Мон вордӥськи но будӥ Рим котырын, кытын куанер ужасьёс улӥзы. Улонэ мынам секыт вал. Аслэсьтым анайме мон ноку ӧй адӟы. Нош атаеным ми тупаса ӧм улэ. Улонлы монэ урам дышетӥз.

Мыным 10 арес но ӧй вал на, мон лушкаськыны кутски. Нош куке мыным 12 арес тырмиз, мон дорысьтым пегӟи. Мон трос пол полицие сюрылӥ, соин ик атае монэ отысь басьтэ но дорамы вае вал. Мон ялан керетыса улӥ, котькинэн асме чурыт но лек вози. Куке мыным 14 арес тырмиз, мон дорысьтым пегӟи но отчы ӧй берытскылы ни. Мон наркотикъёсын вырыны кутски но урамын улӥ. Уйин кытын ке изён понна, кинлэсь ке машиназэ тӥяса, отчы пырисько но изисько вал. Нош ӵукна мисьтӥськон понна, фонтан утчасько вал.

Мон туж быгатыса лушкаськыны дыши. Мон пичи арбериосты гинэ ӧй лушка, озьы ик квартираосы но коркаосы пырыса лушкаськыны быгатӥсько вал. Йыруж лэсьтӥсьёс пӧлын мон гажамон адями вал. Ӝоген монэ пыртӥзы одӥг тодмо бандае. Солы луыса мон эшшо но быгатыса лушкаськыны дыши. Мон банкъёсы пырыса лушкаськыны быгатӥ. Лек сямы понна бандаысь адямиос монэ гажазы. Мон котьку пистолетэн ветлӥ, изьыкум но миндэр улам понӥсько вал. Лек ужъёс, наркотикъёс, лушкаськон, урод кылъёсын вераськон но азыса-калгыса улон — тани кыӵе мынам улонэ вал. Мон сьӧры ялан полиция уйылӥськыса улӥз. Монэ кӧня ке пол пытсэтэ пуктылӥзы.

Одӥг пол, куке мон пытсэтын уг пукиськы вал, анаелэн сузэрез доры куное ветлыны малпай. Мон тодӥ, со но солэн кык нылпиосыз Иеговалэн Адӟись-Ивортӥсьёсыз луизы шуыса. Соос монэ христиан пумиськонэ ӧтизы. Мыным со тунсыко потӥз но, мон мыныны малпай. Эксэйлык юртын мон ӧс доры пукси, малы ке шуоно мынам адӟеме потэ вал, кин пыре. Отын но мон пистолетэн вал.

Со пумиськон мынэсьтым улонме воштӥз. Тодӥсько на, мон малпай, мукет планетае сюри кадь шуыса! Адямиос монэ шуныт но пальпотыса пумитазы. Али но тодӥсько на соослэсь чылкыт синъёссэс. Со чылкак мукет дунне вал!

Мон Адӟись-Ивортӥсьёсын Библиез дышетыны кутски. Макем тросгес тодон-валан мон басьтӥ, сокем умойгес валай, мыным улонме быдэсак воштоно шуыса. Мынам сюлмам ик пыризы Мадёнъёсысь 13:21 кылъёс: «Визьмо муртэн кусып возись ачиз но визьмо луоз, нош укылтэм муртэн эшъяськись ачиз но сӧриськоз». Мон валай, мыным бандаысь кошконо шуыса. Со капчи ӧй вал, но Иеговалэн юрттэменыз, ваньмыз пӧрмиз.

Мон ужпум кутӥ котьма ласянь чылкыт луыны. Мыным туж тыршоно луиз тамак кысконэз но наркотикъёсты куштон понна. Мон кузь йырсиме вандӥ, пельысьтым пельугыосме поттӥ но урод кылъёсын вераськемысь дугдӥ. Нырысьсэ мон асме киям кутыса улыны кутски.

Мон ноку но ӧй яраты лыдӟиськыны но дышетскыны. Библиез эскерон дыръя сак луыны мыным туж секыт вал, но мон туж тырши. Дыр ортчемъя, мон Иеговаез золгес яратыны кутски. Мон пушкын мар ке но воштӥськыны кутскиз — монэ возьытлыке йырйиз. Ӵем дыръя мыным уг кельшы вал, кызьы мон асме вози. Мон малпасько вал, Иегова монэ куке но простить кароз-а, уз-а шуыса вань урод ужъёс понна, кудъёссэ мон адямиослы лэсьтӥ. Соку мон лыдӟисько вал со сярысь, кызьы Иегова Давид эксэез лэсьтэм сьӧлыкъёсыз понна простить кариз. Та монэ туж буйгатӥз (2 Эксэйлыкъёслэн 11:1—12:13).

Со сяна, мыным секыт вал коркась корка ветлыса тодытыны (Матфей 28:19, 20). Куке мон малпасько вал, тодытыкум пумитаны быгато шуыса сое, кинлы азьвыл уродзэ лэсьтӥ, мон пӧсьвуам кадь луылӥ! Но дыр ортчемъя, мон кышканме ворми. Мон туж шумпотыны кутски, мукетъёсызлы тодыны юрттӥсько шуыса инмысь Атаймы сярысь, кудӥз простить карыны яратэ.

Иеговаез тодыса, мон улэп кыли! Тросэз азьвыл эшъёсы яке кулэмын, яке пытсэтын пуко. Нош мон шумпотыса улӥсько но вуоноез шоры юн осконэн учкисько. Мон дыши зӥбыт-востэм, кылзӥськись луыны но асме киям кутыны. Ваньмыз та пайда вайиз. Мукетъёсыныз мон асме лякытэн возисько. Мынам вань Кармен нимо чебер кышное. Ми туж шумпотыса улӥськомы. Ми адямиосты Библиен тодматӥськомы, со милемлы бадӟым шумпотон вае.

Но эшшо, мон али пӧяськытэк ужасько. Куддыръя мон банкъёсы ветлӥсько но, пистолет интые, сьӧрам ведра но мучоло басьтӥсько!