MARCH 29, 2023
RUSSIA

Yehova Wakuŵawovwira Ŵabali Ŵithu Awo Ŵali mu Jele

JULANI

Khoti la Ahktubinskiy ilo lili ku Chigaŵa cha Astrakhan lipelekenge chigamuro chake sonosono apa pa mulandu wa Mubali Rinat Kiramov, Sergey Korolev, na Sergey Kosyanenko. Wakwimira boma pa milandu wachali wandapemphe chilango icho ŵabali aŵa ŵangapika.

Vyakukhwaskana na ŵanthu aŵa

Rinat Kiramov

Chaka cha kubabikira: 1987 (Moscow, Chigaŵa cha Moscow)

Mbiri yake: Pambere wandakakike wakasambiranga vyakukhwaskana na kupanga webusayiti. Ni kaswiri pa nkhani ya kwimba sumu. Wakagwiranga ntchito yakupelekera makalata m’malo mwa kunjira usilikari.

Wakasambira unenesko kufuma kwa amama ŵake. Wakakondwa chomene kuwona kuti Ŵakaboni ŵa Yehova ŵakutemwana kweniso ŵakuchita vinthu mwakukolerana. Wakabatizika mu 2001

Wakatorana na Galina mu 2009

Ivyo Wakayowoya Muwoli wa Rinat, Galina a

Ntchivichi chikumovwira Rinat kuzizipizga pa nyengo iyo wali mu jele?

Rinat wakajiŵikira chilato chakuti walomberenge mubali na mudumbu waliyose uyo wakaŵa mu jele mwakumuzunura zina. Mwezi uliwose, nkhamupanga mazina gha ŵabali na ŵadumbu awo ŵali mu jele chifukwa cha chipulikano chawo. Wakaŵanga na nyengo kulombera waliyose ndipo ivi vikakhozganga ubwezi wake na Yehova kweniso vikamovwiranga kuti waleke kughanaghanira waka vya masuzgo ghake. Kweniso tikakumbuskananga vya uwemi wa kuzizipizga masuzgo. Uwu ukaŵanga upharazgi wapadera chomene uwo tikachitanga kweniso kukhozgera muwuso wa Yehova. Mu kalata yake, Rinat wakamalizga na mazgu ghakuti: “Kwali ŵalwani ŵithu ŵangaŵa ŵankhongono wuli, kweni Adada ŵithu ŵatovwirenge ndipo titondenge. Ntheura kutonda ni para tili na wanangwa pera yayi. Kweni kwa ise, kutonda chikung’anamura kuŵa ŵakugomezgeka m’paka umaliro.”

Kasi Yehova wamovwirani wuli?

Mu kalata yake, Rinat wakalembamo fundo yaunenesko yakuti: “Pakuti ningakupwelelera yayi pasono, kweni Yehova ndiyo wakupwelelerenge.” Nyengo yose iyi najiwonera nekha kuti Yehova wakunovwira na mzimu wake utuŵa. Pa Salimo 91:1 pakuti: “Uyo wakukhala mu chakubisamamo cha Wapachanya Nkhanira wajoŵenge mu mfwiri wa Wankhongonozose.” Kumanyuma uku nkhaŵazgapo vya “chakubisamamo” kweni sono napulikiska makora kumanya kuti Yehova wakunipwelelera chomene. Ivi vikunovwira kuti nimugomezgenge chomene Chiuta kweniso kuti nizizipizgenge na chimwemwe.

Sergey Korolev

Chaka cha kubabikira: 1973 (Penza, Chigaŵa cha Penza)

Mbiri yake: Wakutemwa kujambura vithuzi na vyakukhomakhoma

Wakaleka kuŵa na maghanoghano ghakubudika ghakukhwaskana na chisopa wati wachezgapo na Ŵakaboni ŵa Yehova ndipo wakasambira vya Mlengi. Wakabatizika mu 1996

Wakatorana na Yekaterina mu 2005

Ivyo Wakayowoya

Kasi ubwezi winu na Yehova ukakhora wuli mu nyengo iyi?

