Olombiali kolonepa viosi violuali, via kisika oku liamuha la vakuetu kuenda ka va ecelela okuti, omanu va liongolola pamosi. Olombangi Via Yehova via nõlapo oku kapako olonumbi viaco, pole, viamamako lefendelo liavo. Oco ci lingiwe, akongelo va siata oku talavaya lo videoconferencia ndeci vo Zoom, oco va linge olohongele.

 Oco tu kuate olohongele vietu olonjanja viosi, Osungu Yolombangi Via Yehova via sokiya olombongo vioku landa o Zoom, loku vi eca kakongelo. Eci ca siata oku kuatisa akongelo amue ka a kuete olombongo vioku feta o videoconferencia okuti, ondando yaco $15-$20 ale ci pitahãla. Akongelo aco a enda oku talavaya lo videoconferencia yocali okuti, yecelela lika etendelo litito liomanu kuenda ka ya kolelepo. Akongelo osi a talavaya lo Zoom, a siata oku kuatisiwa calua kuenda yecelela okuti, omanu valua va iñila kolohongele viosi. Toke cilo, ci pitahãla 65,000 kakongelo kueci ci pitahãla 170 kolofeka, a kasi oku talavaya lo Zoom.

 Ekongelo Kairagi ko Manado, Konano yo Sulavesi ko Indonesia, lia liwekapo oku talavaya lo videoconferencia yocali, cilo va kasi oku talavaya lo Zoom yocisoko. Manji Hadi Santoso wa popia hati: “Ndaño vamanji vamue ka va tẽla oku talavaya lovimãleho vio internet, cilo va sole olohongele viekongelo, momo ka va sukila vali oku iñila olonjanja vialua vokuenda kuohongele.”

 Lester Jijón, Jr., ukulu umue wekongelo Guayacanes Oeste ko Guaiaquil, Ekuador wa popia hati: “Omo liekambo liolombongo vofeka, vamanji valua ka va tẽlele oku feta o Zoom oco ekongelo liosi li kale kohongele. Cilo omo liocisoko, tu kuete o Zoom yecelela etendelo lialua liomanu oku kala kolohongele.”

 Johnson Mwanza ukulu umue wekongelo Konano yo Ngwerere ko Lusaka, Zambia, wa soneha hati: “Vamanji valua va siata oku popia hati, ‘eliangiliyo lio Zoom yocisoko, lia tu kuatisa oku pamisa ukamba wetu la vamanji kuenda oku limbuka okuti tu soliwe kuenda Yehova o tu tata.’”

 Eliangiliyo liaco, lia lingiwa lolombongo vioku kuatisa omanu va lipita lovilunga. Olombongo viaco via siata oku tunda kolombanjaile vi eciwa koku kuatisa kupange u lingiwa voluali luosi. Olombanjaile viaco via siata oku eciwa vonepa donate.isa4310.com. tu eca olopandu omo liolombanjaile viene viohenda, vina vi kuatisavo kovilunga vikuavo via siata voluali.—2 Va Korindo 8:14.