Коринтлиқларға 2-хәт 11:1—33
11 Мениң азғина әқилсизлиғимға сәвирчан болушуңларни халаймән. Һалбуки, силәр маңа һазирму сәвирчан!
2 Мән силәрни Худаниң күнчилиги билән күнләватимән, чүнки мән өзәм силәрни аяллиққа бир әргә — Мәсиһкә пак иппәтлик қиз сүпитидә тонуштурушқа вәдә қилған едим.
3 Амма шуниңдин қорқумәнки, илан өз қувлуғи билән Һава анини аздурғандәк, силәрниң әқлиңлар Мәсиһ лайиқ болған паклиқтин һәм сәмимийликтин чәтнәп, бузулуп кәтмисун.
4 Мана: әгәр бирси келип силәргә биз вәзә қилған Әйсани әмәс, бәлки башқа бирсини вәзә қилса, яки силәр алған роһтин айрим роһни алсаңлар, яки қобул қилған хуш хәвәрдәк әмәс хуш хәвәрни қобул қилсаңлар, силәр буниңға толуғи билән чидамлиқ көрситиватисиләр.
5 Мениңчә болса, мән силәрниң «атақлиқ» әлчилириңлардин һечнәрсидә қелишмаймән.
6 Һәтта әгәр мән сөздә чевәр болмисамму, билимләрдә ундақ әмәс, һалбуки, биз буни һәммә нәрсидә һәрхил усуллар билән силәргә көрсәттуқ.
7 Яки мән өзәмни камсийтип, силәрни болса көтирип, Рәббимизниң хуш хәвирини һөзүрләнгәч һәқсиз җакалиғанлиқтин гуна қилдимму?
8 Мән силәргә хизмәт қилиш үчүн, башқа җамаәтләрдин озуқларни елип, уларни булиғандәк болдум
9 һәм мән силәрдә болғанда вә муһтаҗлиққа чүшкәндә, һечкимгә еғирчилиғимни салмидим, чүнки Македонийәдин кәлгән бурадәрләр маңа йәтмигән нәрсини ошуқчә толуқлап бәрди. Һә, мән һечнәрсә билән силәрни еғирлаштурмашқа тириштим һәм буниңдин бу янму тиришимән.
10 Мәсиһ ейтқинидәк, һәқиқәтни ейтиватимән: буниң билән Ахая вилайәтлиридә махтинишимға һечнәрсә тосалғулуқ қилалмайду.
11 Немә үчүн? Силәрни яхши көрмигәнлигимдинму? Яхши көргәнлигимни Худа билиду.
12 Бизгә тәң дәриҗигә лайиқ болушқа сәвәп издәватқанларни махтиниш сәвәвидин мәһрум қилиш үчүн, немә қиливатқан болсам, шуни кәлгүсидиму қилимән.
13 Булар — Мәсиһниң әлчилири қияпитини қобул қилип, ялғанчилиқ билән шуғуллиниватқан сахта әлчиләр.
14 Бу һәҗәплинәрлик иш әмәс, чүнки Шәйтан өзи йоруқлуқ пәриштисиниң қияпитигә кириду.
15 Шуңлашқа әгәр униң хизмәтчилири һәққанийлиқ хизмәтчилириниң қияпитигә киривалса, бу һәйран қаларлиқ нәрсә әмәс. Лекин уларниң ахири әмәлиятиға яриша болиду.
16 Яңливаштин ейтимән: һечким мени әқилсиз дәп ойлимисун. Әгәр силәр шундақ ойлисаңларму, мени гәрчә әқилсиздәк болсиму қобул қилиңлар, мәнму бираз махтинай.
17 Ейтиватқинимни Һакимдаримизниң үлгиси бойичә әмәс, бирақ қандақту-бир әқилсизликтә, адәттә махтанчақ өзигә ишәнчликтә болғандәк ейтиватимән.
18 Нурғунлири инсанларчә махтанғинидәк, мәнму махтинимән.
19 Силәр әқиллиқ болуп, хурсәнлик билән әқилсизләргә чидайсиләр.
20 Әслидә силәрни қул қилип, мал-мүлүклириңларни йәп, байлиқлириңларни тартивелип, өзлирини үстүңлардин қоюп, үзлириңларға урған һәрқандақ кишигә чидамлиқсиләр.
21 Буни гоя күчсиз болғинимиздәк, бизниң уйитимизға ейтиватимән.
Амма, әгәр башқа бирси бир нәрсидә қәйсәрлик билән һәрикәт қилса,— әқилсизләрчә дәватимән,— мәнму униңда қәйсәрлик билән һәрикәт қиливатимән.
22 Улар ибранийларму? Мәнму шундақ. Исраиллиқларму? Мәнму шундақ. Ибраһимниң әвлатлириму? Мәнму шундақ.
23 Мәсиһниң хизмәтчилириму? Әқилсиздәк җавап беримән — мән улардинму артуғи. Мән хелила көп әмгәкләрдә, хелила көп зинданларда болдум, интайин көп қамчиландим, пат-пат өлүм гирвигидә турдум.
24 Йәһудийлардин бири кам 40 қамчидин бәш қетим таяқ йедим,
25 үч қетим мени чивиқлиди, бир қетим таш билән урди, үч қетим кемә апитигә учридим, бир тәвлүкни деңизда өткүздим.
26 Мән көп қетим сәпәрләрдә болдум, дәриялардики ховупларда болдум, қарақчилардин хәтәрләрдә, милләтдашлиримдин ховупларда, башқа хәлиқләрдин хәтәрләрдә, шәһәрдики ховупларда, чөлдики хәтәрләрдә, деңиздики ховупларда, сахта қериндашлар арисидики хәтәрләрдә,
27 әмгәкләрдә вә җапаларда, пат-пат уйқисиз кечиләрдә, ачарчилиқта, вә уссизлиқта, көп мәртә тамақсиз, соғларда һәм ялиңачлиқта болдум.
28 Булардәк сиртқи вәзийәтләрдин башқа, маңа күндин-күнгә барлиқ җамаәтләр тоғрилиқ әндишә арам бәрмәйду.
29 Бирси аҗиз болса — мәнму аҗиз әмәсму? Әгәр бирсини путликашаңлиққа әкәлсә — мениңда ғәзәп өртәнмәмду?
30 Әгәр махтансам, мениң аҗизлиғимни билдүридиған нәрсә билән махтинимән.
31 Һакимдарим Әйсаниң Атиси һәм Худайи, Униңға мәдһийә мәңгү болсун, мениң алдимайватқинимни билиду.
32 Дәмәшқтә Арета падишаниң һакими мени тутувелиш үчүн, дәмәшқлиқләр шәһирини күзәтти,
33 лекин мени тоқулған севәттә сепилдики йочуқтин чүшәрди һәм шундақ қилип, мән униң қолидин қутулдум.