Usange munthu uli mu jele, chikuŵa chipusu kwamba kughanaghana mwakubudika chifukwa cha ivyo vikukuchitikira. Vinthu vikuŵa makora yayi, chikuŵa chakusuzga kuzizipizga, kukhora mu chipulikano, kweniso kulutilira kuŵa na chitemwa. Kweni lurombo ndilo lukunovwira chomene. Nili na nyengo yikuru chomene yakuyowoyeskana na Adada ŵane ŵakuchanya. Pa umoyo wane nindalombepo malurombo ghanandi nthena kwa Chiuta kufumira pasi pa mtima nga umo nkhuchitira sono. Ndipo sono nkhupulikiska chifukwa icho Yesu wakalombera kwa Adada ŵake usiku wose. Pakuti nili kujalirika mu jele, nasambira kuthemba chomene Chiuta, ndipo ichi ntchandulo chikuru chomene icho nasanga kufuma waka apo nkhizira kuno.

Sergey Kosyanenko

Chaka cha kubabikira: 1961 (Yelan, Chigaŵa cha Volgograd)

Mbiri yake: Wakugwira ntchito ya usambizgi

Wakatorana na Olga mu 1983. Wakakondwa wati wamanya ivyo Baibolo likuyowoya pa nkhani ya mdauko kweniso pakuwona umo mauchimi gha mu Baibolo ghakufiskikira. Wakabatizika mu 2002

Ivyo Wakayowoya Muwoli wa Sergey, Olga b

Kasi ni vichi vyamovwirani kuti muleke kugongowa?

Nyengo zose nkhuchita vinthu ivyo nkhuwona kuti vinovwirenge. Nkhuŵazga mabuku ghakulongosora Baibolo na kulomba kwa Yehova. Nkhumupempha kuti wanipe nkhongono mwakuti nilimbane na vinthu ivyo vinganigongoweska. Nkhuŵazga mwakuwerezgawerezga makalata agho Sergey wakunitumira ndipo nkhughanaghaniranga umo vizamuŵira para tazakakumanaso. Chinyake icho chanovwira chomene ni sumu zithu za Ufumu ndipo nkhukondwa kuzitegherezga na kuzilondezga para zikwimbika.

Kasi lilipo vesi la mu Baibolo ilo lamovwirani kuzizipizga?

Nkhukondwa chomene na fundo ya pa 1 Ŵakorinte 10:13, apo Chiuta wakulayizga kuti iyo “wazomerenge yayi kuti imwe muyezgeke na kutondeka kuzizipizga.” Nkhamanya kuti ningazizipizga yayi pa ine ndekha masuzgo ghose agha kweni Yehova wakunovwira nyengo zose kuti nifiske kuzizipizga. Usange ivi vikutichitikira, tikumanya kuti tikwaniskenge kuzizipizga. Masuzgo agha ghalutilirenge yayi kuŵapo muyirayira.

Tikupembuzgika kumanya kuti nyengo zose, Yehova wakuŵa chakubisamamo cha ŵateŵeti ŵake ŵakugomezgeka, ndipo waŵika ‘mawoko ghake ghamuyirayira kusi kwawo.’—Dotoronome 33:27.

Nyengo

November 9, 2021

Mulandu ukambika. Ŵamazaza ŵakasecha nyumba 15 za Ŵakaboni ŵa Yehova ku Akhtubinsk na Znamensk, kusazgapo nyumba ya Mubali Kiramov, Korolev, na Kosyanenko
November 10, 2021

Sergey Korolev wakakakika
November 11, 2021

Rinat Kiramov na Sergey Kosyanenko ŵakaŵajalira. Ŵabali wose ŵatatu aŵa ŵakaŵaŵika mu jele lakulindilirako awo milandu yawo yinderuzgike
November 14, 2022

Khoti likamba kutegherezga mulandu wawo