Kelajagingiz o‘z qo‘lingizda
Qariyb 3 500-yil oldin Tangri Yahova O‘z xizmatchilariga porloq kelajakka erishish uchun nima qilish kerakligi borasida shunday degan: «Sizlarga hayotni va o‘limni, baraka va la’natni taklif qilyapman. O‘zlaringiz ham, avlodlaringiz ham yashashi uchun, hayotni tanlanglar». (Qonunlar 30:19)
Kelajagi porloq bo‘lishi uchun o‘sha odamlar to‘g‘ri tanlov qilishlari kerak edi. Bugungi kunda bizda ham shunday tanlov bor. Muqaddas Kitobda porloq kelajakka erishish uchun nima qilishimiz lozimligi quyidagicha tushuntirilgan: «Allohingiz Yahovani sevib, Unga quloq solinglar». (Qonunlar 30:20)
QAY YO‘SIN YAHOVANI SEVISHIMIZ VA UNGA QULOQ SOLISHIMIZ MUMKIN?
MUQADDAS KITOBDAN BILIM OLING. Xudoga bo‘lgan sevgini rivojlantirish uchun, avvalambor, Muqaddas Kitobdan U haqda bilim olishingiz lozim. Shunday qilganingiz sayin, U mehribon Xudo ekanini va sizga eng yaxshisini tilashini bilib olasiz. Qolaversa, U sizga «g‘amxo‘rlik qilishni» istaydi. (1 Butrus 5:7) Shuning uchun sizni Unga ibodatda murojaat qilishga undayapti. Muqaddas Kitobda aytilishicha, Xudoga yaqinlashishga harakat qilsangiz, U ham sizga yaqinlashadi. (Yoqub 4:8)
BILIB OLGANLARINGIZNI AMALDA QO‘LLANG. Xudoga quloq solish Uning Muqaddas Kitobdagi dono yo‘l-yo‘riqlariga amal qilishni anglatadi. Ularga rioya qilganingiz sayin, «donolik bilan yo‘l tutib muvaffaqiyatga erishasiz». (Yoshua 1:8)