Yehova Chiuta wakukhumba kuti ŵanthu wose, ŵasambire vyakukhwaskana na iyo kweniso Ufumu wake, vilije kanthu kuti kwali vinthu vili wuli pa umoyo wawo. (1 Timote 2:3, 4) Pa chifukwa ichi, Ŵakaboni ŵa Yehova ŵakufumiska Mabaibolo na mabuku ghakovwira pakusambira Baibolo kuti ghawovwire ŵanthu ŵanandi chomene, kusazgapo na ŵakumangwa. Nakuti gulu lithu lafumiska vinthu masauzandi ghanandi chomene mu chiyowoyero cha mawoko, a ndipo vikusangika mu viyowoyero vya mawoko vyakujumpha 100! Kasi tikuchita wuli kuti tipange na kugaŵa vinthu ivi? Ndipo kasi ni vinthu wuli ivyo tasintha mukuluta kwa nyengo?

 Ŵabali na ŵadumbu kuzingilira pa charu chose ndiwo ŵakung’anamura vinthu vya chiyowoyero cha mawoko. Gulu lililose ilo likuchita mulimo wakung’anamura likusanda dankha mwakupwelelera ivyo likukhumba kung’anamura. Kufuma apo, likuwona umo lingachitira kuti liviyowoye makora chomene mu chiyowoyero cha mawoko. Pamanyuma ŵakujambura vidiyo ya ivyo ŵang’anamura. Pasono pali magulu 60 gha ŵabali na ŵadumbu awo ŵakung’anamura mabuku ghakovwira pakusambira Baibolo mu chiyowoyero cha mawoko mwakukhazikika, na magulu ghanyake 40 agho ghakung’anamura mwa apo na apo.

 Kumasinda uku, kupanga mavidiyo gha chiyowoyero cha mawoko kukaŵa kwakudura chomene. Makamera na vinyake vyakukhumbikwa pakupanga mavidiyo agha vikaŵa vyakudura kuluska umo viliri pasono. Chinyake ntchakuti mavidiyo agha tikajambuliranga mu situdiyo iyo tikeneranga kuzenga tekha, ndipo nyengo zinyake tikanozganga waka nyumba yakuzengeka kale na kuyizgora situdiyo. Apa ndikuti tikamaliranga ndalama zakujumpha madola 30,000 b kuti vyose viŵe m’malo mwakuti awo ŵakuchita mulimo wakung’anamura ŵambepo mulimo wawo.

 Kuti tigwiliskire ntchito mwakwenelera vyawanangwa ivyo ŵanthu ŵakupeleka, tikaŵikapo mtima kupenjerezga nthowa zakusinthira vinthu vinyake mwakuti tichepeskeko ivyo vikukhumbikwa pa mulimo wakung’anamura mu chiyowoyero ichi. Ntheura pasono tikugwiliskira ntchito chomene vinthu vya tekinoloje ivyo ni vipusu na vyakukhilirapo mtengo. M’malo mwa kugwiliskira ntchito situdiyo, awo ŵakuchita mulimo uwu ŵakuŵika waka chisalu cha girini kumasinda kwawo na kujambura mavidiyo uku ŵali mu ofesi mwawo. Para pakukhumbikwa ŵanthu ŵanandi mu vidiyo yimoza, ŵabali na ŵadumbu aŵa ŵakujambura waka waliyose chigaŵa chake uku wali ku ofesi panji kunyumba kwake, ndipo ŵakukhumbikwaso kuchita kuluta ku situdiyo yayi.

 Tili kupangaso pulogiramu yinyake iyo yikovwira ŵabali awo ŵakuchita mulimo wakung’anamura mu chiyowoyero ichi. Ivi vyawovwira kuti pasono ŵamalizgenge mwaluŵiro chomene kung’anamura na kujambura vidiyo ya chiyowoyero cha mawoko kuluska umo vikaŵira kumasinda. Ŵabali ŵakuwonga chomene kusintha uko kwaŵapo. Mubali munyake zina lake Alexander wakuti: “Pasono mavidiyo gha chiyowoyero cha mawoko ghakufuma pafupipafupi kuluska kumasinda kose uku. Pa chifukwa ichi ndine wakukondwa chomene. Nkhuwonelera mavidiyo agha zuŵa lililose.”

 Pasono tikugwiliskira waka ntchito madola 5,000 kuti vyose viŵe m’malo mwakuti awo ŵakung’anamura mabuku mu chiyowoyero ichi ŵachite makora mulimo wawo. Lekani pasono tikupanga mavidiyo ghanandi chomene mu viyowoyero vinandi vya chiyowoyero cha mawoko.

 Para ŵabali ŵamalizga kujambura vidiyo ya chiyowoyero cha mawoko, yikwenera kuluta ku awo ŵakukhumbikwira mavidiyo agha. Kumasinda uku, tikapanganga makaseti na ma DVD, kweni vikaŵanga vyakudura, tikamalirangapo nyengo yinandi, kweniso yikaŵanga ntchito yakuvuska. Ivyo tajambura tikavitumanga ku makampani ghanyake kuti ghatipangire ma DVD panji makaseti. Kufuma apo, makaseti na ma DVD agha tikaghatumizganga ku mipingo. Mu 2013 pera, tikamalira madola ghakujumpha 2,000,000 pa kupanga ma DVD gha chiyowoyero cha mawoko.

