Apo tikwamba chaka cha 2023, tili na chigomezgo kuti vinthu viwemi vichitikenge kwa ise na ŵa mu mbumba yithu. Chifukwa wuli tingaŵa na chigomezgo ichi?

 Baibolo likutiphalira makani ghawemi ghakuti masuzgo agho tikusangana nagho pasono nga kanyengo. Nakuti Baibolo ‘likalembeka kuti litisambizge, kuti para. . . kusanguluskika na Malemba, tiŵe na chigomezgo.’—Ŵaroma 15:4.

•    Kuti mumanye vinandi vya ivyo Baibolo likulayizga, ŵazgani nkhani yakuti “Chigomezgo Chakuti Kunthazi Vinthu Vizamusintha.”

 Chigomezgo cha mu Baibolo chili nga ni “nyanguru wa umoyo withu.” (Ŵahebere 6:19) Chigomezgo chingatizikiska mtima. Chingatovwira kuzizipizga masuzgo agho tikusangana nagho, kuwona vinthu mwakwenelera na kusanga chimwemwe chambura kumara. Mwachiyerezgero:

•    Wonani umo Baibolo likawovwilira mwanalume munyake uyo wakaŵa na chizgoŵi chiheni. Wonelerani vidiyo yakuti Nkhavuka na Nkharo Yane Yawakawaka.

•    Wonani umo Baibolo lingatovwilira para wakutemweka withu wafwa. Wonelerani vidiyo yakuti Kupembuzga Awo Ŵakulira.

 Ŵanthu ŵanandi wakukhazga kuti vinthu viwemi vichitikenge, kweni wakumanya makora viŵi yayi usange ivyo iwo ŵakugomezga vizamufiskika nadi. Kasi mungagomezga wuli kuti ivyo Baibolo likulayizga vizamufiskika nadi? Chfukwa ntchakuti malayizgo gha mu Baibolo ngakufuma kwa Yehova Chiuta a, “uyo wakuteta yayi.” (Tito 1:2) Ni Yehova pera uyo wali na nkhongono zakufiskira malayizgo ghake ghose, ndipo “wakuchita chilichose icho wakhumba.”—Salimo 135:5, 6.

 Tikumuchiskani kuti mphanyi mwasanga chandulo na malayizgo ghakugomezgeka agho ghali mu Baibolo. Mungakhozga chipulikano chinu mu ivyo Baibolo likulayizga para ‘Mungasanda Malemba mwakupwelelera.” (Milimo 17:11) Mungachita nthena para mungayezga kosi yakusambizga Baibolo kwa kwa ulere. Yambani chaka ichi cha 2023 na chigomezgo.