Nyifwa ni mulwani withu ndipo tose tikuyiwopa. Tikuchita chilichose kuti tileke kufwa. (1 Ŵakorinte 15:26) Kweni ŵanthu ŵanyake ŵakopa chomene kufwa chifukwa cha mautesi agho ŵakupulika kweniso chifukwa cha kugomezga vyamizimu. Ntheura ŵakuŵa ŵazga “umoyo wawo wose.” (Ŵahebere 2:15) Kweni para tamanya unenesko pa nkhani ya nyifwa, tifwatukenge ku wuzga uwu. Tiŵenge ŵakukondwa ndipo tiwopenge chomene yayi kufwa.—Yohane 8:32.

Ntchivichi Chikuchitika Para Munthu Wafwa?

•  Ŵakufwa ŵakumanya chilichose yayi. (Salimo 146:4) Baibolo likuyelezgera nyifwa na tulo. Ntheura para munthu wafwa wakusuzgika yayi.—Salimo 13:3; Yohane 11:11-14.

•   Ŵakufwa ŵangatipweteka yayi. Nanga ni awo ŵakaŵa ŵalwani ŵithu, para ŵafwa palije icho ŵangachita. Ŵakupumura pamoza na awo “ŵali kufwa.” (Zintharika 21:16) Baibolo likuti “thinkho lawo, na sanji zawo vyamara.”—Mupharazgi 9:6.

•  Para munthu wafwa chikung’anamura kuti mbwee vyose vyamalira penepapo yayi. Chifukwa Chiuta wazamuwuska ŵakufwa.—Yohane 5:28, 29; Milimo 24:15.

•   Chiuta walayizga kuti nyengo yikwiza apo ‘nyifwa yizamuŵakoso chara.’ (Chivumbuzi 21:4) Baibolo likuti: “Ŵarunji ŵazamuhara charu chapasi, ndipo ŵazamukhala mwenemumo muyirayira.” Para nyifwa yamara, tizamuwopangaso kufwa yayi.—Salimo 37:29.