Ikai. E fakaasi manino mai i te Tusi Tapu me ne faite ne te Atua a tino e pelā foki mo manu mo lakau i olotou “vaega” kese‵kese. (Kenese 1:12, 21, 25, 27; Fakaasiga 4:11) E fai mai me ne o‵mai a te kāiga katoa o tino i te gafa o Atamu mo Eva, kolā ko ‵tou mātua muamua. (Kenese 3:20; 4:1) E se ‵lago a te Tusi Tapu ki te akoakoga me ne fakaaoga ne te Atua a te evolusione ke faka‵tupu mai i ei a vaegā mea ola kese‵kese. A te ‵tonuga loa, e seai se mea e fakaasi mai i te Tusi Tapu me e ‵teke atu a ia ki sukesukega a saienitisi me e uke a vaega kese‵kese e mafai o maua mai i vaegā mea ola takitasi. *

•  E mata, ne fakaaoga ne te Atua te evolusione?

•  E mata, e fetaui te akoakoga ko te evolusione mo te Tusi Tapu?

•  Kae pefea la a lakau mo manu kolā e mafai o mafuli‵fuli?

E uke a manatu e aofia i te akoakoga me ne fakaaoga ne te Atua a te evolusione ke faka‵tupu mai i ei a vaegā mea ola kese‵kese. E ‵tusa mo te Encyclopædia Britannica, e fakamalosi aka ne te akoakoga tenei a te manatu me i “manu mo lakau kolā e mafuli‵fuli e ‵tusa mo fakanofonofoga ko te auala ne fakaaoga ne te Atua ke faite mai i ei a te lalolagi tenei.”

Konei a nisi manatu e aofia i te akoakoga me ne fakaaoga ne te Atua te evolusione ke ‵tupu mai ei a vaegā mea ola kese‵kese:

• Ne ‵tupu mai a mea ola kese‵kese katoa mai i olotou tupuga i aso mua loa.

• A te vaegā mea ola e tasi e mafai o mafulifuli kae tupu mai i ei se vaegā mea ola fakaatea telā e ‵kese ‵ki. E pelā mo te akoakoga me ne mafuli‵fuli a magiki kae ‵tupu mai i ei a tino.

• Kae kāti ko te Atua eiloa ne aofia i fakatokaga katoa konei.

A te akoakoga me ne fakaaoga ne te Atua te evolusione ke faka‵tupu mai i ei a vaegā mea ola kese‵kese e fakaasi mai ei me i te tala i te Tusi Tapu e uiga ki te faitega o mea, telā e sae mai i te Kenese, e sē se tala tonu. Kae ko Iesu ne fakasino atu ki tala i te Kenese me ne tala ‵tonu i aso mua. (Kenese 1:26, 27; 2:18-24; Mataio 19:4-6) E fai mai te Tusi Tapu me koi tuai o vau a Iesu ki te lalolagi, ne ola fakatasi a ia mo te Atua kae ne fesoasoani atu foki ke “faite a mea katoa.” (Ioane 1:3) Tela la, a te manatu me ne fakaaoga ne te Atua a te evolusione ke faka‵tupu mai i ei a vaegā mea ola kese‵kese e se fetaui mo akoakoga i te Tusi Tapu.

E se fakamatala mai i te Tusi Tapu me pefea te uke o vaegā mea ola e mafai o māfua mai i vaegā mea ola takitasi. Kae e se ‵teke foki ki te manatu me i vaegā manu mo lakau kese‵kese kolā ne faite ne te Atua e mafai o mafulifuli i te taimi e fanafanau ei io me māfai ko ‵kese foki a fakanofonofoga e ola i ei. E tiga loa e ‵kilo atu a nisi tino ki mafuli‵fuliga konei e pelā me se vaega o te evolusione, kae e seai se vaegā mea ola fou fakaa‵tea ne tupu mai i ei.