Hai, Ṱhanzi dza Yehova a si tshigwada tsha vhurereli vhu songo ḓoweleaho. Nṱhani hazwo, ri Vhakriste vhane vha ita zwi re maanḓani ashu u itela u tevhela tsumbo yo vhewaho nga Yesu Kristo nahone ri tshila u tendelana na pfunzo dzawe.

 Vhathu vha na mavhonele a sa fani nga ha maipfi ane a ri “tshigwada tsha vhurereli vhu songo ḓoweleaho.” Naho zwo ralo, ṱhogomelani mahumbulele mavhili o ḓoweleaho ane vhathu vha vha naho nga ha eneo maipfi na zwine zwa ita uri eneo mahumbulele a sa shume kha riṋe.

•   Vhaṅwe vha humbula uri maipfi ane a ri tshigwada tsha vhurereli vhu songo ḓoweleaho a amba vhurereli vhuswa kana vhune ha mangadza. Ṱhanzi dza Yehova a vho ngo tumbula vhurereli vhuswa. Nṱhani hazwo, kha vhurereli hashu ri tevhela maitele a Vhakriste vha ḓanani ḽa u thoma ḽa miṅwaha, vhe tsumbo na pfunzo dzavho zwa ṅwalwa Bivhilini. (2 Timotheo 3:​16, 17) Ri tenda uri Maṅwalo Makhethwa a tea u vha ambadzifhele kha mafhungo a vhurabeli.

•   Vhaṅwe vha humbula uri tshigwada tsha vhurereli vhu songo ḓoweleaho ndi tshigwada tshi re na khombo, tshine tsha vha na murangaphanḓa. Ṱhanzi dza Yehova a vha lavheleli u rangwa phanḓa nga muthu. Nṱhani hazwo, ri tevhela tshilinganyo tshe Yesu a tshi vhetshela vhatevheli vhawe musi a tshi ri: “Murangaphanḓa waṋu ndi muthihi, ndi Kristo.”​—Mateo 23:10.

 Ṱhanzi dza Yehova a si tshigwada tshi songo ḓoweleaho tsha vhurereli tshi re na khombo, fhedzi vha vhuyedza miraḓo yavho na vhaṅwe kha tshitshavha. Sa tsumbo, vhuḓinḓa hashu ho thusa vhathu vhanzhi uri vha kunde madzema manzhi a re khombo, a ngaho u shumisa luvhi zwidzidzivhadzi na halwa. Zwiṅwe hafhu, ri na kilasi dze dza funza vhathu vhanzhi shangoni ḽoṱhe u vhala na u ṅwala. Ri ṱanganela nga u fhisea kha u thusa musi wa khombo. Ri a shuma nga maanḓa u itela uri ri kwame vhathu nga nḓila yavhuḓi, samusi Yesu o laedza vhatevheli vhawe uri vha ite nga u ralo.​—Mateo 5:​13-​16.