 Ŵanthu ŵakumangwa ŵakawonganga chomene vinthu ivi. Ndipouli, chikaŵa chipusu yayi kugwiliskira ntchito makaseti na ma DVD agha chifukwa ghakamba kuŵa ghanandi chomene. Mwachiyelezgero, nyengo zinyake buku limoza la mu Baibolo likaŵanga na ma DVD ghanandi. Mubali munyake wa ku Brazil zina lake Gilnei wakuti: “Nyengo yiliyose para tikukhumba kuŵazga lemba la mu Baibolo, tikeneranga kupenja dankha kaseti yakwenelera kuti tiwonelere. Chikaŵanga chipusu yayi kuyisanga mwaluŵiro.” Mudumbu munyake zina lake Rafayane, ndipo wakagwiliskirapo ntchito ma DVD gha chiyowoyero cha mawoko, wakati: “Chikaŵanga chakugongoweska kuti usambire pawekha. Tikamaliranga nyengo yinandi pakupenja malemba panji maliferensi.” Kanandi para ŵabali na ŵadumbu ŵithu ŵali mu uteŵeti, napo ŵakatemwanga kuyegha makaseti na ma DVD, ndipo ŵakamuwoneskanga uyo ngwakunweka pa TV. Ŵabali ŵanyake ŵakayeghanga na ma DVD player wuwo. Pati pajumpha nyengo yichoko waka, pakafuma ma DVD player agho ghakaŵanga na sikirini kweniso ghakuti munthu wangayegha kwambura kusuzga, ndipo ŵabali na ŵadumbu ŵakamba kughagwiliskira ntchito. Bobby, uyo wakukhala ku United States, wakati: “Para wamara kuŵalongora lemba la mu Baibolo ndipo ukukhumba kuŵaphalirakoso lemba linyake, ukeneranga kusintha dankha DVD. Ivi vikaryanga nyengo ndipo vikapangiskanga kuti chiŵe chakusuzga kudumbiskana na ŵanthu kufuma mu Baibolo.”

 Mu 2013, Ŵakaboni ŵa Yehova ŵakafumiska JW Library Sign Language app, iyo yikovwira ŵabali na ŵadumbu kuti ŵachitenge dawunilodi na kuwonelera mavidiyo gha chiyowoyero cha mawoko pa mafoni panji matabuleti ghawo. Pakwamba app iyi yikafuma mu Chiyowoyero cha Mawoko cha ku America. Kufuma apo, mu 2017, ŵakayisintha kuti yiŵe ya viyowoyero vyose vya mawoko. Ŵabali na ŵadumbu pa charu chose ŵakakondwa chomene. Juscelino, uyo wakukhala ku Brazil, wakati: “Nkhagomezga ngati! Nkhaghanaghaniranga waka umo Wupu Wakulongozga ukutitemwera ise ŵanthu ŵakumangwa na ivyo ukutikhumbira kuti tilutilire kukura mwauzimu nga umo viliri na awo ŵakuyowoya viyowoyero vinyake. Nkhakondwa chomene, ndipo app iyi yikanikhukiska kuti niŵikepo mtima kusambira Baibolo.”

 Mazuŵa ghano tikupanga mavidiyo gha chiyowoyero cha mawoko na kughaŵika pa webusayiti yithu na pa JW Library Sign Language app. Ivi vyawovwira kuti vinthu vya chiyowoyero cha mawoko ving’anamulikenge, kujambulika, na kuŵikika pa intaneti mu mazuŵa waka, m’malo mwa myezi panji vyaka. Nakuti mu viyowoyero vya mawoko vinandi, mabuku ghakufumiskika mu nyengo yakuyana waka na gha viyowoyero ivyo ŵanthu ŵakuchita kuyowoya.

 Wonani ivyo ŵabali na ŵadumbu ŵithu ŵanyake awo mbakumangwa ŵakayowoya. Mudumbu munyake zina lake Klízia wakuti: “Ni gulu wuli linyake ilo likuŵaghanaghanira chomene ŵanthu ŵakumangwa ndipo ndakukhumbisiska kuŵapa chakurya chauzimu mu nthowa yipusu nthena? Palije mu charu uyo wangayana na gulu la Yehova pa ivyo likutichitira.” Vladimir wakuti: “Mavidiyo agha ghakunilongora kuti Yehova wakutighanaghanira chomene taŵanthu ŵakumangwa nga umo wakuchitira na ŵanthu wose.”

 Kanandi mavidiyo ghithu gha chiyowoyero cha mawoko ghakuŵa na mazgu agha: “Buku ili ndakuguliska yayi. Chilato chake nkhovwira ŵanthu pa charu chose kuti ŵasambire Baibolo, ndipo ŵanthu ŵakovwirapo na vyawanangwa.” Tikuwonga chomene vyawanangwa vinu, ndipo vinandi mwa ivyo vikwizira pa donate.isa4310.com. Vyawanangwa ivi vikutovwira kuti tipange Mabaibolo na mabuku ghakovwira pakusambira Baibolo gha ŵanthu wose, kusazgapo na awo ŵakugwiliskira ntchito chiyowoyero cha mawoko.