhira nga masimuni a goroi nga Savhatha, vhafunziwa vhawe vha tshimbila vha tshi ṱhukhula thoro dza goroi.+
24 Vhafarisei vha ri: “Ndi ngani vhafunziwa vhau vha tshi khou ita zwithu zwi songo tendelwaho nga Savhatha?”
25 Yesu a ri: “Naa a ni athu u vhala zwe Davida na vhanna vhe a vha e navho vha zwi ita musi vho farwa nga nḓala?+
26 Musi a tshi dzhena nḓuni ya Mudzimu, misini ya Abiathara+ muhulwane wa vhotshifhe, a ḽa vhurotho ho ṋekedzwaho Mudzimu,* he ene na vhanna vhe a vha e navho vha vha vha songo tendelwa u vhu ḽa, vhu tshi tea u ḽiwa nga vhotshifhe fhedzi.”+
27 A amba navho a ri: “Savhatha yo itelwa muthu,+ a si muthu o itelwaho Savhatha.
28 Murwa muthu u dovha a vha Murena wa Savhatha.”+
Ṱhaluso dzi re magumoni a siaṱari
^ Sedzani “Zwikumbu zwa mukumba” kha Mutevhe Wa Ṱhalutshedzo Ya Maipfi.
^ Kana “vhurotho ho ṱaniwaho.”
