Бурган янзы-бүрү амылыг чүүлдерни эволюция дузазы-биле чаяаган бе?
Библиядан харыы
Чок. Бурган кижини болгаш үнүштерни, дириг-амытаннарны «янзы», «уксаа» a аайы-биле чаяаган деп Библияда тода бижээн (Эге дөс 1:12, 21, 25, 27; Ажыдыышкын 4:11). Библиядан алырга, бүгү кижи төрелгетен — бир дугаар кижилерниң, Ада́м биле Еваның салгалы (Эге дөс 3:20; 4:1). Бурган амылыг чүүлдерниң янзы-бүрү хевирлерин эволюция дузазы-биле чаяаган деп өөредигни Библия деткивейн турар (ол өөредигни чамдыкта теист эволюция деп адаар). Ынчалзажок чаңгыс уксаалыг амылыг чүүлдер бот-боттарындан ылгалып болур деп эртем барымдааларынга Библияда медээ чөрүшпейн турар b.
Кандыг өөредиглер бар?
Чуртталга канчаар тывылганын теист эволюцияның талалакчылары аңгы-аңгы кылдыр тайылбырлаар. «Дириг бойдусту чаяарда Бурган ала-чайгаар шилиттинилгени удуртуп турган» — деп, «Британ энциклопедияда» бижээн.
Теист эвоюцияның өөредиинче дараазында бодалдар база кирип болур:
Бүгү амылыг чүүл ниити өгбелерлиг.
Чуртталганың бир хевири көңгүс өске хевирже чоорту шилчий берип болур (ол өскерлиишкиннерни чамдыкта макроэволюция дээр).
Эволюцияны Бурган удуртуп турар.
Теист эволюция өөредии Библия-биле дүгжүп турар бе?
Эге дөс номунда шупту чүве чаяаттынган деп дыңнадыгны теист эволюция өөредии ылаптыг эвес деп санаар. Ынчалза-даа Иисус ол медээни бүзүрелдиг фактылар кылдыр айыткан (Эге дөс 1:26, 27; 2:18—24; Матфей 19:4—6). Библиядан алырга, Иисус черже кээриниң бетинде дээрге чурттап тургаш, Бурганга шупту бар чүвени чаяарынга дузалажып турган (Иоанн 1:3). Ынчаарга Бурган хамык чүвени эволюция дузазы-биле чаяаган деп өөредиг библейжи өөредиглерге дүүшпес.
Үнүштерниң болгаш дириг амытаннарның янзы-бүрү өскерлиишкиннери эволюцияны бадыткап турар бе?
Библияда уксаа иштинге кандыг өскерлиишкиннер болдунарын тайылбырлаваан. Хайнакташтырган соонда азы агаар-бойдустуң салдарындан дириг амытаннарның азы үнүштерниң чаа янзы-бүрү хевири тыптып болурунга Библия чөпшээрежип турар. Ол өскерлиишкиннерни эволюция деп санаары шын эвес. Хайнакташтырыптарга азы агаар-бойдустуң салдарындан чаа кандыг-бир амытан тыптып келбес болгай.