TE POGAI E FAKALOTOLOTOLUA EI A NISI TINO: E ‵tusa mo se sukesukega fakamuli nei, e aofia i te ‵tou kaniva a te 100 piliona o paneta i ei. Ona ko te lasi o te iunivesi, e fesili mai penei a tino e tokouke, ‘Kaia e ‵tau ei o tausi mai a te Mafuaga malosi katoatoa ki mea e fai ne tino ma‵lalo i se paneta foliki ‵ki?’

FAKAMATALAGA MAI TE TUSI TAPU: E se tuku mai ne te Atua a te Tusi Tapu kae oti aka ko se fia saga mai a ia ki a tatou. I lō te fai penā, e fakatalitonu mai a Ieova ki a tatou: “Ka fakatonutonu kae akoako ne au a koe.”—Salamo 32:8.

Mafaufau ki a Hakala, se fafine Aikupito telā ne ola i te 20 senitenali T.L.M. Ne seki āva a ia ki tena pule, ko Salai, telā ne fakamasiasi ei ne Salai tou fafine, kae ne tele atu a Hakala ki te koga lavaki. Ona ko te mea ne fai ne Hakala se mea ‵se, e mata, ne seki fia saga atu te Atua ki a ia? E lipoti mai te Tusi Tapu: “Ne fakafetaui atu te agelu a te Aliki [ko Ieova] ki a Hakala.” Ne fakatalitonu atu ne te agelu tenā ki a Hakala, mai te fai atu: “Ko oti ne lagona ne te Aliki tau tagi fanoanoa.” Ne fai atu ei a Hakala ki a Ieova: “Te Atua e lavea ne ia a mea katoa.”—Kenese 16:4-13.

A te “Atua [telā] e lavea ne ia a mea katoa” e tausi atu foki ki a koe. Ke fai se fakatusaga: E tausi atu eiloa se matua alofa, maise eiloa ki ana tamā tama‵liki, me i te foliki o te tamaliki, ko te lasi foki o te manakoga ke tausi atu ana mātua ki a ia. E penā foki loa, e tausi mai a te Atua ki a tatou, maise eiloa māfai e ma‵lalo kae vāi‵vai tatou. E fai mai a Ieova: “Au e nofo i te koga maluga kae tapu; e ‵nofo fakatasi foki au mo tino loto malalo kae loto sala‵mo, ko te mea ke toe fakamalosi ne au olotou loto mo olotou fakamoemoega.”—Isaia 57:15.

E tiga eiloa te feitu tenā, e mafai o fesili mai koe: ‘E tausi mai pefea te Atua ki a au? E mata, e fakamasino ne ia au i oku foliga, io me e kilo mai a ia mo te loto malamalama ki a au?’