Mai te 13 e tae atu i te 16 no Novema 2014, ua faanahohia te hoê faaiteiteraa buka nunaa rau i te pu parauhia Palais des Congrès i Toronto. E faaiteitehia te mau buka neneihia e te mau buka taiohia i nia i te hoê matini roro uira aore ra matini roro uira afaifai. I tera na mahana e maha, ua haere hau atu 20 000 taata i tera faaiteiteraa.

Ua apiti atoa te mau Ite no Iehova i tera tupuraa. Ua faanaho ratou i te hoê vahi faaiteiteraa iti maramarama e te oraora. Oia atoa i te mau iri vairaa matini roro uira afaifai no te faaite e nafea ia faaohipa i te jw.org.

Ua parau hoê o te mau taata haapao i tera tupuraa: “No teie tau iho â ta outou reni natirara. Manaˈo anaˈe vau mea au roa ia haapii vetahi e nafea outou i te raveraa.” Ua parau te feia mataitai e mea maitai roa te reni natirara e e mea ohie ia haere i nia iho. Hau atu â, te faahiti ra te reira i te mau uiraa faufaa. Ua maere atoa ratou e e tauturu te reni natirara i te taata ia faaruru i to ratou mau fifi e ta ratou mau tapitapiraa.

Ua taa i te mau Ite no Iehova tei apiti i teie faaiteiteraa e a tahi ra te rahiraa o te feia mataitai i te iteraa i te jw.org. Ua farii te rahiraa o te feia mataitai i te hoê tareta haamaramaramaraa aore ra te api parau Ihea e ite ai i te pahonoraa i te mau uiraa faufaa roa o te oraraa? E rave rahi o tei parau e e haere faahou ratou i nia i te reni natirara. Ua ani vetahi i te mau Ite no Iehova ia haere e farerei ia ratou i to ratou fare.

I te faaiteiteraa buka, ua haamauhia te mahana pae ei “Mahana no te mau tamarii.” Ua faaite ïa te mau Ite no Iehova i te mau video itehia i nia jw.org. Ua haere te tahi mau pǔpǔ tamarii e ta ratou orometua haapii i ta te mau Ite no Iehova faaiteiteraa e ua mataitai ratou i tera mau video.

Ua tae atoa ˈtu te hoê taata no Chicago o te ohipa ra i roto i te hoê taiete neneiraa Bibilia. E ua au roa oia i te buka Les Saintes Écritures. Traduction du monde nouveau itehia i nia i te iri vairaa papai. Ua hinaaro oia ia ite o vai tei nenei i te reira e ua horoahia o ˈna i te tahi tareta haamaramaramaraa.

Ua hurihia te reni natirara na roto e hau atu 700 reo. I tera faaiteiteraa, ua faaohipa te feia mataitai i te reni natirara na roto e 16 reo: te reo Amharique, Bengali, Beretane, Farani, Gujarati, Heleni, Hindi, Korea, Paniora, Potiti, Tamil, Tigrinya, Tinito, Tuete, Urdu e te reo Viêt Nam.

Ua parau te hoê Ite no Iehova tei apiti i teie faaiteiteraa e e mea taa ê roa te parauraa i te taata e te vai ra te reni natirara e te faaiteraa ia ratou i te reira. Ua na ô oia: “E tupuraa faahiahia mau te reira no te faaite atu i ta tatou reni natirara.”