MATAUPU E 35

E mafai pefea o fai au mo taugasoa o te Atua?

E auala i fakalavelave totino, ne kamata o fakatāua ne Jeremy a te tāua ke maua se va fakataugasoa mo te Atua. “I te taimi ko 12 ei oku tausaga, ne tiaki ne toku tamana te motou kāiga,” ko tena fakamatalaga. “I te po e tasi ne ‵talo atu au i te moega, kae fakamolemole ki a Ieova ke fai aka toku tamana ke toe foki mai.”

Ona ko tena loto fanoanoa, ne kamata o faitau a Jeremy ki tena Tusi Tapu. I tena faitauga ki te Salamo 10:14, ne otia malosi tena loto. I te fuaiupu tenā, e fai mai e uiga ki a Ieova: “E ‵fuli atu ki a koe a te tino ne ta. Ko koe te tino e fesoasoani ki te tamaliki e seai sena tamana.” E fai mai a Jeremy: “Ko pelā loa me ko faipati mai a Ieova ki a au kae fai mai me i a ia ko toku fesoasoani; a ia ko toku Tamana. Ko oi te tamana e sili atu tena ‵lei i lō ia?”

 FAITALIA me ne tai ‵pau tou tulaga mo Jeremy io me ikai, e fakaasi mai i te Tusi Tapu me e manako a Ieova ke fai koe mo fai tena taugasoa. A te ‵tonuga loa, e fai mai te Tusi Tapu: “Fakapilipili atu ki te Atua, kae ka fakapilipili mai a ia ki a koutou.” (Iakopo 4:8) Mafaufau ki te uiga o pati konā: E tiga eiloa e se mafai o lavea ne koe a ia—kae e se taitai o ‵pau a ia mo koe i so se tulaga—e ‵kami ne Ieova te Atua a koe ke fai mo ana taugasoa!

Kae e uke a mea e ‵tau o fai ke fai taugasoa ei koe mo te Atua. Ke fai se fakatusaga: Kafai e isi sau lakau e ‵toki i te fale, e iloa ‵lei ne koe me ka se mafai o tupu aka i a ia eiloa. Ko te mea ke tupu olaola, e ‵tau o fakasiusiu faeloa kae tuku i se koga telā e mafai o ola ‵lei i ei. E penā foki te fai taugasoa mo te Atua. Ne a mea e mafai ne koe o fai ke fesoasoani atu ki te fakamalosiakaga o se va fakataugasoa penā?

Te Tāua o Sukesukega ki te Tusi Tapu

A te fai taugasoa e aofia i ei a auala e lua o fesokotakiga—ko te fakalogologo mo te faipati. E penā foki a te fai taugasoa mo te  Atua. A te faitau mo te sukesuke ki te Tusi Tapu ko te auala e fakalogo‵logo ei tatou ki pati mai te Atua.—Salamo 1:2, 3.

E tonu, e mafai o se fiafia koe ki te faiga o sukesukega. E sili atu te fia‵fia o nisi talavou ke onoono ki te TV, ta‵fao, io me sau‵tala fua mo taugasoa. Kae kafai e manako koe ke ati aka se va fakataugasoa mo te Atua, e seai se auala faigofie ki ei. E ‵tau mo koe o fakalogologo ki a ia mai te sukesuke ki tena Muna.

Kae sa manavase. E se ‵tau o fai te sukesuke ki te Tusi Tapu mo fai se amoga ‵mafa. E mafai eiloa o fiafia koe ki ei—faitalia me e se fiafia koe o fai a sukesukega. A te mea muamua e ‵tau o fai ne koe, ke fakaavanoa se taimi mō sukesukega ki te Tusi Tapu. “E isi saku polokalame ne fakatoka,” ko muna a se tamaliki fafine e igoa ki a Lais. “A te mea muamua e fai ne au i taeao katoa ko te faitau ki se mataupu e tasi o te Tusi Tapu.” A Maria, ko 15 ana tausaga, e ‵kese foki tena polokalame. “E faitau au ki nai vaega o te Tusi Tapu i po katoa kae koi tuai au o moe,” ko ana pati.

