Numera 35:1-34
35 Paraparau noa maira Iehova ia Mose i te mau vahi papu pâpâmǎrô o Moabi na te hiti Ioridana+ i Ieriko, a na ô ai:
2 “A faaue i te ati Iseraela ia horoa no roto i te tuhaa ta ratou e fatu i te tahi mau oire no te ati Levi ei parahiraa no ratou+ e e horoa ratou no te ati Levi i te mau vahi ati aˈe taua mau oire ra.+
3 E parahi ratou i taua mau oire ra, e te mau vahi i rapaeau mai, no ta ratou ïa mau animara, ta ratou faufaa, e pauroa te tahi atu mau animara ta ratou.
4 Te mau vahi i rapaeau mai i taua mau oire ra ta outou e horoa no te ati Levi, 1 000 ïa kubiti* te aano mai te patu ra ati aˈe te oire.
5 E faito outou i te rapaeauraa o te oire e 2 000 kubiti i te pae hitia o te râ, e 2 000 kubiti i te pae apatoa, e 2 000 kubiti i te pae tooa o te râ, e e 2 000 kubiti i te pae apatoerau, e to ropu te oire. Tera te mau vahi i rapaeau mai i to ratou mau oire.
6 “Na oire ta outou e horoa no te ati Levi, e 6 ïa oire haapuraa,+ ta outou e horoa no te taata tei haapohe i te tahi taata ia horo oia i reira,+ oia atoa e 42 oire ê atu.
7 E horoa outou no te ati Levi e 48 oire, e te mau vahi atoa i rapaeau+ mai i taua mau oire ra.
8 No roto i te tuhaa a te ati Iseraela+ na oire ta outou e horoa no te ati Levi. No roto i te pǔpǔ rahi, mea rahi ta outou e rave mai, e no roto i te pǔpǔ iti, mea iti ta outou e rave mai.+ E horoa te pǔpǔ tataitahi vetahi o to ratou mau oire no te ati Levi ia au i te tuhaa ta ratou e fanaˈo.”
9 Paraparau noa maira Iehova ia Mose, a na ô ai:
10 “A paraparau i te ati Iseraela e a na ô atu: ‘Na roto atu outou i te Ioridana e tae ai i te fenua o Kanaana.+
11 E maiti outou i te tahi mau oire e raea ohie ia outou ei oire haapuraa, i reira tei haapohe i te taata ma te opua ore e horo ai.+
12 E riro taua mau oire ra ei haapuraa no outou i te taata tahoo i te toto,+ ia ore tei haapohe i te taata ia pohe hou oia a haavahia ˈi i mua i te amuiraa.+
13 Tera te tumu e faataa ˈi outou i na ono oire haapuraa.
14 E faataa outou e toru oire i teie pae mai o Ioridana+ e e toru oire i te fenua o Kanaana,+ ei oire haapuraa.
15 E riro na oire e ono ei haapuraa no te ati Iseraela, no te taata ěê+ e te purutia e noho ra i rotopu ia ratou, no te taata tei haapohe i te tahi atu taata ma te opua ore ia horo oia i reira.+
16 “‘Mai te peu râ ua tairi oia ia ˈna i te tahi mauhaa auri, a pohe atu ai taua taata ra, e taparahi taata oia. Ia haapohe-mau-hia+ taua taparahi taata ra.
17 E mai te peu ua tairi oia ia ˈna i te ofai o te nehenehe e haapohe i te taata, a pohe atu ai oia, e taparahi taata oia. Ia haapohe-mau-hia taua taparahi taata ra.
18 E mai te peu ua tairi oia ia ˈna i te mauhaa raau o te nehenehe e haapohe i te taata, a pohe atu ai oia, e taparahi taata oia. Ia haapohe-mau-hia taua taparahi taata ra.
19 “‘Na te taata tahoo i te toto e haapohe i te taparahi taata. Ia farerei oia ia ˈna, na ˈna e haapohe ia ˈna.
20 Ua pohe anaˈe te tahi taata no te mea ua turai oia ia ˈna ma te hae aore ra ua taora i te tahi mea i nia iho ia ˈna ma te opuaraa ino,*+
21 aore ra ma te hae i tupai ai oia ia ˈna, e ua pohe taua taata ra, e haapohe-mau-hia tei tupai ia ˈna. E taparahi taata oia. Na te taata tahoo i te toto e haapohe i te taparahi taata ia farerei oia ia ˈna.
22 “‘Mai te peu râ e ere mea manaˈohia e e ere ma te hae to ˈna turairaa ia ˈna aore ra aita e opuaraa ino*+ to ˈna taoraraa i te tahi mea i nia iho ia ˈna,
23 aore ra aita oia i ite atu ia ˈna i to ˈna taoraraa i te ofai, e ere oia i te enemi e aita oia i imi ia pepe taua taata ra, e ua pohe taua taata ra,
24 na te amuiraa ïa e haapao i te haavaraa i rotopu i tei haapohe i te tahi atu e te taata tahoo i te toto, ia au i tera mau faatureraa.+
25 E faaora ïa te amuiraa i tei haapohe i te tahi atu taata i te rima o te taata tahoo i te toto e e faahoˈi ratou ia ˈna i to ˈna oire haapuraa i reira to ˈna hororaa, e e faaea oia i reira tae roa i te poheraa o te tahuˈa rahi tei faatavaihia i te monoˈi moˈa.+
26 “‘Mai te peu râ e haere tei haapohe i te taata i rapaeau mai i te otia o to ˈna oire haapuraa i reira to ˈna hororaa,
27 ia noaa oia i te taata tahoo i te toto i rapaeau mai i te otia o to ˈna oire haapuraa, e ia haapohe oia ia ˈna, eita ïa o ˈna e faahapahia i te taparahiraa taata.
28 E faaea hoi tei haapohe i te taata i to ˈna oire haapuraa tae roa i te poheraa o te tahuˈa rahi. I muri iho râ i te poheraa o te tahuˈa rahi, e nehenehe oia e hoˈi i to ˈna fenua.+
29 Ei faatureraa no te haavaraa teie mau mea no outou e hope noa ˈtu to outou mau uˈi i to outou mau nohoraa atoa.
30 “‘E haapohehia te taata atoa e haapohe i te tahi atu taata ei taparahi taata+ na nia i te haapapuraa a* te ite.+ Eiaha râ te tahi ia haapohehia na nia i te haapapuraa a te hoê noa ite.
31 Eiaha outou e rave i te hoo no te ora o te hoê taparahi taata mea tano ia pohe. E haapohe-mau-hia+ hoi oia.
32 E eiaha outou e rave i te hoo no te tahi tei horo i to ˈna oire haapuraa, a manaˈo atu ai oia e hoˈi i to ˈna fenua aita â te tahuˈa rahi i pohe atura.
33 “‘Eiaha outou e haaviivii i te fenua ta outou e parahi ra, e viivii hoi te fenua i te toto,+ e eita tera fenua e nehenehe e tamâhia no te toto tei haamaniihia i nia i te fenua maori râ na roto i te toto o tei haamanii i te reira.+
34 Eiaha outou e haaviivii i te fenua ta outou e parahi ra, ta ˈu e parahi nei. Te parahi nei hoi au o Iehova i rotopu i te nunaa o Iseraela.’”+
Nota i raro i te api
^ 1 kubiti: 44,5 cm. Hiˈo i te tuhaa hau B14.
^ Heb: “a tamoemoe ai ia ˈna.”
^ Heb: “aita i tamoemoe ia ˈna.”
^ Heb: “vaha o.”
