Ŵanthu ŵanandi ŵakughanaghana kuti para munthu ngwakusambira chomene kweniso ni musambazi, mbwenu wazamuŵa na umoyo uwemi munthazi. Ndipo ŵakugomezga kuti masambiro gha ku yunivesite ghakovwira munthu kugwira makora ntchito, kuŵa munthu muwemi mu banja kweniso mu chikaya. Kweniso ŵakughanaghana kuti para munthu wasambira chomene mbwenu waŵenge pa ntchito yapachanya iyo wapokerenge ndalama zinandi izo zimovwirenge kuti waŵe wakukondwa.

Wonani ivyo wakayowoya Zhang Chen, wa ku China. Iyo wakati, “Nkhagomezganga kuti nkhwenera kuŵa na digiri ya ku yunivesite kuti nimazge ukavu wane na kusanga ntchito yapachanya kuti niŵe wakukondwa na wakukhorwa na umoyo.”

Ŵanthu ŵanandi ŵakuluta ku mayunivesite ghakumanyikwa, kwali nga mu charu chinyake kuti ŵakasazgireko masambiro ghawo na chilato chakuti vinthu vizakaŵayendere makora munthazi. Ivi vyanguŵa vyakuzara chomene mwakuti pasono vikusuzga waka chifukwa cha muliri wa COVID-19. Lipoti la 2012 la Wupu wa Economic Co-operation and Development likati: “Ŵana ŵa sukulu ŵa ku Asia, ŵakujumpha hafu ŵakukasambira masambiro ghawo ku vyaru vinyake.”

Ŵapapi ŵakuyezgayezga kuchita ivyo ŵangafiska kuti ŵana ŵawo ŵakasambire ku yunivesite mu charu chinyake. Qixiang wa ku Taiwan, wakati: “Ŵapapi ŵithu mbakavu, kweni ŵakayezgayezga kuti taŵana tose 4 tilute ku koleji ku United States.” Kuti ŵalipire fizi, kweniso kupwelelera banja, ŵakeneranga kunjira mu ngongole nga umo ŵanthu ŵanandi ŵakuchitira.

Mbunenesko kuti masambiro ghangawovwira pa umoyo, kweni ni nyengo zose yayi apo ghakovwira kusanga ivyo ŵana ŵa sukulu ŵakakhazganga. Mwachiyelezgero, pamanyuma pakuti ŵalimbikira kugwira ntchito kweniso kukongora ndalama zinandi kuti ŵalipire fizi, ŵanandi ŵakuyisanga yayi ntchito iyo ŵakakhumbanga. Mu lipoti ilo wakalemba Rachel Mui mu nyuzipepara yinyake (Business Times) ya ku Singapore wakati: “Ŵanandi awo ŵali kumalizga masambiro gha ku yunivesite ntchito ŵakuzisanga yayi.” Jianjie munthu wakusambira chomene wa ku Taiwan, wakati, “Ŵanandi ŵakugwira waka ntchito iyo yasangika nanga yingaŵa kuti yikukolerana yayi na digiri iyo ŵali nayo.”

Nanga ni awo ŵali kusanga ntchito iyo ŵakakhumbanga, nawo ŵakuwona kuti umoyo wawo undasinthe nga umo iwo ŵakaghanaghaniranga. Niran wa ku Thailand wakati wawerako ku yunivesite ya ku United Kingdom, wakasanga ntchito yakuyana na masambiro yake. Iyo wakati: “Digiri yikanovwira kusanga ntchito ya ndalama zinandi iyo nkhakhumbanga. Ndipouli, chifukwa nkhapokeranga ndalama zinandi, nkheneranga kulimbikira chomene kugwira ntchito kweniso kumalira nyengo yinandi pa ntchito. Kweni pamanyuma, kampani yithu yikalekeska ntchito ŵanthu ŵanandi, na ine wuwo. Nkhamanya kuti ntchito yingawovwira yayi kuti wamunthu uŵe na umoyo uwemi munthazi.”

Nanga ni ŵanthu awo mbasambazi nawo ŵakukumana na masuzgo gha munthengwa, ulwari kweniso ŵakufipa mtima pa nkhani ya ndalama. Katsutoshi wa ku Japan, wakati, “Nkhaŵa na ndalama zinandi kweni nkhaŵa wakukondwa yayi chifukwa ŵanthu wakanichitiranga sanji, kweniso vinthu viheni.” Lam, mwanakazi uyo wakukhala ku Vietnam, wakati, “Nkhuwona ŵanthu ŵanandi ŵakusuzgika kusanga ntchito ya ndalama zinandi kuti ŵaŵe ŵakuvikilirika, kweni unenesko ngwakuti ŵakwenjerwa, kulwara nanga nkhusuzgika maghanoghano.”

Nga ni Franklin, ŵanthu ŵanandi ŵamanya kuti pali vinandi ivyo vikukhumbikwa paumoyo kuluska waka kupenja masambiro ghapachanya na usambazi. M’malo mwakutangwanika na vinthu vyakuthupi, ŵanthu ŵanyake ŵakuyezgayezga kuti ŵawe waka munthu muwemi na kuchitira ŵanji vinthu viwemi. Kasi kuchita nthena kungaŵawovwira kuti ŵazakasange umoyo uwemi munthazi? Nkhani yakulondezgapo yikuzgora fumbo ili.