Marta, yumoza wa Ŵakaboni ŵa Yehova ku Guatemala, wakusambira chiyowoyero cha Chikekchi mwakuti wapharazgirenge ŵanthu awo ŵakuyowoya chiyowoyero ichi uthenga wa mu Baibolo. Zuŵa linyake, wakawona mwanalume munyake wakufuma mu chipatala. Marta wati wamuwona munthu uyu, wakamanya kuti wafuma mu muzi wa Kekchi mu dera la mapiri uko Ŵakaboni ŵa Yehova ŵakapharazgangako viŵi yayi. Wakakumana nayo na kuyowoya nayo mwa kubalabaska waka mu chiyowoyero cha Chikekchi.

 Marta wakapempha munthu uyu usange wangatemwa kusambira Baibolo. Munthu uyu wakazomera mwakukondwa kweni wakati walije ndalama zakulipilira sambiro ili. Marta wakalongosora kuti Ŵakaboni ŵa Yehova ŵakusambizga ŵanthu Baibolo kwa ulere. Wakamuphaliraso kuti ŵangasambira kwizira pa foni ndipo banja lake lose lingakhalapo. Munthu uyu wakazomera. Pakuti wakayowoyanga na kuŵazga Chisipanishi, Marta wakamupa Baibolo Lachisipanishi la Malemba Ghakupatulika mu Mang’anamuliro gha Charu Chiphya. Wakamupaso buku lakusambilira Baibolo mu chiyowoyero cha Chikekchi lakuti Kasi Baibolo Likusambizgachi Chomenechomene? Sabata yakulondezgapo, munthu uyu, muwoli wake, na ŵana ŵawo ŵaŵiri ŵakamba kusambira Baibolo na Marta kwizira pa foni. Ŵakasambiranga kaŵiri pa sabata. Marta wakuti: “Pakuti ine nkhuchimanya viŵi yayi Chikekchi, tikasambiranga mu Chisipanishi, ndipo dada uyu wakang’anamuliranga muwoli wake ivyo tayowoya. Ŵana ŵakachimanyanga Chisipanishi.”

 Munthu uyu wakaŵa muliska ku tchalitchi lake. Iyo wakamba kusambizga ŵanthu ŵa mu tchalitchi lake ivyo wakasambiranga pa sambiro la Baibolo. Ŵanthu aŵa ŵakavitemwa ivyo ŵakapulika ndipo ŵakamufumba uko wakavitora visambizgo viphya ivi. Wati waŵaphalira kuti wakusambira Baibolo, nawo ŵakamba kuŵapo pa sambiro yumoza na yumoza. Nakalinga ŵanthu pafupifupi 15 ŵakawungananga sabata yiliyose kuti ŵasambire Baibolo na Marta kwizira pa foni. Pamanyuma, ŵakaŵika mayikirofoni pafupi na foni kuti waliyose wapulikenge makora.

 Marta wati waphalira ŵalara mu mpingo wake vya sambiro la Baibolo ili, yumoza wawo wakaluta ku muzi uwo ŵasambiri ŵara ŵakakhalanga. Wakaŵapempha kuti ŵazakaŵepo pa nkhani yachisanisani iyo mulaŵiliri wa dera a wazamuyowoya mu muzi unyake uwo uli pamtunda wa ora limoza pa galimoto, kufuma apo maora ghaŵiri ghakwenda pasi. Ŵasambiri aŵa ŵakazomera kuti ŵizenge, ndipo ŵanthu 17 ŵakafika nadi.

 Pati pajumpha masabata, mulaŵiliri wa dera na Ŵakaboni ŵanyake ŵakaluta na kukhala mazuŵa ghanayi na ŵasambiri aŵa. Mulenji uliwose, ŵakawoneleranga mavidiyo gha nkhani za mu Baibolo pa jw.org mu chiyowoyero cha Chikekchi, ndipo ŵakasambiranga kabuku kakuti Kasi Mbanjani Ŵakuchita Khumbo la Yehova Mazuŵa Ghano? Kumise, ŵakawoneleranga mavidiyo ghanyake pa JW Broadcasting. Mulaŵiliri wa dera wakagaŵiraso msambiri waliyose munthu wakuti wamusambizgenge Baibolo payekha.

 Mu mazuŵa ghanayi agha, Ŵakaboni ŵakapharazgaso mu mizi yinyake yakufupi ndipo ŵakachema ŵanthu kuti ŵize ku ungano wapadera. Pa ungano uwu, ŵabali ŵakapempha ŵanthu 47 awo ŵakafika kuti ŵasambirenge nawo Baibolo. Mabanja 11 ghakazomera kusambira.

 Pati pajumpha myezi yichoko waka, ŵalara ŵakanozga vya kuchitiska ungano mu muzi wakwamba wura sabata yiliyose. Pasono, ŵanthu pafupifupi 40 ŵakufika pa maungano mwakukhazikika. Nakuti ŵabali ŵakachita Chikumbusko cha nyifwa ya Yesu kwenekura, ndipo ŵakakondwa kuwona kuti pakiza ŵanthu 91.

 Pakukumbuka umo vikambira na umo viliri pasono, Marta wakuti: “Nkhuwonga chomene Yehova. Nyengo zinyake nkhuwona nga ningachita vinandi yayi. Kweni ise tili viteŵetero mu mawoko gha Chiuta. Iyo wakamanya ivyo vikaŵa mu mitima ya ŵanthu ŵa mu mizi iyi, ndipo wakaŵaguzira ku ŵanthu ŵake. Yehova wakuŵatemwa chomene.”