Chiuta wakutemwera yayi ndipo wakukhumba kutumbika ŵanthu ŵa mitundu yose.

Chiuta wakalayizga ntchimi Abrahamu kuti “mbumba zose pa charu zitumbikikenge kwizira mwa iwe.”—Genizesi 12:3.

Kasi tikusambirapo vichi? Chiuta wakutitemwa chomene ndipo wakukhumba kutumbika munthu waliyose, kwali ni mwanalume, mwanakazi, panji mwana, chikuru wakumupulikira.

Chiuta ngwalusungu ndipo wakutumbika wose awo ŵakuŵikapo mtima kuti ŵamumanye.

Chiuta Wankhongonozose wakamupa Mozesi nkhongono zakuchitira minthondwe. Ndipouli, Mozesi wakalomba kuti: “Nimanyiskani nthowa zinu, mwakuti nimumanyani na kulutilira kusanga uwemi pamaso pinu.” (Ekisodo 33:13) Chiuta wakakondwa chomene na ivyo Mozesi wakapempha ndipo wakamutumbika mwa kumovwira kuti wamumanye makora iyo, kumanya nthowa zake, kweniso mikhaliro yake. Mwachiyelezgero, Mozesi wakamanya kuti Mlengi ni “Chiuta walusungu na wachiwuravi.”—Ekisodo 34:6, 7.

Kasi tikusambirapo vichi? Chiuta wakukhumba kutumbika waliyose wa ise, kwali ni mwanalume, mwanakazi, panji mwana, chikuru wakuyezgayezga kuti wamumanye makora. Wakutiphalira kwizira mu Malemba Ghakupatulika umo tingamusopera kweniso kuti ngwakunozgeka kutitumbika.

Chiuta wangatitumbika kwamuyirayira para tikusambira ivyo Yesu wakachitanga na kusambizga.

Mu Mazgu gha Chiuta tikusangamo vinandi vyakukhwaskana na umoyo wa Yesu kweniso ivyo wakasambizganga. Chiuta wakapeleka nkhongono kwa Yesu zakuchitira minthondwe, nga nkhuchizga ŵambura kuwona, kupulika kweniso ŵakupendera. Wakawuskanga nanga ni ŵakufwa. Apa Yesu wakalongoranga waka ivyo Chiuta wazamuchitira ŵanthu kunthazi. Wakayowoya ivyo tingachita kuti tizakasange vitumbiko ivi, wakati: “Kuti ŵaŵe na umoyo wamuyirayira, ŵakwenera kumumanyani imwe Chiuta waunenesko yekha, ndiposo Yesu Khristu, uyo mukamutuma.”—Yohane 17:3.

Yesu wakaŵa walusungu, wachitemwa na wachiwuravi. Iyo wakati: “Sambirani kwa ine, pakuti nili wakuzika na wakujiyuyura mu mtima, ndipo muzamupumuzgika.” (Mateyu 11:29) Ntheura ŵanalume, ŵanakazi, ŵana na ŵachekuru ŵakizanga kwa iyo chifukwa cha umo wakachitiranga nawo vinthu. Mu nyengo ya Yesu, ŵanthu ŵakachitiranga nkhaza ŵanakazi. Mwakupambana na ŵanthu aŵa, Yesu wakachitanga nawo vinthu mwalusungu, mwantchindi kweniso wakaŵawonanga kuti mbakuzirwa.

Kasi tikusambirapo vichi? Yesu wakalongoranga chitemwa chikuru chomene ku ŵanthu ndipo wali kutilekera chiyelezgero cha umo nase tikwenera kuchitira vinthu na ŵanyithu.

Malemba Ghakupatulika ghakuyowoya kuti “kwa ise kuli Chiuta yumoza” ndipo Yesu Khristu wakaŵa thenga lake. (1 Ŵakorinte 8:6) Yesu wakayowoya makora kuti Chiuta ni mukuru kuluska iyo, kweniso kuti ndiyo wakamutuma pa charu chapasi.—Yohane 11:41, 42; 14:28. *