Kosãi Yelombo 2020, oco Ocisoko Cuhayele Voluali ca tukula uvei wo COVID-19 okuti, efengi. Omanu valua ka va lavokaile okuti, epuka liaco lia ponduile oku li sanduila voluali luosi ci pitahãla unyamo umosi. Omanu valua oku kongelamo Olombangi Via Yehova, va siata oku tala ohali, oku liyaka lesumuo kuenda lekambo liolombongo lia kokiwa lefengi liaco. Olombangi Via Yehova via siata oku eca ndati ekuatiso vokuenda kuovitangi viaco?

 Lonumbi Yocimunga Casongui Cosungu Yolombangi Via Yehova, kua tumbikiwa eci ci pitahãla 950 Kovisoko Vieca Ekuatiso (DRC) voluali luosi, oco va kuatise kuvei wo COVID-19. Olonjanja vimue, Olombangi Via Yehova via kuatisiwa locisoko caco, olonjanja vikuavo via kuatisiwa lombiali. Vamanji va panga onepa kocisoko caco co DRC, va siata oku likolisilako oku linga esokiyo lioku eca ekuatiso kolonepa vialua.

 Kũlĩhĩsa ulandu wa pita ko Paraguai. Ukanda umue wasapulo wa lombolola okuti, omo liekambo liolombongo lia kokiwa lefengi, “omanu valua vo ko Paraguai,va kasi oku liyaka lonjala kolonjo viavo.” Ocisoko Ceca Ekuatiso ko Paraguai, ca fetikile ale oku eca olonjeke muli okulia ku pondola oku liwa volosemana vivali, ovina vioku yelisa levi omunu lomunu a liyelisa lavio, vepata muli omanu vakuãla. Ovina via kala vonjeke lonjeke, via kuata ondando yi tẽla 30 kolondolale (okuti 19.260 kolokuanja).

 Vamanji va tiamẽla kocisoko caco va siata oku liteyuila ndati kuenda vakuavo oco ka va ka kuatiwe lo COVID-19? Ovo va siata oku wala olombindi kuenda oku li sila ocinãla ca suapo lomunu ukuavo. Ovo va kũlĩhĩsa nda omanu va talavaya volovenda vi nena okulia va pongiyila ovina viaco povitumãlo via yela kuenda va kapako lutate ovihandeleko vioku liteyuila. Mua kongelavo oku kũlĩhĩsa okuti, vosi vana va kuata kovikulia viaco, va kisikiwa oku wala ovimalẽho vioku liteyuila, oku puenya loku nyanya ovihemba vi ponda ovipuka vakãlu aco kuenda oku kapa ovikulia viaco povitumãlo pa nyanyiwa ovihemba vi ponda ovipuka. Kuenje vana va eca ovikulia, va kala ocinãla la vamanji va tambula ovikulia viaco.

 Kosãi ya Susu 2021, Ocimunga Casongui ca tava oku talavaya leci ci pitahãla 25 kolohulukãi violondolale oco vi kuatise kuvei wo COVID-19. Olofiliale, Lovisoko Vieca Ekuatiso, va talavaya lutate lolombanjaile viaco kuenda va linga cosi oco va kuate ondando yiwa yovina vi sukiliwa. Ndeci kofeka yo Chile, vamanji va panga onepa Kocisoko Ceca Ekuatiso va yonguile oku landa 750 kolokilu (1.653 lb) yalendilia. Pole, ondando yalendilia ya livokiyile calua vokuenda kuosãi yimosi! Vamanji noke liolowola vivali poku likuminya oku landa alendilia londando ya tĩla, omunu wa kala oku a landisa wa sapuila vamanji hati, omunu ukuavo wa yonguile oku landavo alendilia, wa litiukamo. Kuenje ukuamĩlu wa sapuila vamanji hati, ka landisa vali londando yina ya tĩla ovo nda va landa, alendilia ana a tiuwiyiwa, wa a landisa ku vamanjetu londando yosãi ya pita!

 Pole, eci vamanji va endele oku kopa alendilia aco, ukuamĩlu wa seteka oku litiukamo poku va lundila okuti ovo va kala oku eca ovikulia lekambo liesunga ndeci ovisoko vikuavo via lingile. Noke liohutililo yimue yonjanga yo vutima, umue pokati ka vamanjetu, wa sapuila ukuamĩlu hati, va kũlĩhĩsile ale vekongelo lekongelo omanu va sukila ekuatiso. Vamanji va lombololavo okuti omo lietepiso liovituwa viapata, konjeke lonjeke yekuatiso, va sukilile oku kapako olonduko lovikulia via kuatele vali esilivilo oco apata va vi tambule. Oku sulako, ovo va sapuila ukuamĩlu hati, olombanjaile viosi violombongo kuenda ovopange a lingiwa Lolombangi Via Yehova, vi lingiwa ocali. Ukuamĩlu wa komõha calua. Eye ka tepuluile lika ondando yaco, wa vokiyakovo ndombanjaile yaye ci soka 400 kilokilu (882 lb) yalendilia eci vamanji va ka landako vali.

 Manji umue wa kuka okuti ocimbumba wo ko Liberia, o tukuiwa hati Lusu, o kasi vepata muli omanu vatãlo. Eteke limue komẽle, osimbu va kala oku lia ongau loku konomuisa ocisonehua ceteke, onekulu ya Lusu yi kuete epanduvali kanyamo, ya limbuka okuti, ka va kuatele vali okulia vonjo. Eye wa pula hati: “Tu lia nye?” Lusu wo kolisa poku u sapuila hati, wa likutilila ale oku pinga ekuatiso kuenda wa kolelele okuti Yehova wa laikele oku linga esokiyo limue. Keteke liaco kekumbi, akulu vekongelo va telefonalela Lusu oco a kope okulia kuekuatiso. Eye o lombolola hati: “Onekulu yange ya popia hati, kaliye nda kũlĩha okuti Yehova o yeva loku tambulula olohutililo omo a tambulula olohutililo viange.”

 Ukãi umue wo ko Republika Demokratika yo Kongu, o kasi ocipepi lepata limue Liolombangi Via Yehova. Ukãi waco noke yoku mola epata Liolombangi Via Yehova oku tambula okulia ku vamanji, wa popia hati: “Eci efengi li pua, tu kalavo Olombangi Via Yehova omo okuti ovo va kapako vamanjavo vokuenda kuotembo yilo yovitangi.” Ulume waye wo pula hati: “O kala Ombangi ya Yehova omo lionjeke yimosi yoluoso?” Ukãi wa tambulula hati: “Ocili okuti sio, pole, onjeke yaco yoluoso, ya eca uvangi wocisola cocili.”

 Olombangi Via Yehova via tẽla oku kuatisa lonjanga vamanji vana va sukilile ekuatiso vokuenda kuefengi omo liolombanjaile viavo via eciwa lutima wosi. Tu pandula omo liolombanjaile wa eca poku kuama olonjila vi sangiwa vonumbi donate.isa4310.com.