Buku laumaliro mu Baibolo likuti 666 ni nambara, panji zina, la chikoko cha mitu 7 na masengwe 10 icho chikuzuwuka mu nyanja. (Chivumbuzi 13:1, 17, 18) Chikoko ichi chikwimira maboma gha ndyali pa charu chapasi agho ghakulamulira ŵanthu ŵa fuko lililose, lulimi lulilose, na mtundu uliwose. (Chivumbuzi 13:7) Nambara ya 666 yikulongora kuti Chiuta wakuwona kuti maboma agha ngakutondekerathu. Kasi ngakutondeka wuli?

 Ni zina panji nambara waka yayi. Mazina agho Chiuta wakupeleka ghakuŵa na ng’anamuro. Zina lakuti Abramu likung’anamura kuti “Dada Ngwapachanya (Ngwakukwezgeka).” Kweni Chiuta wakamupa zina lakuti Abrahamu, ilo likung’anamura kuti “Wiske wa Wumba (Mzinda), Wiske wa Ŵanandi.” Chiuta wakamulayizga kuti waŵenge “wiske wa mitundu yinandi.” (Genizesi 17:5, mazgu ghamusi) Mwakuyana waka, Chiuta wali kupeleka zina lakuti 666, kuyana na ivyo chikoko chikuchita.

  Nambara ya 6 yikwimira kupeleŵera. Kanandi mu Baibolo, , nambara zikuŵa na ng’anamuro. Nambara ya 7 yikwimira chinthu chakukwana. Pakuti nambara ya 6 yikupeleŵera na 1 kuti yikwane 7, lekani Chiuta wakuwona kuti 6 ni nambara iyo yikwimira chinthu chakupeleŵera. Nakuti kanandi nambara iyi yikwimira ŵalwani ŵa Chiuta.—1 Midauko 20:6; Daniyeli 3:1.

  Nambara iyi yawelezgeka katatu kudidimizga fundo.Nyengo zinyake para Baibolo likukhumba kudidimizga fundo yinyake, likuwerezga katatu. (Chivumbuzi 4:8; 8:13) Ntheura zina lakuti 666 likudidimizga fundo yakuti maboma ngakutondekerathu. Ghatondeka kwiza na mtende ndiposo kuvikilira ŵanthu ŵake. Ni Ufumu wa Chiuta pera uwo uzamuchita vinthu ivi.

Chimanyikwiro cha chikoko

 Baibolo likuti ŵanthu ŵakupokera “chimanyikwiro cha chikoko” chifukwa chakuti ŵakuchilondezga “mwakuzukuma,” ndipo ŵakuchisopa. (Chivumbuzi 13:3, 4; 16:2) Para ŵanthu ŵakutemwa chomene charu chawo, vimanyikwiro vyake, magulu ghake gha ŵasilikari, ndikuti ŵakusopa chikoko. Buku linyake lakulongosora nkhani za visopa likuti: “Mazuŵa ghano ŵanthu ŵakutemwa chomene charu chawo kufika na pa kuchisopa wuwo.” a—The Encyclopedia of Religion.

 Kasi nambara ya chikoko ya 666 yikudindika wuli pa woko la malyero panji pa chisko cha munthu? (Chivumbuzi 13:16) Chiuta wakaphalira mtundu wa Ŵaisrayeli kuti: “Mughakakilire nga ntchikumbusko pa woko linu, ndipo ghaŵenge nga ni kamubambe pa chisko chinu.” (Dotoronome 11:18) Apa Chiuta wakang’anamuranga kuti Ŵaisrayeli ŵachite kughakakilira nadi pa mawoko ghawo panji pa visko vyawo yayi, kweni mazgu gha Chiuta ndigho ghakeneranga kuŵalongozga pa chilichose icho ŵakachitanga na kughanaghana. Mwakuyana waka, nambara ya 666 yikwenera kudindika nadi pa woko panji pa chisko nga umo ŵakuchitira ŵanthu awo ŵakujilembalemba (tattoo) yayi. Kweni nambara ya chikoko iyi yikwimira wose awo ŵakuchitako vyandyali. Wose awo ŵali na chimanyikwiro cha chikoko panji kuti nambara ya 666 ŵakwimikana na Chiuta.—Chivumbuzi 14:9, 10; 19:19-21.