Chitima ni para “munthu wakukhwaskika para munyake wasangana na suzgo na kughanaghanira umo vingaŵira usange suzgo ilo lingachitikira iyo.” Kaswiri wakumanya vya ŵanthu awo mutu ukwenda makora yayi, Dr. Rick Hanson wakayowoya kuti, “taŵanthu chitima tikuchita kubabika nacho.”

GHANAGHANIRANI FUNDO IYI: Chifukwa wuli taŵanthu tili na chitima kupambana na vinyama vyose? Baibolo likulongosora kuti Chiuta wali kutilenga mu chikozgo chake. (Genizesi 1:26) Tili kulengeka mu chikozgo cha Chiuta lekani tikuyezga wunthu wake na kulongora mikhaliro yake yiwemi. Ntheura para tikulengera chitima ŵanji ndikuti tatolerako mikhaliro ya Mlengi withu Yehova Chiuta.—Zintharika 14:31.

Enya, Chiuta wakutilengera chitima ndipo wakukondwa yayi para tikusuzgika. Pakuyowoya za ŵana Ŵaisrayeli apo ŵakasuzgikanga ku Eguputo kweniso vyaka 40 ivyo ŵakaŵira mu mapopa, Baibolo likuti: “Mu visuzgo vyawo vyose, [Yehova] nayo wakasuzgikanga.” (Yesaya 63:9) Wonani kuti Yehova wakawonanga waka yayi umo ŵakasuzgikiranga, kweni nayo wakaŵanga na chitima. Iyo wakati: “Nkhumanya makora vyakuŵinya vyawo.” (Ekisodo 3:7) Kweniso wakayowoyaso kuti: “Waliyose uyo wakukhwaska imwe, wakukhwaska mboni ya jiso lane.” (Zekariya 2:8) Para ŵanthu ŵakutisuzga nayo wakusuzgika nase.

Nangauli tingajiwona kuti ndise ŵambura kuzirwa mwakuti Chiuta wangatichitira lusungu yayi, kweni Baibolo likutisimikizgira kuti: “Chiuta ni mukuru kuluska mitima yithu ndipo wakumanya vinthu vyose.” (1 Yohane 3:19, 20) Chiuta wakutimanya makora kuluska umo taŵene tikujimanyira. Wakumanya makora umo vinthu viliri kwa ise, maghanoghano ghithu, umo tikujipulikira kweniso wakutichitira lusungu.

 Malemba ghakutisimikizgira kuti

• “Muchemenge, ndipo Yehova wathanikenge. Mulilirenge wovwiri, ndipo iyo watenge: ‘Ndine pano!’”—YESAYA 58:9.

• “‘Pakuti nkhumanya maghanoghano agho nkhughanaghanira imwe, maghanoghano gha mtende, gha soka chara, kumupani munthazi muwemi na chigomezgo. Muzamunichema, mwizenge na kulomba kwa ine ndipo ine nizamumupulikani.’”—YEREMIYA 29:11, 12.

• “Sungani masozi ghane mu thumba linu lachikumba. Asi ghali kulembeka mu buku linu?”—SALIMO 56:8.

Kasi para tamanya kuti Chiuta wakutichitira chitima vingatovwira kuti tilimbane na masuzgo? Wonani ivyo vikachitikira Maria. Iyo wakati:

“Mwana wane munyamata wa vyaka 18 wakati wafwa na kansa pamanyuma pakusuzgika vyaka viŵiri, nkhawonanga kuti umoyo ngwakusuzga chomene. Nkhakwiyira chomene Yehova pakuleka kumovwira na kumuchizga.

“Vyaka 6 vikati vyajumphapo, mubwezi wane mu mpingo uyo wakanitemwanga chomene na kunilengera lusungu, wakategherezga apo nkhayowoyanga maghanoghano ghane kuti Chiuta wakunitemwa yayi. Wati wanitegherezga kwa nyengo yitali kwambura kunidumulizga, wakanilongora vesi ilo likanifika pa mtima. Lemba ili ni 1 Yohane 3:19, 20 ndipo likuti: ‘Chiuta ni mukuru kuluska mitima yithu ndipo wakumanya vinthu vyose.’ Wakalongosora kuti Yehova wakupulikiska masuzgo ghithu.

“Nangauli vikaŵa nthena, kweni chikaŵa chakusuzga kuti nileke kukwiyira Chiuta. Pamanyuma, nkhaŵazga lemba la Salimo 94:19, ilo likuti: ‘Para vyenjezgo vyaninyekezga, Imwe mukunisanguluska na kunizikiska mtima.’ Nkhajipulika nga kuti vesi ili ŵakalembera waka ine. Paumaliro, nkhajipulikangako makora para nkhumuphalira Yehova masuzgo ghane pakumanya kuti wakutegherezga na kunipulikiska.”

Ntchakukhozga chomene kumanya kuti Chiuta wakutipulikiska na kutilengera chitima. Kweni chifukwa wuli pa charu pali masuzgo ghanandi? Kasi ntchifukwa chakuti Chiuta wakutilanga pa viheni ivyo tikuchita? Kasi Chiuta wachitengepo kanthu kuti masuzgo ghamare? Mafumbo agha ghazgolekenge mu nkhani zakulondezgapo.