Apo nkhondo yikasuzga chomene ku Chigaŵa cha Donetsk ku Ukraine, Mubali Mykola Bozhedomov wakenda maulendo ghanandi waka kuya ku Kramatorsk kuti wakawovwire ŵanthu ŵanandi kuchimbilira ku vigaŵa uko vinthu vikaŵako makora.

Ndipouli, pa April 8, 2022, Mykola wakafwa apo bomba likaphulika pa malo gha kukwelera sitima ya pamtunda ku Kramatorsk, Chigaŵa cha Donetsk.

Padera pa Mykola uyo wakaŵa na vyaka 58, mudumbu munyake nayoso wakaŵa mu gulu la ŵanthu ŵakujumpha 50 awo ŵakafwa na bomba ili. Mubali munyake wakapwetekeka pamoza na ŵanthu ŵanyake ŵakujumpha 100. Ŵakaboni ŵanyake awo ŵakapona apo bomba ili likaphulika, ŵakuti kukapulikikwa chiwawa chikuru maulendo ghaŵiri cha kuphulika kwa bomba, ndipo kufuma apo tuvisulo tukati waka limbwalimbwa kuchanya.

Nina, muwoli wa Mykola uyo ŵakhala lumoza mu nthengwa vyaka 32, wakuti: “Mfumu wane wakatemwanga kudangizga vyakukhumba vya ŵanji. Wakatemwanga chomene kovwira ŵachekuru na ŵapharazgi awo mbalwari. Kweni ulendo uliwose para wakuluta ku Kramatorsk, vinthu vikaŵanga kuti vikuhenipira. Uwu ukatenge uŵenge ulendo wake waumaliro kuluta ku chigaŵa ichi.”

Mykola na muwoli wake wose ŵakabatizika mu 1997. Mykola wakaŵa mubali mulara wakugomezgeka ndipo wateŵetera kwa vyaka vinandi. Ŵabali na ŵadumbu ŵakumukhozga Nina na kumulongora chitemwa. Iyo wakuti, “Mazgu ghakupembuzga agho ŵakuniphalira ghakunovwira kuti nizizipizge nyengo yakusuzga iyi.”

Nina wakutiso wakukhozgeka chomene na Malemba, chomene lemba la Yesaya 40:28-31. Iyo wakuti: “Yehova wakunovwira kuti nisangeso nkhongono. Nkhuwona kuti Yehova wakunitemwa chomene. Pakwamba, nkhaŵazganga waka vya chitemwa ichi, kweni pasono nkhuchita kujipulika kuti ndine wakutemweka nadi.”

Tikulutilira kumulombera Nina na wose awo ŵataya ŵakutemweka ŵawo chifukwa cha nkhondo iyi. Tikumanya kuti Yehova walutilirenge kuŵawovwira.—Salimo 20:2.