Ke fakatoka sau polokalame totino mō sukesukega, onoono ki te  pokisi i te itulau e 292. Ka oti ko tusi ei ki lalo a te taimi telā e mafai ne koe o fakamāumāu se 30 minute ke sukesuke ki te Muna a te Atua.

․․․․․

A te fakatokaga o te taimi ko te kamataga fua. I te taimi eiloa e kamata ei au sukesukega, e mafai o poi koe me i te faitau ki te Tusi  Tapu e se faigofie faeloa. Kāti e lotomalie koe ki pati a Jezreel, ko 11 ana tausaga, telā ne fai ‵tonu mai: “E isi ne vaega o te Tusi Tapu e ‵tau o ‵saga faka‵lei atu ke malamalama i ei kae e se ‵gali katoa.” Kafai e penā foki ou lagonaga, ke sa ‵fiu. Ke fai faeloa au sukesukega ki te Tusi Tapu mo te kilokiloga me ko fakaaoga ne koe a te taimi tenā ke fakalogologo ki a Ieova te Atua, tou taugasoa. Kae e faka‵na eiloa ki a koe a te faiga o sukesukega ki te Tusi Tapu ke fai mo fai se mea gali kae fakafiafia!

E Tāua te ‵Talo

A te ‵talo ko te auala e fai‵pati atu ei tatou ki te Atua. Mafaufau la ki te fakaofoofogia o te meaalofa ko te ‵talo! E mafai ne koe o kalaga atu ki a Ieova te Atua i so se taimi o te aso io me ko te po. E avanoa faeloa a ia. E sili atu i ei, e manako foki a ia o fakalogologo ki au pati e fai atu. Tenā te pogai e fakamalosi mai ei a te Tusi Tapu ki a koe: “Ke tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga.”—Filipi 4:6.

E pelā mo te mea e fakaasi mai i te tusi siki tenā, e mafai o faipati atu koe ki a Ieova e uiga ki so se mea. Kāti e aofia i ei ou fakalavelave mo mea e manavase koe ki ei. E mafai foki o aofia a mea kolā e loto fiafia koe ki ei. A te ‵tonuga loa, e a, e se fakafetai atu koe ki ou taugasoa mō mea ‵lei ne fai ne latou mō koe? E mafai foki o fai ne koe penā ki a Ieova, telā e uke atu a mea ne fai ne ia mō koe i lō mea e mafai o fai ne so se isi taugasoa.—Salamo 106:1.

Tusi mai lalo a nisi mea kolā e loto fakafetai ei koe ki a Ieova.

․․․․․

 E mautinoa eiloa me i nisi taimi, e mafai o ‵mafa i tou mafaufau a nisi mea kolā e mataku kae manavase koe ki ei. E fai mai te Salamo 55:22: “‵Pei atu tau amoga ki a Ieova, kae ka tausi ne ia koe. Ka se talia eiloa ne ia se tino amiotonu ke siga.”

 Tusi mai lalo so se mea telā e manavase koe ki ei kae e manako koe ke ‵talo atu e uiga ki ei.

․․․․․

Tala Totino

E isi foki se vaega o tou va fakataugasoa mo te Atua telā e se ‵tau o fakaseaoga ne koe. Ne tusi mai te faisalamo ko Tavita: “‵Tofo aka kae ka lavea atu a te ‵lei o Ieova.” (Salamo 34:8) I te taimi ne ‵fatu ei ne Tavita a te Salamo e 34, ne fatoa sao atu eiloa a ia i se tulaga fakamataku. Ne tele atu a ia keatea mai te Tupu tatino ko Saulo—se tulaga fakamataku kae faigata. Kae ne ‵tau o faka‵lafi atu a ia i va o ana fili, ko te kau Filisitia. Mai te fakafesagai atu ki se tulaga telā ne foliga mai me ka mate eiloa a ia i ei, ne fakafoliga atu ei ne Tavita i se auala poto me i a ia ko fakavalevale kae ne sao atu ei a ia.—1 Samuelu 21:10-15.

