Mai te 6 e tae au i te 16 no Tiunu 2013, e mirioni taata no te ao atoa nei tei ruru i te uahu no Rouen, i te pae apatoerau o Farani. No te aha? No te Armada, te hoê haaputuputuraa rahi roa ˈˈe e nehenehe roa ˈˈe o te mau pahi.

No te tapae i Rouen, ua titauhia i te pahi nehenehe roa ˈˈe e i te pahi rahi roa ˈˈe ia fano 120 kilometera i nia i te Seine, te hoê anavai tioioi i te tuhaa fenua nehenehe mau o Normandie. Ua faaineinehia te hoê uahu e hitu kilometera i te roa no ratou. Ahuru tiahapa mahana, ua tia i te taata ia haere ma te tamoni ore i nia i na 45 pahi taie tahito e pahi rarahi tei haaputu i ǒ.

No te aha te taata e rave rahi roa o te mau faito matahiti atoa e haere ai i te Armada? Ia au i te taata tei haamau e tei faanaho i tera tupuraa, maoti te Armada e nehenehe ai te taata e “piri atu â i tera mau ‘Aito o te moana.’” No te rahiraa o te taata, tei apî e tei paari, e manaˈo ratou i te mau tere atea e i te tiamâraa a ite ai i te mau pahi taie rarahi.

Ua tia atoa i e tausani ratere ia faaroo i te parau o te tahi atu huru tiamâraa, tera ta te parau mau Bibilia e pûpû ra. (Ioane 8:31, 32) A mataitai ai i te oire tahito roa e te nehenehe mau o Rouen e a na roto ai i to ˈna mau aroâ pirihao tei î i te taata, ua ite iho â te mau ratere i te mau iri afaifai a te mau Ite no Iehova no ǒ. A piri ai te mau ratere e te feia ihitai i te tahi iri afaifai, e parauhia ˈtu ratou ia rave i te tahi papai Bibilia, mea tamoni ore. Mea rahi tei anaanatae i te tumu parau “Afea te hoê ao aita e manaˈo oti noa?” (aita na roto i te reo Tahiti) i roto i te vea Te Pare Tiairaa. Ua titau-manihini-atoa-hia ratou ia haere e faaroo i te hoê oreroraa parau Bibilia na roto i te reo Farani, Marite aore ra Paniora.

Ua faaite te feia no ǒ e ua au ratou i tei ravehia. Ua maere na mua te hoê taata i te ite i te mau Ite no Iehova e tia ra i pihai iho i te hoê iri afaifai. Ua parau o ˈna i muri iho: “Ua oaoa vau i te ite ia outou i roto i te aroâ. Te faatura nei au i te feia e paturu ra i ta ratou e tiaturi ra noa ˈtu e e ere hoê â faaroo ta tatou.” Ua parau atu e piti taata paari i na Ite no Iehova apî ta raua i farerei i pihai iho i te hoê iri afaifai: “E nehenehe orua e oaoa i ta orua e rave ra!”