Ŵakaboni ŵa Yehova mamiliyoni ghanandi pamoza na wose awo ŵakachemeka ŵakachita Mugonero wa Fumu pa Chiŵiri, April 4, 2023. Nangauli chikaŵa chakusuzga ku ŵanyake kwiza ku chakuchitika ichi kweni ŵakakwaniska kuŵapo pa chakuchitika chapadera ichi.

Mwachiyelezgero, ku Ukraine, ŵanthu masauzandi ghanandi ŵakiza ku Chikumbusko nangauli kukazizima chomene kweniso kuli nkhondo ku vigaŵa vinyake. Chifukwa chakuti vinthu vikaŵa makora yayi mutawuni yinyake kumanjiliro gha dazi kwa Ukraine, ŵalara ŵakatumira mipingo ya ku chigaŵa ichi nkhani ya Chikumbusko yakujambulirathu kwati kwakhala sabata yimoza kuti Chikumbusko chichitike. Pati pajumpha mazuŵa ghachoko waka, kukaŵa chimphepo chikuru icho chikapangiska kuti kuŵavye intaneti na magesi. Nangauli vikaŵa nthena, waliyose mu mpingo wakakwaniska kupulikizga nkhani ya Chikumbusko yakujambulirathu nangauli pakaŵa suzgo la magesi kweniso kuli nkhondo.

Mudumbu munyake wa vyaka 15 zina lake Violetta uyo kukwawo nkhu Kazakhstan wakasuskikanga na ŵamumbumba yakwake. Asekuru ŵake awo wakukhala nawo ŵakasuskanga chomene banja la kwa mudumbu uyu kwa vyaka 20. Kanandi ŵakayezgayezganga kuti ŵatondeske mbumba iyi kuluta ku maungano ndipo nyengo zinyake ŵakaŵakeluliranga na mabuku wuwo. Kweni chifukwa chakuti ŵakamutemwanga chomene muzukuru wawo, vikapangiska kuti ŵazomere kudumbiskana nkhani zakukhwaskana na Baibolo. Pasono Violetta ngwakukondwa chomene chifukwa asekuru ŵake ŵali kuzomera sambiro la Baibolo ndipo ŵakiza ku Chikumbusko.

Ku ŵanyake chikaŵa chakusuzga kufika pa Chikumbusko chifukwa cha utali wa mtunda. Ku Timor-Leste ŵabali ŵakuchitiskako masambiro gha Baibolo ghakukwana 55 kwizira pa telefoni na ŵanthu awo ŵakukhala mu msumba wa Same na Suai. Kuti munthu wakafike ku malo agha, wakwenda maora ghanandi pa muthuthuthu kuti wasange mpingo wa Ŵakaboni ŵa Yehova uwo uliko pafupi. Ntheura pakanozgeka ndondomeko yakuti ŵabali ŵachitire Chikumbusko mu nyumba zawo. Mubali mulara munyake wakenda mtunda wa maora 4 kuluta pera kuti wakayowoye nkhani ya Chikumbusko mu msumba wa Same ndipo wose pamoza ŵakakwana 56. Mulara munyakeso wakenda mtunda wakukwana pafupifupi maora 7 kuluta ku Suai, uko ŵanthu ŵakukwana 50 ŵakiza ku Chikumbusko.

Ŵabali ŵithu ku Hualpén, Chile, ŵakaŵaso na suzgo lakuti ŵasange malo ghakuchitirapo Chikumbusko. Ŵakapempha wamazaza munyake mu chikaya kuti waŵawovwireko kupenja malo ghawemi ghakuti ŵachitirepo Chikumbusko. Ŵabali ŵalara ŵakakondwa chomene kuwona kuti munthu uyu wakaŵapa malo ghakulyeramo gha pa sukulu kuti ndimo ŵachitiremo Chikumbusko kwati kwakhala maora ghachoko waka kuti Chikumbusko chichitike. Ŵabali ŵakanozga malo agha mwaluŵiro chomene mwakuti ŵachitiremo ungano. Wamazaza yura pamoza na meya wa mu msumba uwu wose ŵakazomera kukaŵapo pa Chikumbusko. Meya wakayowoya kuti: “Nkhuwonga chomene ŵanthu wose awo ŵakiza ku chakuchitika ichi chifukwa cha kukolerana kweniso nkharo yiwemi iyo ŵakalongora. Na ŵana wuwo ŵakalongora nkharo yiwemi chomene. Manyani kuti munthazi ndise ŵakunozgeka kuzakamovwiraniso.”

Tikakondwaso chomene kupulika kuti mu November 2022 ŵabali ŵithu ku Monaco ŵakazomerezgeka kulembeska kuŵa chisopa chakuzomerezgeka kuyana na malango gha boma. Ŵati ŵachita Chikumbusko pa malo ghakuwoneka makora agho ŵakachita renti, yumoza mwa ŵanthu awo ŵakachemeka wakayowoya kuti: “Malo agha ngakutowa nadi kweni ŵanthu awo ŵawungana pano ndiwo ŵapangiska kuti ghaŵe ghakutowa chomene.”

Ntchakukhozga chomene kuwona kuti ŵabali ŵanandi ŵakatonda masuzgo ghakupambanapambana kuti ŵapulikire dango la Khristu lakuti ŵakumane pamoza kuti ‘ŵakumbukire’ nyifwa yake.—Luka 22:19.