Haapiiraa hape 6: E farii te Atua ia haamorihia te mau hohoˈa e hohoˈa moˈa

Nohea mai teie haapiiraa? “Aita te mau Kerisetiano matamua i haamori i te mau hohoˈa. . . . Ua fariihia te faaohiparaa i te mau hohoˈa i roto i te ekalesia i te 4raa e te 5raa o te senekele i te mea e e haapii maitai aˈe te feia ite ore i te mau haapiiraa Kerisetiano maoti te reira, eiaha râ na roto i te mau aˈoraa aore ra buka.”—Cyclopedia of Biblical, Theological, and Ecclesiastical Literature, a McClintock e Strong, buka 4, api 503 e 504.

Ta te Bibilia e haapii ra: “Eiaha roa oe e hamani i te tii tarai hia no oe e te hohoa no te hoe mea i nia i te rai ra, e no te hoe mea i raro i te fenua nei, e no te hoe mea i roto i te pape i raro ae i te fenua. Eiaha roa oe e haamori atu, e e tavini atu.” (Exodo 20:4, 5, V.C.J.S.) Ua papai te aposetolo Ioane i te mau Kerisetiano o te senekele matamua: “E aˈu mau tamarii rii, e ara ïa outou i te idolo.”—Ioane 1, 5:21, V.C.J.S.

E ravea noa anei te mau hohoˈa, mai ta te mau ekalesia e parau ra, no te haafatata e te faahanahana i ta te reira e faataipe ra? Ia au i te hoê buka ite rahi (The Encyclopedia of Religion), “ua faaohipahia na mua te mau hohoˈa no te haapii i te taata e no te faanehenehe; tera aˈe ïa te tumu e faaohipahia ˈi te reira. Ua riro oioi râ tera mau mea ei taoˈa haamoriraa. E parau mau iho â râ no te mau hohoˈa moˈa tei faaohipa-rahi-hia e te Ekalesia Orthodoxe no Hitia o te râ.” Ua ui roa râ te peropheta Isaia: “O vai ta outou e faafaito i te Atua? eaha ta outou hohoˈa ia faaau ia ˈna?”—Isaia 40:18.

A hiˈo i teie mau irava: Isaia 44:13-19; Ohipa 10:25, 26; 17:29; Korinetia 2, 5:7

TUPURAA MAU:

Eita te Atua e farii ia faaohipahia te mau hohoˈa e hohoˈa moˈa

A PEE MAITE I TE PARAU MAU EIAHA TE HAAPIIRAA HAPE

Eaha te huti mai i teie faaiteraa poto o te mau tiaturiraa hape e haapii-noa-hia ra e e rave rahi haapaoraa? Eita e nehenehe e faafaito i te mau “fabula faatupuhia e te paari” i te pue parau mau ohie e te tamahanahana o te Bibilia.—Petero 2, 1:16.

No reira, ma te pae tahi ore, a faaau i tei haapiihia ia oe e te Parau a te Atua, te tumu o te parau mau. (Ioane 17:17) E tupu ïa teie parau fafau i nia ia oe: ‘E ite oe i te parau mau, e na te parau mau oe e faatiamâ.’—Ioane 8:32.

[Faaiteraa i te fatu o te hohoˈa i te api 9]

Pictorial Archive (Near Eastern History) Est.