Ne seki mafaufau lele a Tavita me ne sao amate atu a ia ona ko tena poto. I lō te fai penā, ne avatu ne ia a tavaega ki a Ieova. Mai mua o ana pati i te salamo telā ne taku atu mai luga, ne tusi mai a ia: “Ne fesili atu au ki a Ieova kae ne tali mai a ia ki a au. Ne fakasao ne ia au mai mea katoa e mataku au ki ei.” (Salamo 34:4) Kae  mai tena tala totino tenei, ne mafai ei ne Tavita o fakamalosi atu ki nisi tino ke “‵tofo aka kae ka lavea atu a te ‵lei o Ieova.” *

E a, e masaua ne koe se tala i tou olaga telā e tuku mai i ei se fakamaoniga o te atafai o Ieova? Kafai e isi, ke tusi mai lalo. Manatu: E se manakogina ke fakaofoofogia ‵ki tau tala. Taumafai o mafaufau ‵loto ki tamā fakamanuiaga i aso katoa, ko nisi mea kolā kāti e faigofie ke manatu mā‵ma ki ei.

․․․․․

Kāti ne akoako koe ne ou mātua ki mea i te Tusi Tapu. Kafai e penā loa, a te mea tenā se fakamanuiaga. Kae koi ‵tau eiloa o ati aka ne koe tou va fakataugasoa totino mo te Atua. Kafai e seki fai koe penā, e mafai o fakaaoga ne koe a fakamatalaga i te mataupu tenei ke fesoasoani atu ki a koe ke na kamata. Ka fakamanuia ne Ieova au taumafaiga. E fai mai te Tusi Tapu: “Tumau i te fakamolemole atu, kae ka tuku mai ki a koutou; tumau i te salasala atu, kae ka maua ne koutou.”—Mataio 7:7.

KE FAITAU KI MEA E UKE ATU E UIGA KI TE MATAUPU TENEI I TE TUSI 1, MATAUPU 38 MO TE 39

I TE TOU SUĀ MATAUPU

E a, e faigata ke faipati atu koe ki nisi tino e uiga ki te Atua? Tauloto ki te auala e mafai ei ne koe o ‵pulu ou talitonuga.

[Fakamatalaga mai lalo]

TUSI FAITAU TĀUA

“E fia‵fia a latou kolā e iloa ‵lei ne latou olotou manakoga faka-te-agaga.”—Mataio 5:3.

MANATU

Faitau fua ki itulau e fa o te Tusi Tapu i aso katoa, kae ka palele tau faitauga i se tausaga.

E ILOA NE KOE . . .?

A te manatu me ko faitau koe ki te tusi tenei kae talia a pati fakatonutonu kolā e fakavae ki te Tusi Tapu, e fakaasi mai i ei me ko saga tonu atu a Ieova ki a koe.—Ioane 6:44.

AKU PALANI!

Ke maua a mea aoga e uke mai taku faitauga ki te tusi Tapu, au ka ․․․․․

Ke momea aka toku ‵talo atu faeloa, au ka ․․․․․

Mea e fia fesili atu au ki oku matua e uiga ki te mataupu tenei ․․․․․

SE A TAU FAKA‵TAU?

● E mafai pefea o fai ne koe ke momea aka te fakafiafia o au sukesukega totino ki te Tusi Tapu?

● Kaia e manako a Ieova ke fakalogologo ki ‵talo a tino sē ‵lei katoatoa?

● E mafai pefea o momea aka te ‵lei o au ‵talo?

