Ua taiohia pae miria taata o te mataitai i te FIFA haruraa auˈa na te ao o te tupu mai te 20 no Novema tae atu i te 18 no Titema 2022. E rave rahi o te manaˈo ra e nehenehe teie mau tataˈuraa e rave hau atu â i te tahoêraa i te taata ei feia mataitai.

•   “E mana to te tuaro e taui i te ao. E mana to te reira no te faaitoito. E mana to te reira no te tahoê i te taata aita e nehenehe e faaauhia.”—Nelson Mandela, peretiteni tahito no Afirika apatoa.

•   “E tahoê te tueraa popo i te taata, no te mea e horoa te reira i te tiaturiraa, te oaoa, te hinaaro rahi, te hereraa i te taata e hoê â fa ta ratou.”—Gianni Infantino, peretiteni o te FIFA. a

 E naea anei i te haruraa auˈa na te ao e te tahi atu mau tataˈuraa i tera mau fa? Te vai ra anei te tiaturi no te hau e te tahoê?

 Te haruraa auˈa na te ao no teie matahiti, e ere noa no nia i te tueraa popo. Ua faatupu atoa teie tataˈuraa i te aimârôraa i te fifi o te oraraa e poritita no te tiaraa o te taata, te au-ore-raa i te taata e te tano-ore-raa i roto i te ohipa faanavairaa faufaa.

 E rave rahi taata mea au roa na ratou e mataitai i teie mau tataˈuraa, mai te haruraa auˈa na te ao. Tera râ, noa ˈtu tera ta te taata e hinaaro ra, eita teie mau tataˈuraa e hopoi mai i te tahoê vai maoro. E itehia râ te mau haerea e te mau haaraa mai ta te Bibilia e parau ra o te faaite ra i te hoê area tau parauhia “te mau mahana hopea.”—Timoteo 2, 3:1-5.

 Te horoa ra te Bibilia i te hoê tiaturiraa papu no te tahoê i te ao nei. Ua fafau te reira e e tahoêhia te taata atoa i te fenua nei i raro aˈe i te hoê faatereraa i te raˈi piihia “te Faatereraa arii a te Atua.”—Luka 4:43; Mataio 6:10.

 E haapao te Arii o tera Faatereraa arii, Iesu Mesia, ia vai te hau na te ao nei. Te faataa ra te Bibilia:

•   “E tupu ruperupe mai te feia parau-tia . . . E rahi roa te hau.”—Salamo 72:7.

•   “E faaora . . . oia i te taata veve o te hinaaro ra i te tauturu . . . E faaora oia ia ratou i te haavîraa e te hamani-ino-raa.”—Salamo 72:12, 14.

 Tae roa mai i teie mahana, ua tahoê aˈena te mau haapiiraa a Iesu e mirioni taata i roto 239 fenua. Ua haapii ratou i te haapae i te riri. No te haapii hau atu â, a taio i te mau anairaa tumu parau “A haapae roa i te riri.”