Te rata a Iuda 1:1-25
1 O Iuda, e tavini na Iesu Mesia, e taeae râ no Iakobo,+ i te feia tei titau-manihini-hia+ e tei herehia e te Atua ra te Metua, e tei faahereherehia no Iesu Mesia:+
2 Ia rahi te aroha hamani maitai e te hau e te here i roto ia outou.
3 Taeae here ma, e hinaaro iti rahi to ˈu e papai ia outou no nia i te faaoraraa ta tatou e tiai nei.+ Mea faufaa râ ia papai atu vau no te faaitoito ia outou ia aro uˈana no te faaroo+ tei horoahia ˈtu hoê roa horoaraa i te feia moˈa.
4 Te tumu, ua faaô omoˈe mai te tahi mau tane i rotopu ia tatou. Ua faataa-aˈena-hia ratou e te mau Papai no te faautuaraa. E feia faatura ore hoi ratou i te Atua e o te haafaufaa ore nei i to ˈna hamani maitai rahi ma te rave i te mau peu faufau,*+ a taiva ˈtu ai i to tatou Fatu hoê roa o Iesu Mesia tei hoo mai ia tatou.+
5 Te hinaaro nei au e haamanaˈo atu, noa ˈtu e ua ite ê na outou, e i faaora na Iehova* i to ˈna nunaa mai te fenua Aiphiti mai.+ I muri aˈe râ, ua haamou oia i tei ere i te faaroo.+
6 E te mau melahi tei ore i mau i to ratou tiaraa matamua, ua faarue râ i to ratou iho nohoraa,+ ua tapea ïa te Atua ia ratou e a muri noa ˈtu i roto i te poiri taˈotaˈo no te haavaraa i te mahana rahi.+
7 Ua rave atoa Sodoma e Gomora e te mau oire tapiri i te mau peu taotoraa tia ore* faufau e te mau hinaaro tia ore o te tino.+ Ua faautuahia ratou i te auahi mure ore,+ a riro atu ai ei faaararaa no tatou.
8 Oia atoa teie mau tane tei faaô omoˈe mai, te faatupu noa nei ïa i te manaˈo hape, te haaviivii nei i te tino o vetahi ê, te vahavaha nei i te mana faatere* e te faaino nei i te feia hanahana o te Atua.+
9 Area Mihaela+ te melahi rahi,+ i to raua te Diabolo mârôraa no nia i te tino o Mose,+ aita ïa i faahapa noa ˈˈe ia ˈna e i faaino atu.+ Ua na ô atu râ: “Na Iehova* e faahapa ia oe.”+
10 Area teie nei feia, te faaino nei ïa i te mau mea atoa aita ratou e taa ra.+ Area te mau mea atoa ta ratou e taa ra mai te animara aita to ratou e feruriraa,+ ta ratou ïa e rave nei e o te haaviivii nei ia ratou.
11 Ua ati ratou, ua pee hoi ratou i te haerea o Kaina,+ ua horo tia ˈtu i roto i te hapa a Balaama+ tei nounou i te moni, e ua pohe i te parau orure hau+ a Kora.+
12 I ta outou mau tamaaraa+ e te mau taeae, mai te mau toˈa ite-ore-hia i roto i te miti teie mau tiai, a haapao noa ˈi i to ratou opu ma te mǎtaˈu ore.+ E ata ratou o te pee hanoa i te mataˈi+ a ore ai e horoa mai i te ûa. E tumu raau ratou o te ore e horoa mai i te maa i te taime tano, tei pohe roa e tei iriti-tumu-hia.
13 E are miti arepurepu ratou o te hue nei i te mau hairiiri i tatahi a haama ˈtu ai ratou,+ e fetia atoa o te tere hanoa ra e tei faataahia no te poiri taˈotaˈo e a muri noa ˈtu.+
14 Ua tohu atoa Enoha,+ te hitu mai ia Adamu mai â, no nia i teie nei feia a na ô ai: “Inaha, ua haere mai Iehova* e ta ˈna mau ahuru tausani melahi moˈa+
15 no te haava i te taata atoa+ e no te faautua i te feia atoa aita e faatura ra i te Atua no ta ratou mau ohipa ino atoa i rave e no te mea ua tuhi teie mau taata rave hara i te Atua.”+
16 E feia amuamu ratou,+ e feia mutamuta no nia i to ratou huru oraraa, a haapao noa ˈi i to ratou iho mau hinaaro.+ Te faateitei nei ratou ia ratou, a faatietie atoa ˈi ia vetahi ê* ia noaa mai ta ratou e hinaaro.+
17 Outou râ, taeae here ma, a haamanaˈo i te mau parau i faahiti-aˈena-hia* e te mau aposetolo a to tatou Fatu ra o Iesu Mesia,
18 tei na ô noa ˈtu na: “I te tau hopea, e tia mai te feia faaooo o te haapao noa i to ratou iho mau hinaaro ino.”+
19 O ratou te faaamahamaha nei i te amuiraa,+ teie mau tane e haa nei mai te animara,* aita hoi te varua o te Atua* ia ratou ra.
20 Outou râ, taeae here ma, a haapuai i to outou faaroo moˈa roa e a pure ia au i te aratairaa a te varua moˈa,+
21 a tamau ai i te rave i te mau mea e here ai te Atua ia outou,+ a tiai noa ˈi i te aroha hamani maitai o to tatou Fatu ra o Iesu Mesia ma te tiaturi i te ora mure ore.+
22 A tamau atoa i te aroha hamani maitai+ atu i te feia e feaa ra,+
23 a faaora ia ratou+ ma te huti mai ia ratou mai roto mai i te auahi o te haamouraa. A tamau râ i te aroha hamani maitai ia vetahi ê e ma te mǎtaˈu, a faufau* atoa ˈi i te ahu tei tafetafeta i ta ratou mau ohipa ino.+
24 Ei te Atua o te nehenehe e paruru ia outou ia ore ia hiˈa, a tia ˈtu ai ma te hapa ore+ i mua i to ˈna hanahana* ma te oaoa rahi,
25 ei te Atua hoê roa, to tatou Faaora na roto ia Iesu Mesia to tatou Fatu, te hanahana, te teitei, te puai e te mana mai mutaa iho mai â, i teie nei e a muri noa ˈtu. Amene.
Nota i raro i te api
^ Hiˈo i te tuhaa hau A5.
^ Oia hoi te Atua e te feia ta ˈna i faatoroa.
^ Hiˈo i te tuhaa hau A5.
^ Hiˈo i te tuhaa hau A5.
^ Aore ra “a haafaahiahia atoa ˈi i te feia tiaraa teitei.”
^ Aore ra “te mau mea i faaite-atea-hia.”
^ Aore ra “e rave nei i to ratou iho mau hinaaro.”
^ Aore ra “puai ohipa o te Atua.”
^ Hel: “au ore roa.”
^ Aore ra “i mua i to ˈna aro hanahana.”
