IA AU I TE BIBILIA
Mea poietehia te mau mea atoa
Ua oti iho â anei te mau mea atoa i te poietehia i muri aˈe e ono mahana e 24 hora?
“Hamani ihora te Atua i te raˈi e te fenua i te matamua ra.”—Genese 1:1.
TA TE BIBILIA E PARAU RA
Mai ta te Genese 1:1 e parau ra, ua poiete te Atua i te ao nui e te fenua “i te matamua ra.” Te farii nei te mau aivanaa e e haamataraa to te ao nui e fatata e 14 miria matahiti to te reira.
Te faataa atoa ra te Bibilia e e ono “mahana” to te Atua poieteraa i te mau mea atoa. E ere râ i te mahana e 24 hora. (Genese 1:31) Te faaohipa nei te Bibilia i te parau “mahana” no te faataa e rave rau roaraa tau. A faahitihia ˈi no “te mahana i hamani ai te Atua ra o Iehova i te raˈi e te fenua,” te parauhia ra ïa no te taime taatoa i poietehia ˈi te mau mea atoa. (Genese 2:4) Mea papu e i muri aˈe e rave rahi tausani matahiti te mau mea atoa i te otiraa i te poietehia.—Salamo 90:4.
TE FAUFAARAA IA ITE
Ia tiaturi oe e ua poietehia te mau mea atoa i roto i te area taime e ono mahana e 24 hora, e patoi paha oe i ta te Bibilia e parau ra. Ia haapao râ oe i ta te Parau a te Atua e faatia ra no nia i te tau i poietehia ˈi te mau mea atoa, e faufaahia oe i te “aôraa maitai” e vai ra i roto.—Maseli 3:21, Te Bibilia Moˈa V.C.J.S., 1976.
Mea na roto anei te tauiuiraa o te mau mea ora to te Atua poieteraa i te raau e animara i te fenua nei?
“Ua parau ihora te Atua, Ia fanau mai te fenua nei i te mau mea ora ma to ratou ra huru.”—Genese 1:24.
TA TE BIBILIA E PARAU RA
Aita te Atua i hamani i te hoê noa mea ora a vaiiho atu ai i te reira ia tauiui e ia faatupu e rave rau huru mea ora. Ua poiete râ O ˈna i te mau “huru” atoa raau tupu e animara ia nehenehe ratou e faatupu i tei au i “to ratou huru.” (Genese 1:11, 21, 24) E mai tera noa e tae roa mai i teie mahana. No reira te fenua i î roa ˈi i tera e tera “huru” raau e animara mai ta te Atua i poiete i te matamua.—Salamo 89:11.
Aita te Bibilia e faaite ra i te mau tauiraa atoa e nehenehe e tupu i nia i te tahi huru animara. Ei hiˈoraa, no te mau animara i faatitohia e te hoê â huru animara, e tia ia ratou ia ora i te vahi ratou e tuuhia ˈi. Noa ˈtu e no vetahi, te haapapu ra te reira i te tauiuiraa o te mau mea ora, aita te tahi atu huru animara i tupu mai. Ua haapapu te mau maimiraa o teie tau e aita te mau raau e animara i taui rahi roa i te roaraa o te tau.
TE FAUFAARAA IA ITE
Mea tano te faataaraa a te Bibilia no nia i te mau “huru” o te mau mea ora, e mea papu atoa ïa ta ˈna e parau ra i te pae o te tuatapaparaa e ta ˈna mau parau tohu.
No ǒ mai ia vai te puai i faaohipahia no te poiete i te ao nui?
“Na tau rima i hohora i te raˈi.”—Isaia 45:12.
TA TE BIBILIA E PARAU RA
No ǒ mai i te Atua te puai hope. (Ioba 37:23) Mea faufaa roa no te mea ua ite te mau aivanaa e e nehenehe te tahi ohipa e tupu i te faaohiparaa i te puai. Te na ô ra te Bibilia e o te Atua iho te tumu o te “puai rahi” i faaohipahia no te poiete i te ao nui. (Isaia 40:26) Ua fafau te Atua i te haapao i te mau mea ta ˈna i poiete ma to ˈna puai. No te mahana, te avaˈe e te mau fetia, te na ô ra te Bibilia, “ua haamau hoi [te Atua] ia ratou e ia mau e a muri noa ˈtu.”—Salamo 148:3-6.
TE FAUFAARAA IA ITE
Ua parau te hoê aivanaa o Allan Sandage te iˈoa i te tahi mahana: “Aita te mau aivanaa e nehenehe e pahono i te mau uiraa faufaa roa. Ia haamata oe i te ani no te eaha te tahi mea i hamanihia ˈi, aita ta te mau aivanaa e faataaraa.” Mea tano ta te Bibilia e parau ra no nia i te poieteraa o te mau mea atoa. E ere râ tera anaˈe ta ˈna e nehenehe e faaite. Te pahono atoa ra hoi te Parau a te Atua i te mau uiraa ta te mau aivanaa e ore e nehenehe e faataa mai teie, Eaha te opuaraa a te Atua no te fenua e te huitaata? a
a No te ite atu â, a hiˈo i te pene 3 o te buka Eaha ta te Bibilia e haapii mau ra? piahia e te mau Ite no Iehova.
E au atoa outou . . .
A ARA MAI NA!
Ia au te Bibilia, mea tupu noa anei te mau mea?
Ua tuati anei ta te Bibilia e parau ra e ta te mau aivanaa?
