“Tau taime aˈenei, e ohipa maere mau ia fana’o te maa pae varua na roto te roro uira.” Tera atoa anei ta oe i manaˈo? Ua faahitihia tera mau parau i roto i te hoê oreroraa parau faaitoito mau a taeae Geoffrey Jackson horoahia i roto i te Video parau apî n°6 a te Tino aratai (2020). Ua parau atoa o ˈna: “A feruri na râ: I teie tau ma’i pee, nafea pai ïa tatou ahani aita teie mau ravea mai ia JW Library? Ahia ˈtura matahiti to Iehova faaineine-noa-raa ia tatou no te hoê tupuraa mai teie.”

 Mea nafea to Iehova faaineineraa ia tatou? Eaha tei ravehia no te fanaˈo i te porotarama roro uira JW Library? Eaha tei titauhia no te haamau e haamaitai i te reira?

 I Me 2013, ua ani te Tino aratai i te Tuhaa e haapao i te porotarama MEPS ia ohipa i nia i te hoê porotarama roro uira no te taio i te huriraa Bibilia faaapîhia o te New World Translation. Ua faatia Paul Willies, hoê taeae e ohipa ra i roto i tera Tuhaa: “I taua taime ra, aita roa ˈtu matou i ohipa aˈenei i nia i te hoê porotarama no te mau niuniu paraparau afaifai. Ua haamau râ matou i te hoê pǔpǔ ohipa, ua faataimehia te tahi mau opuaraa ta matou i haamata e ua ohipa matou e te tahi atu mau pǔpǔ no te feruri e no te haamau i tera porotarama roro uira. Oia atoa i te mau mea e tuuhia i roto. Ua pure pinepine matou ia Iehova e maoti ta ˈna tauturu, ua matara mai te porotarama roro uira e pae noa avaˈe i muri iho i te hoê rururaa matahiti.”

 Te tahi atu fifi tei itehia, o te faariroraa ïa i tera porotarama roro uira mai te hoê vairaa buka ra te huru, ia nehenehe e tuuhia hau atu â papai na roto hau atu â reo. I Tenuare 2015, ua nehenehe te taata e fanaˈo i te rahiraa o ta matou mau papai na roto i te reo Beretane. Ono avaˈe i muri iho, ua nehenehe te taata e rave mai i taua mau papai ra na roto hau atu hanere reo.

 I tera taime, ua ohipa te mau taeae ia maitai atu â tera porotarama roro uira. Ua tuuhia te mau video. Ua haaputuputuhia te mau papai e video no te mau putuputuraa i raro aˈe hoê noa tuhaa. A taumi ai i nia i te hoê irava Bibilia, e matara atoa mai te buka Maimiraa Bibilia no te mau Ite no Iehova.

 E faaohipahia te JW Library i nia vaˈu mirioni matini afaifai taa maitai i te mau mahana atoa e i nia hau atu 15 mirioni matini afaifai i te avaˈe hoê. Eaha te titauhia ia tere maitai tera porotarama roro uira i nia i te mau matini? Te faataa ra te taeae Willies: “E titauhia ia ohipa noa matou i nia i tera porotarama roro uira no te tuu i te mea apî e no te faaohie i ta ˈna faaohiparaa. Inaha e faaapî-noa-hia te mau porotarama no te mau matini roro uira atoa, e titauhia ia matou ia haapao e te tere noa ra ta matou porotarama roro uira i nia i taua mau matini ra. E titau-atoa-hia ia faaapî i ta matou mau matini no te mea e rave rahi atu â papai e haruharuraa ta matou e tuu i nia JW Library.” I teie mahana, te vai ra 200 000 papai e hau atu 600 000 haruharuraa e video na roto e rave rau reo i nia JW Library.

 Ia tere maitai noa tera porotarama, e titauhia hau atu â matini roro uira. Oia atoa ia hoohia mai i te mau parau faatia no te faaohipa i te tahi mau porotarama roro uira. E aufauhia hau atu 160 000 moni farane i te matahiti tataitahi no hoê noa parau faatia. E aufau atoa te Tuhaa e haapao i te porotarama MEPS hau atu hoê mirioni moni farane i te matahiti tataitahi no te hoo mai i te mau matini roro uira. Mea faufaa te reira no te ite te tere maitai noa ra anei te JW Library i nia i te mau matini roro uira, matini afaifai e niuniu paraparau afaifai apî.

