Ta tatou e haapii mai no nia i te Atua maoti ta ˈna mau peropheta
I te tau tahito, ua faaite te Atua i ta ˈna mau peropheta i te mau poroi faufaa no te huitaata. Te faaite mai ra anei teie mau poroi e mea nafea ia fanaˈo i ta te Atua haamaitairaa? Oia mau. E hiˈo anaˈe eaha te haapiiraa ta tatou e huti mai roto mai e toru peropheta taiva ore.
ABERAHAMA
E maitiiti ore te Atua e te hinaaro ra oia e haamaitai i te mau taata atoa.
Ua fafau te Atua i te peropheta Aberahama e “ei ia oe e maitai ai te mau fetii atoa o te ao nei.”—Genese 12:3.
Eaha ta tatou e haapii mai? Mea here roa na te Atua ia tatou e te hinaaro nei e haamaitai i te mau utuafare atoa, tane, vahine e tamarii o te faaroo ra ia ˈna.
MOSE
E aroha hamani maitai to te Atua e te haamaitai nei oia i te feia e tutava i te ite no nia ia ˈna.
Ua horoa te Mana hope i te peropheta Mose te mana no te faatupu i te mau semeio maere mau. Tera râ, ua pure Mose e: “E faaite mai oe ia ˈu i ta oe ravea: ia ite au ia oe, ia tiahia vau e oe ra.” (Exodo 33:13) Ua oaoa te Atua i teie aniraa a Mose e ua haamaitai atu ia ˈna ma te horoa hau atu â ite e maramarama no nia i ta ˈna mau aratairaa e to ˈna mau huru maitatai. Ei hiˈoraa, ua haapii mai Mose e “e Atua aroha noa, e te hamani maitai rahi” o Iehova.—Exodo 34:6, 7.
Eaha ta tatou e haapii mai? Te hinaaro nei te Atua e haamaitai ia tatou paatoa, ia tutava râ tatou i te ite atu â no nia ia ˈna. Te faaite mai ra o ˈna i roto i te Bibilia e mea nafea ia haamori ia ˈna e i to ˈna hinaaro rahi ia fanaˈo tatou i ta ˈna haamaitairaa.
IESU
Ua faaite Iesu i te aumihi ma te faaore i te mau huru maˈi atoa
E nehenehe tatou e fanaˈo i te mau haamaitairaa mure ore a te Atua ma te haapii no nia ia Iesu, ta ˈna i rave e ta ˈna i parau.
Te vai ra i roto i te Bibilia e rave rahi mau tuhaa rii no nia i te oraraa o Iesu e ta ˈna mau haapiiraa. Ua horoa te Atua ia Iesu i te mana no te faatupu i te mau semeio faahiahia mau, mai te faaoraraa i te matapo, te tariˈa turi e te piriˈoˈi. Ua faatia atoa mai i te feia pohe. Ma te faatupu i taua mau semeio ra, ua haapapu roa Iesu i te mau haamaitairaa ta te Atua e faatupu no te huitaata nei no a muri aˈe. Ua faaite oia e nafea tatou taitahi e fanaˈo ai i taua mau haamaitairaa ra: “No te fanaˈo i te ora mure ore, ia ite ïa ratou ia oe te Atua mau hoê roa e i ta oe i tono mai o Iesu Mesia e tia ˈi.”—Ioane 17:3.
Ua faaite Iesu i te aumihi, te hamani maitai e te mǎrû. Ua putuputu mai te mau tane e vahine, taurearea e ruhiruhia ati aˈe ia Iesu no to ˈna titau-manihini-raa ia ratou, a na ô ai: “Ia haapiihia outou e au, mea mǎrû hoi au e te haehaa o te aau, e ite ïa outou i te tamahanahanaraa.” (Mataio 11:29) Taa ê atu i te feia o to ˈna tau tei rave ino i te mau vahine, ua faaite noa Iesu i te hamani maitai i te mau vahine ma te faatura ˈtu ia ratou.
Eaha ta tatou e haapii mai? Ua faaite noa Iesu i te here hohonu i te mau taata e ua faaite atoa oia mai te aha to tatou huru i nia i te tahi e te tahi maoti to ˈna hiˈoraa.
E ERE O IESU TE ATUA
Te haapii ra te Bibilia e “no tatou râ, hoê anaˈe ïa Atua” e ua riro Iesu Mesia ei peropheta haehaa a te Atua. (Korinetia 1, 8:6) Ua haapapu roa Iesu e o te Atua tei nia aˈe ia ˈna e na ˈNa i tono atu ia ˈna i te fenua.—Ioane 11:41, 42; 14:28. a
a No te haapii atu â no nia ia Iesu Mesia, a haere i nia i te reni natirara www.isa4310.com/ty.
E au atoa outou . . .
TE PAHONO RA TE BIBILIA
O Iesu anei te Atua Manahope?
Eaha ta Iesu i parau no nia i to ˈna tiaraa e to te Atua?
