OSAPI YO KOÑOÑO
Velie Olombangi Via Yehova?
“Tunde eci nda kũlĩha Mike pa pita ale anyamo alua. Eye Ombangi yimue ya Yehova. Pole sia lakuata elomboloko lietavo liaye. Yehova Helie? Momo lie Olombangi Via Yehova ka vi lingila ovipito vioku sambiliya ateke owusa? Mike wa likongela hẽ kefendelo limue?”—Becky, ko Kalifornia, Estados Unidos.
“Eci omanu va lisungue lame va fetika oku lilongisa Embimbiliya Lolombangi Via Yehova nda lipula ndoco: ‘Onduko Olombangi Via Yehova yi lomboloka nye? Onduko eyi ka yi sesamẽla ketavo limue!’”
“Ame lukãi wange tua simaile okuti, Olombangi Via Yehova vieyale konjo yetu oku tu pisa omo lieci ka tu endaila konembele. Tua sokolola okuti, nda vatavo a velapo ka tua sangele eci tu kasi oku sandiliya ka citava okuti tu ci sanga va longiso Olombangi Via Yehova.”—Kent, ko Washington, Estados Unidos.
“Ame sia kũlĩhĩle velie va kala Olombangi Via Yehova kuenda kueci va tava”—Cecilie, ko Esbjerg, Dinamarka.
Citava okuti wa muĩle ale Olombangi Via Yehova kupange woku kunda konjo lanjo ale volokololo, oku eca alivulu kuenda oku longisa ocali Embimbiliya komanu. Pamue wa tambula orevista eyi ku umue pokati kavo. Pole citava okuti lopo o pondola oku lipula ndoco, velie Olombangi Via Yehova. Citava okuti ovisimĩlo viove vimuamue levi viatukuiwa kefetikilo liocipama cilo.
Pi o pondola oku sanga atambululo nda okuti o kuete atatahãi kuenda ovina vikuavo vi ku sakalaisa? Ndamupi o pondola oku lilongisa ovina Olombangi Via Yehova vi tava, upange wavo lovitumãlo viavo viefendelo kuenda momo lie va ku sandiliyila konjo yove ale kovitumalo vikuavo?
Cecilie wa tukuiwa ale wa popia ndoco, Nda tanga ovina vialua viatiamẽla Kolombangi Via Yehova vo Internet. Nda enda oku yeva olondaka vialua vĩvi kuenda olombangulo viesuvu. “Kuenje nda fetika oku kuata ovisimĩlo ka via sungulukile via tiamẽla Kolombangi Via Yehova.” Noke eye wa sapela Lolombangi Via Yehova kuenje va tambulula apulilo aye.
O yongola hẽ oku kuata elomboloko liocili kapulilo ove atiamẽla Kolombangi Via Yehova? Tu ku vetiya oku sandiliya Olombangi Via Yehova via sandeka orevista yilo. (Olosapo 14:15) Tu lavoka okuti ovipama vi kuãimo vi ka ku kuatisa oku limbuka catiamẽla kokuetu, kovina tu tava, kuenda oku kuata elomboloko liupange wetu.
