Pa November 23, 2023, Mudumbu Mary M, Larimer wali kutayika. Mudumbu uyu wakanjira kilasi lakwamba la sukulu ya Watchtower Bible College of Gilead. a Ndipo wakababika pa June 4, 1920, ku Scenery Hill, Pennsylvania, U.S.A. Mu 1935, apo wakaŵa na vyaka 15, wakabatizika pa ungano wa chigaŵa ku Washington, D.C., U.S.A. Pati pajumpha waka vyaka 4, mudumbu Larimer wakazomerezgeka kuwa mupayiniya wanyengozose ndipo wakamba kumanyikwa kuti ngwakulimbikira chomene.

Mu December 1942, Mary wakapokera kalata kufuma kwa Mubali Nathan Knorr, uyo wakadangiliranga gulu la Yehova. Ndipo Mubali uyu wakamuchiska mudumbu kuti wapemphe kukanjira sukulu yiphya yakuchemeka Watchtower Bible College of Gilead. Fundo yinyake mu kalata iyi yikaŵa yakuti “chilato cha sukulu iyi nkhunozgekereska ŵapharazgi ŵakwenelera, ŵanalume na ŵanakazi kuti ŵazakaŵe ŵamishonale mu vigaŵa vyose vya charu chapasi. Kilasi lililose lamuŵanga la myezi 5 . . . Sukulu iyi munthu wakukhumbikwira kulimbikira chomene kuŵerenga, kweniso kuŵikapo mtima kuti wamalizge pa nyengo yakuŵikika.” Mary wakalemberako nyengo yeneyiyo.

Pa February 1, 1943, iyo pamoza na ŵanyake 99, ŵakamba sukulu yiphya iyo yikaŵa mu chigaŵa cha South Lansing, New York, U.S.A. Pafupifupi myezi yose 5 ya sukulu iyi, Mary wakalimbikiranga chomene kuŵerenga kuti wamanye vinandi vya mu Malemba. Iyo wakachitanga makora chomene mu kilasi ndipo wakamalizga masambiro yake pa June 23, 1943.

Wati wamalizga kusambira, Mary ŵakamutuma ku Cuba kukachita umishonale. Pakulongosora za masuzgo agho wakakumana nayo pa uteŵeti uwo wakapika, iyo wakati: “Ku malo agha ŵanthu ŵakaŵa ŵakavu chomene. Nakuti para tikunjira mu uteŵeti tikeneranga kwenda pasi . . . Tikaŵavya magalimoto.” Mary wakalutilira kuchita uteŵeti uwu m’paka mu 1948, apo wakawelera ku Pennsylvania kuti wakapwelelere amama ŵake awo ŵakaŵa ŵalwari chomene. Vyaka vikati vyajumphapo, Mary wakaŵa kuti wandatengwe, ndipo wakachita vinandi mu uteŵeti kweniso nanga nkhuchitaso milimo yinyake. Panyengo iyo wakafwira wakaŵa kuti wakuteŵetera mu mpingo ku Glendale, California, U.S.A.

Pasono Sukulu ya Giliyadi iyi yikuchitikira ku Patterson, New York, uko sono kilasi la nambara 155 lili mukati. Mubali Mark Noumair uyo wakusambizga sukulu iyi, wati wapulika za yifwa ya Mary wakayowoya kuti: “Mary Larimer wakaŵa msungwana uyo wakafuma mu tawuni yichoko chomene ndipo wakajipeleka na mtima wose kukapharazgira ŵanthu za Yehova. Iyo wakamanyanga yayi uko ŵangamutuma kweniso usange wamuweraso. Nga ni Mary, ŵamishonale awo ŵasambira Sukulu ya Giliyadi ŵakovwira chomene kulutiska panthazi mulimo wakupharazga pa charu chose.—Yesaya 6:8.