KASI ncivici ico tingacita kuti tikondweske Ciuta? Kasi tikwenera kumupa cintu cinyake?— Yehova wakuti: “Nyama zose zamu thengere nzane.” Wakuyowoyaso kuti: “Siliva ndane, golide nalo ndane.” (Salmo 24:1; 50:10; Hagai 2:8) Ndipouli, pali cintu cinyake ico tingamupa Ciuta. Kasi ncivici?—

Yehova wakutipa wanangwa wakusanka kumuteŵetera panji yayi. Wakuticicizga yayi kuti ticitenge ivyo wakukhumba. Tiye tiwone cifukwa ico Ciuta wakatilenga mwakuti tipange tekha cakusanka, kwali tikukhumba kumuteŵetera panji yayi.

Panji iwe ukumanya kuti pali makina ghanyake agho ghakupangika kuti ghacitenge ncito zinyake izo ŵantu ŵakucita. Makina agha ghakupangika mwakuti ghacitenge cilicose ico uyo wakaghapanga wakukhumba. Igho ghangasanka yayi cakucita. Yehova wakhumbenge ntena wakatilenga tose mwakuyana na makina agha, ntena wakatilenga mwakuti ticitenge vyekha ivyo iye wakukhumba. Kweni Ciuta ndimo wakacitira yayi. Kasi ukumanya cifukwa cake?— Vidoli vinyake vili nga ni makina agho tarongosora pacanya apa. Para batani ladofyeka, vidoli ivi vikucita vintu vyekha ivyo uyo wakavipanga wakalinganizga kuti vicitenge. Kasi cidoli ca nga ni ici uli kuciwonapo?—  Nyengo zinandi ŵantu ŵakuvuka kuseŵera na cidoli ico cikucita vintu vyekha ivyo cikapangika kuti cicitenge. Ciuta wakukhumba yayi kuti timupulikirenge nga ni para tikacita kulinganizgika kuti timuteŵeterenge. Yehova wakukhumba kuti timuteŵeterenge cifukwa cakuti tikumutemwa ndiposo cifukwa cakuti tikukhumba kumupulikira.

Kasi ukughanaghana kuti Dada withu wakucanya wakujipulika wuli para tikumupulikira cifukwa cakuti tikukhumba kucita nteura?— Kasi iwe ukughanaghana kuti nkaro yako yikuŵakhwaska wuli ŵapapi ŵako?— Baibolo likuyowoya kuti mwana wa mahara “wakukondwereska ŵawiske” kweni mwana wakupusa “wakukhozga soni ŵanyina.” (Zintharika 10:1) Kasi uli kuwonapo kuti para wacita ivyo ŵanyoko na ŵawuso ŵakutuma, iwo ŵakukondwa?— Kweni kasi iwo ŵakucita wuli para wareka kuŵapulikira?—

Sono tiye tidumbiskane za Dada withu wakucanya, Yehova. Iye wakutiphalira umo tingamukondweskera. Kasi warekeraci kutora Baibolo lako na kujura pa Zintharika 27:11. Pa lemba ili Ciuta wakutiphalira kuti ‘Mwana wane, khala wavinjeru na kukondwereska mtima wane, mwakuti ndimuzgore uyo wakunditoza.’ Kasi kutoza ukumanya?— Muntu wangakutoza mwakukuseka na kuyowoya kuti iwe ukutondeka kucita ivyo ukayowoya kuti ungacita. Kasi Satana wakamutoza wuli Yehova?— Tiye tiwone umo wakamutozera.

Kumbuka kuti mu Cipaturo 8 ca buku lino tikasambira kuti Satana wakukhumba kuti waŵe wapacanya ndiposo kuti waliyose wapulikirenge  iye. Satana wakuyowoya kuti ŵantu ŵakusopa Yehova kwekha cifukwa cakuti Yehova waŵapenge umoyo wamuyirayira. Pamanyuma pakuti wanyenga Adamu na Heva kuti ŵareke kupulikira Yehova, Satana wakawukira Ciuta. Wakaphalira Ciuta kuti: ‘Ŵantu ŵakumuteŵeterani cifukwa ca ivyo mukuŵapa. Para munganipa waka mwaŵi, mbwenu nipangiskenge waliyose kumukanani.’

Mbunenesko kuti mazgu agha ndimo ghali kulembekera yayi mu Baibolo. Kweni para tikuŵazga za Yobu, ncakuwonekerathu kuti Satana wakayowoya cintu cinyake cakuyana na mazgu agha kwa Ciuta. Kwali Yobu wakaŵa wakugomezga kwa Ciuta panji cara, iyi yikaŵa nkani yikuru kwa Satana na Yehova. Tiye tijure Mabaibolo ghithu pa Job cipaturo 1 na 2 kuti tiwone ico cikacitika.

