I te roaraa o te COVID-19, ua tamau noa to tatou mau taeae e tuahine i te faatae i te poroi tamahanahana a te Bibilia ia vetahi ê. Aita faahou ratou i poro i te vahi taata aore ra i tera e tera fare. Ua tamau noa râ ratou i te poro ma te papai i te rata e na roto i te niuniu paraparau. a Ua mauruuru e rave rahi taata no ta ratou mau tutavaraa e papu maitai ua haamaitai Iehova ia ratou. (Maseli 16:3, 4) E hiˈopoa anaˈe i te tahi mau faatiaraa itoito mau no ǒ mai i te tahi fenua.

 Hou a tupu ai te maˈi pee, ua haere noa Helen e farerei i te tahi vahine apî e ua pûpû atu i te haapiiraa Bibilia. Aita râ teie vahine i farii. Noa ˈtu râ, te mahana na mua ˈtu te tau opanipaniraa no te COVID-19, ua horoa Helen ia ˈna i te hoê Bibilia e te buka Eaha ta te Bibilia e haapii mai? I te roaraa o te tau opanipaniraa, ua ani faahou Helen ia ˈna ia haapii i te Bibilia na roto râ i te niuniu paraparau. I tera taime ra, ua farii o ˈna. Ua au roa teie vahine i ta ˈna haapiiraa Bibilia e ua hinaaro o ˈna e haapii pauroa te mahana. Ua haamata atoa o ˈna i te apiti i te mau putuputuraa Kerisetiano na roto i te niuniu paraparau. Hau atu â, te faaohipa ra o ˈna i ta te Bibilia e haapii ra i roto i to ˈna oraraa e te faaite atoa ra o ˈna ia vetahi ê i te mau mea ta ˈna e haapii ra.

 I roto i te tahi amuiraa, ua papai te mau taeae e tuahine i te rata i te mau mutoi o to ratou oire no te haamauruuru ia ratou no te ohipa ta ratou e rave ra. Ua maere roa te mau mutoi. Ua parau te tahi mutoi ia Jefferson, te hoê matahiapo o te amuiraa: “Ua manaˈo vau aita te mau Ite no Iehova e au i te mau mutoi.” Ua faataa o taeae Jefferson e ere roa ˈtu te reira i te parau mau. Ua au roa te mau mutoi i te manaˈo faaitoito papaihia e ua tuu ratou i teie mau rata i te tomoraa o te aua mutoi. Ua parau te tahi atu mutoi: “E tauturu te reira ia vetahi ê ia faatupu i te manaˈo maitai no nia ia matou.”

 E pionie b tamau o Edna e Ednalyn. No te mea aita ta raua e natirara i te fare, aita raua i apiti i te mau putuputuraa. Ua taniuniu ïa i to raua taata tapiri no te ani e nehenehe anei raua e faaohipa i ta ˈna natirara ma te horoa ˈtu i te hoê tino moni. Ua farii teie vahine ia nati raua ma te tamoni ore râ. I to Edna e Ednalyn titau-manihini-raa ia ˈna i te mau putuputuraa, ua farii oia. I teie nei, te haapii atoa ra hoê tamarii ta ˈna e e piti mootua i te Bibilia e te tamau ra ratou i te apiti i te mau putuputuraa Kerisetiano.

 Ua titau manihini atoa te mau taeae e tuahine i to ratou taata tapiri, hoa rave ohipa e te tahi atu taata no te faaroo i te hoê oreroraa parau no te taata atoa na roto i te natirara. Ua taiâ râ Ellaine, rave ohipa i te fare maˈi, i te titau manihini i to ˈna mau hoa rave ohipa, ma te manaˈo aita te tahi mau taote e au i te mau Ite no Iehova. Noa ˈtu râ, ua titau manihini o ˈna i te mau taote o te fare maˈi na roto i te niuniu afaifai. Ua taiâ roa râ Ellaine i te titau manihini i na hoa faaipoipo e taote raua. Ua feruri e ua pure o ˈna e hapono atura i te titau-manihini-raa. Ua pahono mai te taote vahine: “E hinaaro ïa oe ia riro vau ei Ite no Iehova?” Ua parau Ellaine e nehenehe pauroa te taata e apiti i te mau putuputuraa, e ere noa te mau Ite no Iehova . I te mahana i muri iho, ua maere Ellaine i te iteraa e ua nati oioi raua i te putuputuraa! Hou a faaoti ai te putuputuraa, faatae atura teie taote vahine i te hoê poroi ia Ellaine o tei na ô ra: “A tahi ra vau e putuputu ai e te mau Ite no Iehova. Mea anaanatae roa. Ua au roa vau. Mauruuru roa no te titau manihini ia ˈu.”

 Ua titau manihini Ellaine e 20 taote i te putuputuraa e ua oaoa oia i te iteraa ua apiti mai 16 o ratou. Mai te aposetolo Paulo, ua parau o ˈna: “Ua oaoa roa vau e ua horoa mai te Atua i te mǎtaˈu ore no te faaite i te parau apî oaoa e to ˈu mau hoa rave ohipa.”—Tesalonia 1, 2:2.

 Ua fifihia te feia atoa i te COVID-19. Tera râ i teie fenua e te tahi atu mau vahi, ua oaoa noa to tatou mau taeae e tuahine i te tamahanahana e i te tauturu ia vetahi ê.—Ohipa 20:35.