Ndopo, vosi yetu tu laika oku pita “vocilunga cimue” ci nyõla, cina Yesu a tukula okuti, “ohali ya piãla.” (Mateo 24:21) Ka tu pondola oku tila ohali yaco ya piãla. Pole, tu pondola oku linga cimue oco tu li teyuile. Ocina caco nye?

Vohundo Yesu Kristu a lingila Komunda, wa popia hati: “Tete sandiliyi Usoma [wa Suku] lesunga liaye.” (Mateo 6:33) Tu pondola oku ci linga ndati?

Tete sandiliyi Usoma wa Suku. Eci ci lomboloka okuti Usoma wa Suku, owo tu sukila oku velisapo komuenyo wetu okuti, ovina vikuavo vi sule. (Mateo 6:25, 32, 33) Momo lie tu sukilila oku velisapo Usoma? Momo uviali womanu, ka u tẽla oku malako ovitangi. Usoma wa Suku, owo lika u ka malako ovitangi viosi.

Sandiliyi esunga lia Suku. Tu sukila oku likolisilako oku ambata omuenyo ndomo ci likuata lovihandeleko viesunga via Suku. Momo lie? Momo nda tu li nõlela etu muẽle oku linga eci ciwa ale ceci cĩvi, tu kuata ovitangi. (Olosapo 16:25) Handi vali, nda tu pokola ku Suku, tu u sanjuisa kuenda tu kuatavo esanju komuenyo. —Isaya 48:17, 18.

Tete sandiliyi Usoma wa Suku lesunga liaye. Yesu wa popia okuti, vamue va laikele oku kakatela kovokuasi loku sima okuti, poku kuata olombongo vialua, va ka kolapo.  Vakuavo, va laikele oku sakalala calua lovina vieteke leteke okuti, ka va kuata otembo yoku sandiliya Usoma wa Suku. —Mateo 6:19-21, 25-32.

Pole, Yesu wa likuminya okuti, omanu vana va kuatisa Usoma wa Suku, otembo yosi va ka kuata ovina va sukila cilo, kuenje kovaso yoloneke va ka tambula asumũlũho. —Mateo 6:33.

Olondonge via Yesu via sandiliya Usoma wa Suku lesunga liaye. Ovio ka via muile esulilo liohali kuenda liovitangi vokuenda kuomuenyo wavo. Pole, va teyuiwa. Ndamupi?

Ovio via kapeleko ovihandeleko viesunga lia Suku. Kuenje ka via pitile lovitangi vina omanu va siata oku liyaka lavio eci ka va pokola ku Suku. Va kuata ekolelo lia pama liokuti, Usoma wa laikele oku iya, kuenje eci ca va kuatisa oku liyaka lovitangi via kãla. Suku wa ecavo kokuavo “unene wa piãla,” noke va tẽla oku pandikisa kovitangi. —2 Va Korindo 4:7-9.

Akristão vo kocita catete, va pokuile kocihandeleko ca Yesu coku sandiliya tete Usoma. Ovo va kunda olondaka viwa Viusoma kolonepa viosi ku sangiwa omanu. (Va Kolosai 1:23) Anga hẽ kuli vamue va kasi oku ci linga koloneke vilo?

Kuli! Olombangi Via Yehova via kũlĩha okuti, kua kamba otembo yitito oco Usoma wa Suku u maleko loluali lulo lua vĩha. Omo liaco, vi likolisilako oku tẽlisa olondaka Yesu a popia viokuti: “Olondaka evi viwa Viusoma vi kundilua koluali luosi ha vi lingi uvangi kolofeka viosi, oco esulilo liya noke.” —Mateo 24:14.

Nye o ka linga noke yoku yeva olondaka evi viwa? Tu ku vetiya oku setukula omanu vo kocita catete vo volupale luo Berea ko Makedonia. Eci upostolo Paulu a va kundila olondaka viwa Viusoma, ovo va tava esapulo “lonjongole yalua.” Noke ovo va enda oku konomuisa lutate Ovisonehua, oco va kũlĩhĩse nda okuti, ovina va kala oku lilongisa viocili, kuenje va vi kapako komuenyo wavo. —Ovilinga 17:11, 12.

Haicovo o pondola oku linga. Nda tete wa sandiliya Usoma wa Suku lesunga liaye, o ka sanga ocitumãlo cimue “ca koka” cilo kuenda o ka kuata ombembua yocili loku kolapo kovaso yoloneke.