 Maoti te JW Library, ua iti mai te mau haamâuˈaraa i te pae o te neneiraa e haponoraa i te mau papai. Ei hiˈoraa, i 2013, ua neneihia fatata 12 mirioni buka iti E hiˈopoa anaˈe i te mau Papai. I 2020 râ, ua neneihia e pae mirioni noa o taua buka ra, noa ˈtu e 700 000 taata poro apî tei taiohia na te ao nei. No te aha ïa ua iti mai tei neneihia? No te mea e rave rahi taeae e tuahine te taio ra i te irava mahana i nia JW Library. a

 E tauturu atoa te JW Library i te taata na roto e rave rau ravea. No Geneviève e ora ra i Kanada, ua haapii pinepine aˈe o ˈna i te Bibilia maoti tera porotarama roro uira. Te faatia ra o ˈna: “Aita vau e huna, mai te peu e titauhia ia ˈu ia haere e tii e rave rahi buka no ta ˈu iho haapiiraa, aita paha vau e na reira i te mau poipoi atoa. Maoti râ tera porotarama roro uira, e rave au i ta ˈu matini afaifai e te vai ra pauroa ta ˈu e hinaaro no te haapii. Ua puai atu â to ˈu faaroo e ua faafatata ˈtu â vau ia Iehova a haapii tamau ai i te Bibilia.”

 I te tau maˈi pee COVID-19, ua itehia te faufaaraa o tera porotarama roro uira. Te faataa ra o Charlyn no Marite: “Ua itehia te maˈi pee COVID-19 na te ao nei e aita vau i fanaˈo aˈe i te mau papai neneihia i te roaraa hoê matahiti. Maoti râ te JW Library, ua tamau vau i te fanaˈo i te maa pae varua. Mauruuru Iehova no tera ô î i te here.”

 E rave rahi o te manaˈo ra mai ia Faye no Philipino. Teie ta ˈna i parau: “E faaohipa vau i tera porotarama roro uiraa faahiahia mau no te vai piri ia Iehova. Tera te mea matamua ta ˈu e taio i te mau poipoi atoa. Tera ta ˈu e faaroo a rave ai i ta ˈu ohipa i te fare. O ta ˈu atoa e faaohipa nei no te mau putuputuraa, no te faaineine i ta ˈu haapiiraa Bibilia. E mataitai au i te mau video i te taime vata. E taio vau i te mau vea aore ra i te Bibilia a tiai ai i te hoê vahi. Mea faahiahia mau te reira.”

 Mea faufaa atoa tera porotarama i roto i te taviniraa. Ei hiˈoraa, a poro ai te hoê tuahine i Cameroun, ua hinaaro o ˈna e faaohipa i te hoê irava Bibilia ta te tahi atu tuahine i faaite atu tau hebedoma i mairi. Tera râ, aita o ˈna i haamanaˈo eaha tera irava. Te faataa ra o ˈna: “Auaˈe ua haamanaˈo vau i te hoê pereota o te irava. Ua rave au i te porotarama roro uira, ua pata vau i nia i te Bibilia e ua imi au i te pereota. Oioi au i te iteraa i te irava. Ma te faaohipa i te JW Library, e nehenehe au e ite e rave rahi irava Bibilia tei moˈehia ia ˈu.”

 Ua horoa outou i te mau ô na roto i te mau ravea faataahia i nia donate.isa4310.com. Maoti te reira, ua nehenehe matou e haamau e e haamaitai i te JW Library no te mau taeae e tuahine na te ao nei. Mauruuru maitai no to outou huru feruriraa horoa noa.

1. Atopa 2013: Ua matara mai te porotarama roro uira no te taio i te huriraa Bibilia faaapîhia o te New World Translation

2. Tenuare 2015: Te tahi atu mau papai tei tuuhia, na roto i te reo Beretane na mua e na roto hau atu hanere reo i muri iho

3. Novema 2015: E nehenehe e reni i tei papaihia

4. Me 2016: Ua tuuhia te tuhaa no te mau putuputuraa

5. Me 2017: E nehenehe e tuu i te mau nota

6. Titema 2017: Ua tuuhia te Bibilia haapiiraa (Beretane)

7. Mati 2019: E nehenehe e rave mai i te mau haruharuraa e haapurororaa video, oia atoa e faaohipa i te Maimiraa Bibilia no te mau Ite no Iehova

8. Tenuare 2021: Ua tuuhia te mau tuhaa o te buka Ia ora oe e a muri noa ˈtu!