Моисей Синай дагга турда, Иегова аңаа тускай өргээ-майгынны тударын дааскан. Ол өргээ-майгынга израильчилер Бурганга чүдүүр ужурлуг турган. Олар бир черден өске черже көжүп тургаш, ону катай ап алыр турган.

Иегова Моисейге: «Өргээ-майгынны тудар кылдыр, кижи бүрүзү чүнү эккеп шыдаар, оозун эккелзин» — дээн. Израильчилер алдынны, мөңгүннү, хүлерни, үнелиг даштарны, каасталгаларны эккелген. Оон ыңай олар дүктү, лённу, дириг амытаннарның кештерин база өске-даа чүүлдерни эккелген. Кижилер дыка беримчелиг болган. Моисей безин: «Ам чүү-даа эккелбеңер. Бо бүгү чедер» — дээн.

Уран-шевер эр-даа, херээжен-даа улус өргээ-майгынны кылып турган. Иегова оларга ол ажылды кылыр мерген угаанны берген. Бирээзи хендир кылып, өскези пөстер даарап, чамдыызы угулзалап каастап турган. Чамдык улус алдынны, даштарны чонуп, ыяштарны оюп-хээлеп турган.

Улус өргээ-майгынны Иегованың айытканы ёзугаар тудуп алган. Олар Ыдыктыг болгаш Эң ыдыктыг өрээлди аңгылаар дыка чараш көжеге даарап алган. Эң ыдыктыг өрээлге акация ыяжындан кылган алдын-биле чаап каан чагыг-керээниң аптаразы турган. А Ыдыктыг черге алдын чырыткы, ширээ болгаш айдызаар өргүл бедигээжи турган. А херим иштинге өргүл салыр улуг бедигээш биле улуг хүлер сава турган. Чагыг-керээниң аптаразы израильчилерге Иегованы дыңнаар дээн  аазаашкынын сагындырып турган. Чагыг-керээ дээрге чүү-дүр, билир сен бе? Ол дээрге тускай аазаашкын-дыр.

Иегова Ааронну болгаш ооң оолдарын өргээ бараалгакчылары кылдыр томуйлаан. Олар өргээ-майгын дээш сагыш човап, аңаа Иеговага өргүлдер эккээр ужурлуг турган. А Эң ыдыктыг өрээлче чүгле дээди бараалгакчы, Аарон, кирип болур турган. Ол ынаар чылда чаңгыс катап бодунуң, өг-бүлезиниң, бүдүн израиль чоннуң бачыттары дээш өргүл салып кирер турган.

Израильчилер Египеттен үнген соонда бир чыл болганда, өргээ-майгынны тудуп доозупкан. Ам оларның Иеговага бараалгаар чери бар апарган.

Иегова өргээ-майгынга аажок таарзынган. Ону көргүзер дээш, ол өргээ-майгынны булут-биле шыва апкан. Булут өргээ-майгынның кырында болза, израильчилер кайнаар-даа барбас турган. Кажан ол булут өрү көдүрлүп кээрге, орукче үнерин израильчилер билир турган. Олар өргээ-майгынны чыггаш, булуттуң аайы-биле чоруп каар турган.