Ungawona pa Job cipaturo 1 kuti Satana wakaŵa kucanya kwenekuko apo ŵangelo ŵakiza kuti ŵazakakumane na Yehova. Anteura Yehova wakafumba Satana kuti: “Kasi wafumiranku?” Satana wakazgora kuti wakayinganga-yinganga mu caru. Nteura Yehova  wakamufumba kuti: ‘Kasi wamuwona Yobu, uyo wakuniteŵetera ndipo palije ciheni cilicose ico wakucita?’—Job 1:6-8.

Penepapo Satana wakamba kususka. Wakati: ‘Yobu wakumusopani cifukwa cakuti walije masuzgo ghaliyose. Usange mungareka kumuvikilira na kumutumbika, mbwenu wamutukaninge.’ Nteura Yehova wakazgora kuti: ‘Nkukuzomerezga, Satana, ungacita naye cilicose ico ukukhumba, kweni iye ungamupwetekanga yayi.’—Job 1:9-12.

Kasi Satana wakacitaci?— Wakapangiska ŵantu kwiba ng’ombe na mbunda za Yobu na kukoma awo ŵakaliskanga. Pamanyuma pake kukiza leza uyo wakakoma mberere na ŵaliska. Khale-khale, ŵantu ŵakiza na kwiba ngamila na kukoma awo ŵakaliskanga. Paumaliro, Satana wakatuma mpepo yikuru iyo yikawiskira pasi nyumba umo mukaŵa ŵana ŵa Yobu, ndipo wose ŵakafwa. Kwambura kupwerererako kantu za vintu vyose ivi, Yobu wakarutilira kuteŵetera Yehova.—Job 1:13-22.

Wakati wakumanaso na Satana, Yehova wakamuphalira kuti Yobu wacali wakugomezgeka nipera. Satana wakasuskaso kuti: ‘Usange munganizomerezga kuti nimupweteke, mbwenu wamutukaninge.’ Nteura Yehova wakamuzomerezga Satana kuti wamupweteke Yobu kweni wakamucenjezga kuti wangamukomanga yayi.

 Satana wakapweteka Yobu na vironda thupi lose. Vironda ivi vikanunkhanga comene mwakuti palije uyo wakakhumbanga kukhala nayo pafupi. Nanga ni muwoli wake nayo wakamuphalira kuti: “Tuka Ciuta, ufwe!” Awo ŵakatenge ni mabwezi ghake ŵakiza kuzakamucezgera. Iwo ŵakasazgirako citima cake mwakuyowoya kuti Yobu wakwenera kuti wakacita cintu cinyake ciheni comene ico cikapangiska kuti waŵe na suzgo yose iyi. Ndipouli, mwambura kupwerererako kantu za suzgo yose iyi, Yobu wakarutilira kuteŵetera Yehova mwakugomezgeka.—Job 2:1-13; 7:5; 19:13-20.

Kasi ukughanaghana kuti Yehova wakajipulika wuli cifukwa ca kugomezgeka kwa Yobu?— Kukamukondweska comene cifukwa kukapangiska Ciuta kuphalira Satana kuti: ‘Wona muteŵeti wane Yobu! Wakuniteŵetera cifukwa wakukhumba kucita nteura.’ Kasi iwe ucitenge nga ni Yobu, muntu uyo Yehova wakarongora nga nciyerezgero, cakupereka ukaboni wakuti Satana ni mutesi?— Ni mwaŵi ukuru comene wakupereka zgoro la ivyo Satana wakayowoya kuti wangapangiska waliyose kureka kuteŵetera Yehova. Mwambura kukayika, Yesu naye wakawuwona kuŵa mwaŵi.

Musambizgi Waluso wakamuzomerezga yayi Satana kuti wamunyenge kucita cintu cilicose ciheni. Aghanaghanira waka umo ciyerezgero cake cikakondweskera Ŵadada ŵake! Yehova ntena wakarongora Yesu na kuzgora Satana kuti: ‘Wona Mwana wane! Wasunga kugomezgeka kwake cifukwa wakunitemwa!’ Ndiposo, aghanaghaniraso za cimwemwe ico Yesu wakaŵa naco cifukwa ca kukondweska Ŵadada ŵake. Cifukwa ca cimwemwe ici, Yesu wakazizipizga nyifwa pa khuni lakusuzgikirapo.—Ŵahebere 12:2.

Kasi ukukhumba kuŵa nga ni Msambizgi withu Waluso na kukondweska Yehova?— Usange ni ntena, ukwenera kurutirizga kusambira ivyo Yehova wakukhumba, na kumukondweska mwakucita vintu ivyo ukusambira!