Maofesi gha munthavi ku Rwanda na Zimbabwe, ghakugwira ntchito pamoza na ŵalara ŵa mpingo, kuwoneseska kuti ŵabali na ŵadumbu awo ŵalije ndalama zakukwana chifukwa cha muliri wa coronavirus ŵasanga wovwiri wa vinthu vyakukhumbikwa pa umoyo.

Pa April 2, 2020, Komiti ya Munthavi ya Rwanda yikamanyiska ŵalara ŵa mipingo kuti ŵapenje ŵabali na ŵadumbu awo ŵakusuzgikira kusanga vyakukhumbikwa chifukwa cha muliri wa coronavirus. Ŵalara wose mu charu ichi ŵati ŵapulika uthenga uwu, ŵakapanga ndondomeko ya kupeleka wovwiri wa chakurya na katundu munyake wakukhumbikwa ku ŵabali na ŵadumbu aŵa.

Pamanyuma pa masabata ghaŵiri, ku Rwanda kukapangika Makomiti Ghakovwira para Kwachitika Soka 31. Makomiti agha ghakagaŵanga vinthu nga ni ufu, mpunga, ntchunga, mchere, shuga, na mafuta ghakuphikira. Kufika pasono mbumba zakujumpha 7,000 zapokera wovwiri uwu.

Wati wapokera wovwiri uwu, Mdumbu Nizeyimana Charlote na ŵana ŵake ŵatatu ŵakati: “Tawonga chomene chifukwa chakulutilira kutovwira mwauzimu na mwakuthupi mu nyengo yakusuzga iyi ya muliri wa coronavirus. Tikusoŵa na chakuti tiyowoye.”

Mubali munyake wakalongosora umo wakajipulikira wati waphalirika kuti wapokerenge chakurya chakuti ŵarye na mbumba yake. Iyo wakati: “Pa zuŵa ili, muwoli wane wakazinduka na njara. Mbwenu mwamabuchi, nkhapokera foni kufuma kwa mubali yakuniphalira kuti pali ndondomeko yakuti banja lane likapokere chakurya. Nkhazizwa chomene. Nkhatchezera usiku wose kuwonga Yehova.”

Muliri wa COVID-19 wasazgiraposo waka suzgo lakusowa kwa chakurya ilo likaŵapo kale mu charu ichi.

Ofesi ya munthavi ku Zimbabwe yili kusora Makomiti 5 Ghakovwira para Kwachitika Soka kuti ghalaŵilire mulimo wakovwira ŵabali ŵithu uwu. Kusazgirapo apa, ofesi yili kupanga ndondomeko yakuti ŵapharazgi awo ŵali na chakurya chakukwana ŵapelekenge chakurya na vinthu vinyake vyakukhumbikwa ku ŵabali na ŵadumbu awo ŵakusuzgika. Makomiti Ghakovwira para Kwachitika Soka ndigho ghakukagaŵa wovwiri uwu ku ŵabali.

Kufika pasono, makomiti agha ghagaŵa vinthu ivi ku ŵapharazgi 7,319, ufu wakukwana makilogiramu 62,669, mafuta ghakuphikira malita 6,269, makilogiramu 3,337 gha kapenta (tusomba tuchokotuchoko twakomira) na makilogiramu 5,139 gha ntchunga.

Ŵakutorana ŵanyake awo ŵakusambira Baibolo ndipo kanandi ŵakuwungana nase ŵakakhumbikwiranga chakurya. Iwo ŵakakondwa chomene ŵakati ŵapokera chakurya kufuma kwa mubali uyo wakusambira nawo Baibolo. Pambere ŵandapokere chakurya ichi muliska wa tchalitchi ilo ŵakasopanga wakaŵayimbira foni. Muliska uyu wakati wakukhumba chakupeleka kuti iyo na muwoli wake ŵakagure vinthu vinyake vyakukhumbikwa. Mbumba iyi yati yawona kuti pali mphambano yikuru chomene pakati pa Ŵakaboni ŵa Yehova na muliska uyu, yikasankha kulayira kuchisopa chawo.

Tikukayika yayi, Yehova ŵalutilirenge kutumbika uteŵeti ŵakovwira ŵanyithu, na kuwoneseska kuti ŵabali na ŵadumbu ŵithu ku Rwanda na Zimbabwe ŵakupokera ivyo ŵakukhumbikwira.—Milimo 11:29.