Sa Ṱhanzi dza Yehova, ri takalela u haseledza nga ha zwine ra zwi tenda na vhathu vha vhurereli ho fhamba-fhambanaho, fhedzi a ri ḓivanganyi na vhuṅwe vhurereli nga muhumbulo wa uri a ri ṱoḓi u gwadamela na vhane vha tenda zwithu zwo fhamba-fhambanaho na zwine ra zwi tenda. Bivhili i sumbedza uri Vhakriste vha ngoho vha na “vhuthihi” nahone zwine zwa ita uri vha vhe na honoho vhuthihi ndi uri vha tenda zwithihi. (Vhaefesa 4:16; 1 Vhakorinta 1:10; Vhafilipi 2:2) Zwenezwi zwi katela zwi fhiraho u sokou tendelana kha uri lufuno, u pfela vhuṱungu na u hangwela ndi zwa ndeme. Zwine ra zwi tenda zwo thewa kha mafhungo ngoho a Bivhili, ane arali ri si nao lutendo lwashu lu nga vha mahandana.​—Vharoma 10:2, 3.

 Bivhili i fanyisa u ḓivanganya na vhathu vha vhuṅwe vhurereli sa u ḓikungela dzhogo i fanaho navho, zwine zwa nga tshinya lutendo lwa Mukriste. (2 Vhakorinta 6:14-17) Nga zwenezwo, Yesu ho ngo tendela vhafunziwa vhawe vha tshi vangana na vhuṅwe vhurereli. (Mateo 12:30; Yohane 14:6) Nga hu fanaho, Mulayo we Mudzimu a u ṋea Vhaisiraele vha kale a tshi shumisa Mushe wo vha u tshi thivhela u vangana na vhurereli ha dziṅwe tshakha. (Ekisodo 34:11-14) Nga murahu, Vhaisiraele vha fulufhedzeaho vho hana thuso ye ya vha i tshi ḓo ita uri hu vhe na vhuḽedzani na vhathu vha vhurereli vhu sa fani na havho.​—Esera 4:1-3.

 Ee. Ngoho ndi ya uri, nga 2022 ro fhedza awara dza 1 501 797 703 ri tshi khou ambedzana na vhathu vha vhuṅwe vhurereli. U fana na muapostola Paulo, musi ri vhuḓinḓani ri ṱoḓa u pfesesa mahumbulele na thendo dza “vhathu vhanzhi nga hune zwa nga konadzea ngaho.” (1 Vhakorinta 9:19-22) Musi ri tshi amba navho, ri a lingedza u tevhela nyeletshedzo ya Bivhili ya u sumbedza muthu muṅwe na muṅwe “ṱhonifho yo dzikaho.”​—1 Petro 3:15.