Ne a mea ka fesoasoani atu ke mafai o gali tau faitauga ki te Tusi Tapu kae maua a mea aoga e uke mai i ei? Mafaufau ki manatu fesoasoani e lima kolā ko oti ne aoga ki tino e tokouke.

Se koga ‵lei. Taumafai ke maua se koga telā e filemu. Fakamu‵tana a mea e mafai o fakalavelave atu ko te mea ke saga tonu atu koe ki tau faitauga. Ka mafai foki o maua ne koe a mea aoga e uke mai tau faitauga māfai e maina ‵lei kae e isi foki se ea fou i te koga tenā.

Se mafaufau ‵lei. Ona ko te Tusi Tapu se tusi mai te ‵tou Tamana faka-te-lagi, ka aoga malosi eiloa ki a koe māfai e fai koe pelā me se tamaliki ko toka o tauloto mai i se mātua alofa. Kafai e isi ne ou manatu sē ‵lei kae ma‵losi e uiga ki te Tusi Tapu, taumafai o fakatafa malie ko te mea ke mafai o akoako koe ne te Atua.—Salamo 25:4.

‵Talo a koi tuai koe o faitau. E maua i te Tusi Tapu a manatu o te Atua, tela la, e ‵tau eiloa o maua ne tatou tena fesoasoani ke malamalama i ei. E tauto mai te Atua me ka tuku atu ne ia “te agaga tapu ki tino kolā e fakamolemole ki a ia.” (Luka 11:13) E mafai o fesoasoani atu te agaga tapu ke malamalama koe i mafaufauga o te Atua. E se leva kae ka ‵tala ne ia tou mafaufau ke malamalama koe “ke oko eiloa ki mea ‵loto a te Atua.”—1 Kolinito 2:10.

Faitau ke malamalama. Sa faitau fua ke fakaoti te mataupu kātoa. Mafaufau malosi ki mea e faitau koe ki ei. Fesili ifo penei: ‘Ne a uiga e lavea ne au i te tino tenei e faitau au e uiga ki ei? E mafai pefea o fakagalue aka ne au te mea tenei i toku olaga?’

Fakamoemoega ke kausaki ki ei. Ko te mea ke gali tau faitau ki te Tusi Tapu, fakatoka ke tauloto ne koe se mea telā ka aoga ‵ki ki tou olaga. Kāti e mafai o kausaki koe ki vaegā mea penei: ‘Au e fia tauloto ki mea e uke atu e uiga ki te Atua.’ ‘Au e fia fai mo fai se avaga tagata io me se avaga fafine tai ‵lei atu.’ Ko filifili ei ne koe a vaega o te Tusi Tapu kolā ka fesoasoani atu ke fakataunu ou fakamoemoega konā. *

Ka aoga eiloa a manatu fesoasoani konei e lima māfai ko kamata tau faitauga. Kae ne a mea ka fai ei ke momea aka te gali o tau faitauga? Ka tuku mai ne te suā mataupu a nisi manatu fesoasoani.