[Ko manatu tāua e 291]

I te taimi koi foliki ei au, ne fakafoki‵foki atu faeloa a pati i aku ‵talo. Nei la, ko taumafai au ke ‵talo atu e uiga ki mea ‵lei mo mea sē ‵lei e ‵tupu i aso takitasi. Ona ko te mea e se mafai o ‵pau a mea e ‵tupu i aso e lua, e fesoasoani mai a te mea tenei ke mo a ma fakafoki‵foki atu faeloa aku pati.’’—Eve

 [Pokisi/​Ata i te itulau e 292]

 Sukesuke ki Tau Tusi Tapu

1. Fili se tala i te Tusi Tapu telā e fia faitau koe ki ei. ‵Talo ke maua te poto ke malamalama koe i te tala.

2. Faitau faka‵lei te tala. Faitau malielie. I te taimi e faitau ei koe, ke fakaataata i tou mafaufau au mea e faitau. Ke fakaaoga ou lagonaga katoa e mafai o fakaaoga: Taumafai ke lavea ne koe a mea e ‵tupu i te tala, ke lagona ne koe a leo o tino e aofia i ei, ke ‵sogi ne koe te manogi o te ea, te ‵tami o meakai, mo nisi mea penā. Fai ke ola te tala i tou mafaufau!

3. Mafaufau ki au mea ne fatoa faitau. Ke fesili ifo penei:

● Kaia ne aofia ne Ieova te tala tenei i tena Muna?

● Ko oi a tino e ‵tau o fakaakoako ki a latou, kae ko oi e fai pelā me ne fakaakoakoga sē ‵lei?

● Ne a akoakoga aoga e mafai o tauloto ne au mai te faitauga tenei?

● Se a te mea e akoako mai ne te tala e uiga ki a Ieova mo ana faifaiga?

4. Ke fai se tamā ‵talo ki a Ieova. Fai atu ki a ia a mea ne tauloto ne koe mai i tau sukesukega ki te Tusi Tapu mo te auala e mafaufau koe ke fakagalue aka a mea konā i tou olaga. Ke fakafetai atu faeloa ki a Ieova mō te meaalofa ne tuku atu ne ia ki a koe—tena Muna, ko te Tusi Tapu!

[Ata]

“A tau muna se moli ki oku vae, kae se mainaga ki toku auala.”—Salamo 119: 105.

[Pokisi/​Ata i te itulau e 294]

Mea e ‵Tau o Fakamuamua

Ko tō fakalavelave ke ‵talo? E seai se taimi ke sukesuke ki te Tusi Tapu? E faka‵na eiloa ki te fakasologa o mea kolā e fakamuamua ne koe.

Tofotofo aka ki te mea tenei: Ke puke mai se paketi kae tuku atu ne fatu tai ‵lasi ki loto. Nei la, ke faka‵fonu ne koe ki one. Ko maua ne koe se paketi telā e ‵fonu i fatu ‵lasi mo one.

Nei la, ke ‵ligi ki tua a mea i te paketi kae tausi a one mo fatu foki konā. Tofotofo ki te suā mea tenei: ‵Ligi atu a one konā ki te paketi, kae ka oti, ko tuku atu a fatu ‵lasi ki loto i te paketi. E se ofi? Ona ko te mea ne tuku atu muamua ne koe a one i te taimi nei.

Se a te manatu? E fai mai te Tusi Tapu: “Ke fakamautinoa aka ei ne koutou a mea kolā e sili atu i te tāua.” (Filipi 1:10) Kafai e fakamuamua ne koe a tamā mea fo‵liki pela mo fakafiafiaga, ka seai eiloa sou taimi i tou olaga mō mea ‵lasi—ko mea faka-te-agaga. Kae kafai e fakagalue ne koe a te fakamalosiga tenei i te Tusi Tapu, ka iloa aka ne koe me ka isi eiloa sou taimi ki manakoga o te Malo kae penā foki mo nai fakafiafiaga. E faka‵na eiloa ki mea muamua e tuku atu ne koe ki tau paketi!

[Ata i te itulau e 290]

E manakogina a taumafaiga ke fakamalosi aka a te va fakataugasoa mo te Atua, e pelā mo se lakau telā e ‵toki i te fale